22 أيث-كورينث 4 - ثريفيث 2020

لْإِنْجِيل نُّوْر نّس يتْشعْشِيع ذِي ثَادْجسْت

¹ س مَانَايَا، وَار نْتفْشِيڒ شَا مِنْزِي غَارْنغ ڒْعَهذ-أَ وَانِيتَا س اَرَّحْمث ن أَربِّـي.

² نشِّين نتْبعَّاعذ خ ثْمسْڒَايِين ن ڒفْضِيحث إِݣ يتْوَاخدّْمن س ثْنُوْفْرَا. وَار نسْخدِّيم شَا ثَحْرَايْمِيث، وَار نتْحرِّيف شَا اَوَاڒ ن أَربِّـي. نشِّين زَّاث إِ أَربِّـي نْسڒْمَاذ لْحَقِيقَا بْڒَا مَا اَت نسْنُوْفَّر. أَمُّو غَارْسن مَارَّا يوْذَان ذِي ضَّمِير نْسن بلِّي ذَايْنغ تِّقث.

³ لْإِنْجِيل نّغ مڒَا يغمّس س يِجّن ن لْتَام، ئِغمّس غِير إِ يِنِّي يفنَّان.

⁴ يِنِّي وَار يُوْمِينن شَا ڒَعْقُوْڒَاث نْسن يسْطمّص-يثن إِبْڒِيس ونِّي يدْجَان اَم أَربِّـي ن دُّنشْت-أَ زَعْمَا. نِثْنِي وَار زمَّرن اَذ ࢲرن نُّوْر ن لْإِنْجِيل يعْنِي لْعَظَمَا ن لْمَسِيح، نتَّا يدْجَان ذ صِّفث ن أَربِّـي.

⁵ وَار نتْبشِّير شَا س يِيخف نّغ، نتْبشَّار س عِيْسَى لْمَسِيح يعْنِي نتَّا ذ سِيذِيثْنغ. أُو نشِّين ذ يخدَّامن نْوم عْلَاحْسَاب عِيْسَى.

⁶ ذ أَربِّـي إِݣ ينَّان: "نُّوْر اَذ يشعْشع زِي ثَادْجسْت." ذ أَربِّـي-يَا إِݣ يشعْشْعن ذݣ وُوْڒَاون نّغ بَاش أَ نسّن لْعَظَمَا ن أَربِّـي إِݣ يتْشعْشِيعن ذݣ وُوْذم ن عِيْسَى لْمَسِيح.

⁷ فَا ڒْكنْز-أَ وَانِيتَا اَقَاث غَارْنغ ذݣ يغرَّافن ن وشَاڒ يعْنِي ذِي دَّات نّغ، بَاش اَذ د يمظْهَار بلِّي جّْهذ-أَ اَمقّْرَان اَطَّاس يتَاس-د زِي أَربِّـي مَاشِي زَّايْنغ.

⁸ نشِّين نتْوَازيَّار زِي مْكُڒ جِّهث، وَلَكِن وَار نتْوَاحسّڒ شَا. وَار نسِّين شَا مَانِي غَا نَارّ س وزدْجِيف، وَلَكِن وَار نْتفْشِيڒ شَا.

⁹ نتْوَاعدَّاب، وَلَكِن وَار نقِّيم شَا وَاحذْنغ. نتْوَاغْضڒ، وَلَكِن وَار نرِّيز شَا.

¹⁰ ڒبْدَا نَربُّو ذِي دَّات نّغ ڒْموْث ن عِيْسَى بَاش اَذ د تْمظْهَار ؤُڒَا ذ ثُوْذَارْث ن عِيْسَى ذِي دَّات نّغ.

¹¹ لِأَنَّا نشِّين إِݣ يدَّرن نتْوَاسلَّام ڒبْدَا غَار ڒْموْث عْلَاحْسَاب عِيْسَى حمَا ثُوْذَارْث ن عِيْسَى اَذ د تْمظْهَار ذِي دَّات نّغ يتْمتَّان.

¹² خ مَانَايَا خْمِي نشِّين نتْوَاجَاه ڒْموْث، كنِّيو تِيڒِي ذَايْوم ثُوْذَارْث.

¹³ ئِقَّار يِجّن ذِي لْكِتَاب: "ؤُمْنغ، س مَانَايَا سِّيوْڒغ." نّفْس لْإِيمَان-أَ يدْجَان ذَايْنغ، زَّايس إِي نْتَامن زَّايس إِي نسَّاوَاڒ.

¹⁴ نسّن ونِّي إِي د يسكَّرن سِيذِيثْنغ عِيْسَى نتَّا عَاوذ اَذَانغ د يسكَّر اَك عِيْسَى اَذَانغ يسحْضَار اَكِذْوم زَّاث نّس.

¹⁵ شُوْف، مَانَايَا يوْقع مَارَّا بَاش اَكنِّيو ينْفع. خْمِي يتنْتَاشَار اَرْضَا غَار يِوْذَان اَطَّاس س وَاطَّاس يعْنِي اَرْضَا-يَا اَذ د يسْفيّض شُّكر إِ لْعَظَمَا ن أَربِّـي.

¹⁶ خ مَانَايَا نشِّين وَار نْتفْشِيڒ شَا. وَاخَّا طَّبِيعَا ن دَّات نّغ غَار بَارَّا تْرَاح، طَّبِيعَا نّغ غَار ذَاخڒ تجْهِيذ نْهَار خ نْهَار.

¹⁷ شُوْف، ڒمْحَاين نّغ فْسُوْسنْت تْرَاحنْت تَاسنْت-يد ذغْيَا، سوْجَاذنْت-اَنغ غَار يِجّن ن لْعَظَمَا ذ ثَمقّْرَانْت بْڒَا ڒقْيَاس.

¹⁸ وَار نسْرُوْسِي شَا ثِيطَّاوِين نّغ ذِي مِن نتْوَاڒَا، نْسْرُوْسَا-ثنْت ذِي مِن وَار نتْوِيڒِي شَا. لِأَنَّا مِن نتْوَاڒَا ذغْيَا يتْرَاح، مِن وَار نتْوِيڒِي شَا ذ ونِّي إِݣ يتْدُوْمَان إِ ڒبْدَا.