22 أيث-كورينث 3 - ثريفيث 2020

¹ نشِّين، مَا نبْذَا أَ نْشكَّر يخف نّغ عَاوذ زَعْمَا بَاش اَذَاوم نْقدّم يخف نّغ؟ مَا نشِّين اَم شَا ن يثَرَّاسن غَا يحْذَاجن ثِبْرَاثِين بَاش اَخَانغ شهّْذنْت، يعْنِي ثِبْرَاثِين نِّي اَذ د اَسنْت زَّايْوم نِغ اَغَارْوم د اَسنْت؟

² لَّا، كنِّيو س يِيخف نْوم ذ ثَبْرَات نّغ يعْنِي ثْشهّْذم خَانغ. ثَبْرَات-أَ ثُوْرَا ݣ وُوْڒَاون نّغ، سّْنن-تث قَّارن-تث مَارَّا يِوْذَان.

³ ثْبَانم-د بلِّي كنِّيو اَم يِجّن ن ثبْرَات زِي لْمَسِيح، نسِّيوض-يت نشِّين. وَار ثُوْرِي شَا س سْمخ، ثُوْرَا س أَرُّوْح ن أَربِّـي يدَّرن. وَار ثنْقِيش شَا ذِي ثڒْوِيحِين ن وزْرُو، ثنْقش ذِي ثڒْوِيحِين ن وُوْڒ ن بْنَاذم.

⁴ مَانَايَا نقَّار-يث س تِّقث إِي غَارْنغ ذِي أَربِّـي س لْمَسِيح.

⁵ يعْنِي مَارَّا مَانَايَا وَار ذَاس نْزمَّر شَا نشِّين س يِيخف نّغ. وَار نتْحسِّيب شَا بلِّي ثِزمَّار-أَ تَاسنْت-يد زَّايْنغ؛ لَّا، تَاسنْت-يد زِي أَربِّـي.

⁶ ذ نتَّا إِي ذَانغ يُوْشِين ثِزمَّار-أَ بَاش أَ نِيڒِي ذ يخدَّامن ن يِجّن ن ڒْعَهذ ذ جْذِيذ. ڒْعَهذ-أَ مَاشِي س شَّرِيعَا؛ لَّا، ڒْعَهذ-أَ س أَرُّوْح ن أَربِّـي. لِأَنَّا شَّرِيعَا ثْنقّ، أَرُّوْح ن أَربِّـي نتَّا يسدَّر.

لْعَظَمَا ن ڒْعَهذ ذ جْذِيذ

⁷ فَا شَّرِيعَا نِّي ن ڒْموْث، ثِيرَا نّس نقْشنْت ذِي ثڒْوِيحِين ن وزْرُو. شَّرِيعَا نِّي ثُوْسَا-د س يِجّن ن لْعَظَمَا ذ ثَمقّْرَانْت، أَتَاف أَيث-إِسْرَائِيل وَار زمَّرن اَذ قِّيمن خزَّرن ذݣ وغمْبُوْب ن مُوْسَى س لْعَظَمَا نِّي إِي ذَايس يتْشعْشِيْعن وَاخَّا تِيڒِي تْرَاح-اَس لْعَظَمَا نِّي.

⁸ ڒخُّو ڒْعَهذ رُوْحِيَا، لْعَظَمَا نّس كْتَار اَطَّاس زِي شَّرِيعَا نِّي!

⁹ مڒَا غَارس لْعَظَمَا غَار شَّرِيعَا نِّي إِي تُوْغَا د يتَاوِين لْحِسَاب ذ لْعِقَاب، أَتَاف ڒْعَهذ-أَ إِي د يتَاوِين صُّلْح مشْحَاڒ ثمْغَر لْعَظَمَا نّس كْتَار زِي ثنِّي نّغْنِي.

¹⁰ ذ صَّح شَّرِيعَا نِّي إِي تُوْغَا غَار ثدْجَا لْعَظَمَا، ڒخُّو وَار غَارس ثقِّيم بُو لْعَظَمَا يعْنِي اَك لْعَظَمَا-يَا ثَمقّْرَانْت اَطَّاس إِي غَارس غَار ڒْعَهذ نِّي رُوْحِيَا.

¹¹ شُوْف، مِين يتْوَاتكّْسن يعْنِي شَّرِيعَا نِّي، مڒَا ثُوْسَا-د س يِجّن ن لْعَظَمَا، وَا لَابُد لْعَظَمَا-يَا ن ڒْعَهذ يتْدُوْمَان اَذ تِيڒِي كْتَار اَطَّاس زِي ثن نّغْنِي!

¹² إِذن، مڒَا غَارْنغ يجّن ن لْأَمَال اَم وَانِيتَا اَتَاف غَارْنغ يجّن ن زْعَامث.

¹³ وَار ندْجِي شَا اَم مُوْسَى يغمّس إِ وغمْبُوْب نّس س يِجّن ن لْتَام بَاش وَار تْغِيمِين شَا أَيث-إِسْرَائِيل تْخزَّرن ذَايس خْمِي اَتَاف يتْرَاح-اَس وشعْشع نِّي.

¹⁴ نِثْنِي ڒَعْقُوْڒَاث نْسن تْوَاقْسْحن وَار فهّْمن شَا. أَڒ نْهَارَا خْمِي غَا غَرن ذِي ڒْعَهذ نِّي اَقْذِيم تَافن لْتَام نِّي عَاذ ذَايس. لْتَام نِّي وَار يتْوَاكّس شَا، غِير س لْمَسِيح إِي غَا يتْوَاكّس.

¹⁵ وَاه، أَڒ نْهَارَا خْمِي غَا غَرن أَيثْ-إِسْرَائِيل ذِي لْكِتَاب ن مُوْسَى اَتَاف ؤُڒَاون نْسن غمّْسن س يِجّن ن لْتَام.

¹⁶ وَلَكِن خْمِي غَا يَامن شَان يِجّن زِي سِيذِيثْنغ، اَذَاس يتْوَاكّس لْتَام نِّي.

¹⁷ شُوْف، سِيذِيثْنغ نتَّا ذ أَرُّوْح، مَانِي مَا يدْجَا أَرُّوْح ن سِيذِيثْنغ ذِنِّي لْحُرِّيَا رُوْحِيَا.

¹⁸ ڒخُّو نشِّين اَغمْبُوْب نّغ وَار يغْمِيس س وَالُو. نتْوَاڒَا لْعَظَمَا ن سِيذِيثْنغ، نتْوَابدَّاڒ بَاش أَ نِيڒِي ذ يجّن ن صِّفث نّس س يِجّن ن لْعَظَمَا يتْمَارْنِين. مَانَايَا يتَاس-د زِي سِيذِيثْنغ إِݣ يدْجَان ذ أَرُّوْح.