22 أيث-كورينث 2 - ثريفيث 2020

¹ شُوْف، ݣِّيغ ذِي ڒْبَاڒ ينُو وَار تݣّغ بُو شَا ن زِّيَارَا نّغْنِي بَاش وَار كنِّيو سْخيِّيقغ شَا.

² لِأَنَّا مڒَا سْخيَّاقغ-كنِّيو نش، وِي غَا يقِّيمن بَاش اَذَايِي يسْفَرح إِلَّا كنِّيو إِي سْخيَّاقغ نش؟

³ تُوْغَا ؤُرِيغ ثَبْرَات نِّي بَاش وَار ذَايِي تسْخيَّاقم شَا، رزُّوْغ اَخْمِي د غَا اَسغ غَارْوم أُو لَابُد اَذَايِي ثسْفَرْحم. مڒَا فَرْحغ اَذ يڒِيغ نش متْأَكّد اَذ تْفَرْحم ؤُڒَا ذ كنِّيو.

⁴ لِأَنَّا ؤُرِيغ-اَوم-ت-يد س يِجّن ن ؤُزِيَّار ذ يِجّن ن وخِيّق زݣ وُوْڒ ينُو ذ وَاطَّاس ن يمطَّاون. وَار يدْجِي بُو نِّيغ-اَوم-ت حمَا اَكنِّيو سْخيّْقغ؛ لَّا، حمَا اَذ تسّْنم مشْحَاڒ ثمْغَار ڒمْحِبّث ينُو غَارْوم.

سمْحم-اَس إِ ونِّي يعصَّان

⁵ فَا مڒَا يجّن تُوْغَا يسْخيَّاق-يكنِّيو، وَار يدْجِي بُو ذ نش إِݣ يسْخيّق لَّا. يمْكن يسْخيّق-يكنِّيو مَارَّا نِغ ڒبْعَاض زَّايْوم (وَار خْسغ شَا اَذ سمْغَارغ لْقَضِيَا-يَا).

⁶ بْنَاذم-أَ، لْعِقَاب نِّي إِي ذَاس ثݣِّيم تقْڒِيبَان مَارَّا إِذْوم، بَرَكَا خَاس.

⁷ ڒخُّو اَذَاس ثْسمْحم عَاوْنم-ث بَاش وَار يغرّق شَا س وخيّق اَطَّاس.

⁸ س مَانَايَا تتَّارغ زَّايْوم اَذَاس ثسْبيّْنم عَاوذ ڒمْحِبّث نْوم.

⁹ ؤُرِيغ-اَوم-د مَانَاينِّي بَاش اَكنِّيو جّرْبغ اَذ سّْنغ مَا تْطَاعَام ذِي مَارَّا مَا لَّا.

¹⁰ ونِّي ؤُمِي غَا ثْسمْحم ؤُڒَا ذ نش اَذَاس سمْحغ. مڒَا ذِنِّي شَان ڒْحَاجث اَذَاس سمْحغ، قَا سمْحغ-اَس-ت. سمْحغ-اَس عْلَاحْسَاب كنِّيو، ئِشْهذ خَاس لْمَسِيح.

¹¹ مَانَايَا حمَا شِّيطَان وَار ذَانغ يخدّع شَا، أَقَا وَار نْغفّڒ شَا خ مِين يتْشِيطِين نتَّا.

أَ نرْبح س لْمَسِيح

¹² فَا وَامِي د ؤُوْضغ غَار ثنْدِينْت ن تْرَاوْس بَاش اَذ بشَّرغ س لْإِنْجِيل ن لْمَسِيح، ؤُفِيغ ثْنُوْرْزم-اَيِي-د يجّن ن ثوَّارْث ن سِيذِيثْنغ.

¹³ وَلَكِن ؤُڒ ينُو وَار يدْجِي شَا مرْتَاح وَامِي وَار ؤُفِيغ شَا ذِنِّي ؤُمَا تِيتُوْس، مْصَافَاضغ خَاسن ؤُيُوْرغ غَار مَاسِدُوْنْيَا.

¹⁴ وَلَكِن أَ نحْمذ أَربِّـي. نتَّا ڒبْدَا يسُوْݣُّوْر-اَنغ ذݣ وبْرِيذ ن اَرْبَاح س لْمَسِيح أُو زَّايْنغ نشِّين يتنْتَاشَار ڒفْوَاح ن ثُوْسْنَا خ لْمَسِيح.

¹⁵ لِأَنَّا نشِّين ذ يجّن ن ڒفْوَاح ن لْمَسِيح غَار أَربِّـي جَار ن يِنِّي ينجّْمن ذ يِنِّي يفنَّان.

¹⁶ نشِّين اَم شُّوْم ن ڒْموْث غَار يِنِّي يفنَّان، ذ شُّوْم ن ثُوْذَارْث غَار يِنِّي ينجّْمن. إِيوَا وَار ذِنِّي حَدّ إِي غَا يزمَّرن إِ ڒْخذْمث-أَ!

¹⁷ أَقَا نشِّين مَاشِي اَم خَربِّي ن يِوْذَان يتݣّن تِّجَارَا ذݣ وَاوَاڒ ن أَربِّـي، نشِّين ذِي لْمَسِيح نسَّاوَاڒ س وُوْڒ يصْفَا زِي أَربِّـي أُو زَّاث إِ أَربِّـي.