22 أيث-كورينث 13 - ثريفيث 2020

أَرَّسُوْل بُوْلُس يعدْجم إِ يِنِّي إِي ذَاس يتْعَارَّاضن

¹ ثَانِيتَا ذ زِّيَارَا وِيس ثْڒَاثَا تَاسغ-د غَارْوم. مَامش يقَّار لْكِتَاب: <كُڒ تُّهْمَا اَخَاس شهْذن ذ دَّلِيل ثْنَاين ن ڒشْهُوْذ نِغ ثْڒَاثَا.>

² نش ذِي زِّيَارَا إِي تُوْغَا د ݣِّيغ غَارْوم وِيس ثْنَاين عڒْمغ-اَسن إِ يِنِّي يعصَّان ذ يِوْذَان نّغْنِي مَارَّا. ڒخُّو خْمِي خَاوم تْغَابِيغ اَذَاوم عڒْمغ عَاوذ، يعْنِي خْمِي د غَا اَوْضغ ؤُڒَا ذ يجّن زݣ يِنِّي يعصَّان مَا اَخَاس حِينّغ.

³ مَايمِّي؟ لِأَنَّا ثْرزُّوْم دَّلِيل لْمَسِيح يسَّاوَاڒ زَّايِي. مَا يضْعف نتَّا ذِي ڒْوسْط نْوم؟ لَّا، ئِجْهذ جَارَاوم.

⁴ وَاه، نتَّا يتْوَاصلّب خ صَّلِيب س ضُّوْعف، وَا إِنَّمَا يتدَّر س جّْهذ ن أَربِّـي. أَمنِّي ؤُڒَا ذ نشِّين. نضْعف اَم ضُّوْعف نّس نتَّا، وَا إِنَّمَا جَارَاوم نْتدَّر اَكِذس نتَّا س جّْهذ ن أَربِّـي.

⁵ جَرّْبث يخف نْوم مَا اَقَا كنِّيو ذِي لْإِيمَان. رَاجْعث يخف نْوم. يَاش ثسّْنم قَا عِيْسَى لْمَسِيح اَقَاث ذَايْوم؟ يعْنِي مڒَا وَار ثسْقِيطم شَا.

⁶ أُو نش تّيّْقغ إِلَّا كنِّيو اَذَانغ ثَافم نشِّين وَار نسْقِيط شَا.

⁷ نْتتَّار-اَس إِ أَربِّـي بَاش وَار ثْعصِّيم شَا، مَاشِي بَاش اَذَانغ اَفن يِوْذَان وَار نسْقِيط شَا ذِي تُّهْمَا-يَا إِي خَاوم نْقدّم؛ لَّا، نشِّين نْرزُّو اَذ تݣّم مِين يدْجَان نِيشَان. مڒَا زْغِيڒ-اَسن إِ ڒبْعَاض قَا نسْقط زَعْمَا ذِي تُّهْمَا-يَا إِي خَاوم نْقدّم، إِيوَا مَعْلِيش.

⁸ شُوْف، وَار نْزمَّر أَ نݣّ وَالُو ضد إِ لْحَقِيقَا؛ نْخدّم إِ لْحَقِيقَا.

⁹ لِأَنَّا نْفَرّح مڒْمِي مَا نضْعف، كنِّيو تِيڒِيم ثْجهْذم. ذ مَانَايَا مِيخف نْرزُّو ذِي ثْࢲَادْجِيث نّغ اَذ تْصڒْحم نِيشَان.

¹⁰ س مَانَايَا إِي تَارِيغ نش ثِمسْڒَايِين-أَ ذِي ثبْرَات-أَ نش غَابغ خَاوم. أَمُّو خْمِي إِي د غَا عقْبغ غَارْوم وَار خْسغ شَا اَذ يڒِيغ قسْحغ اَكِذْوم عْلَاحْسَاب سُّلْطَا نِّي إِي ذَايِي يُوْشَا سِيذِيثْنغ. يُوْشَا-ٱيِي-ت بَاش اَكنِّيو سْجهْذغ مَاشِي اَكنِّيو رْزغ.

لْخِتَام ن ثبْرَات-أَ

¹¹ صَافِي آي أَيثْمَا، فَرّْحث. صڒْحث يبْرِيذن نْوم نِيشَان. تْصنَّاطث غَارِي مِين ذَاوم قَّارغ. إِڒِيث ذ يجّن ذِي اَرَّاي نْوم. تْعِيشث ذِي ڒهْنَا. أَربِّـي نّغ ن ڒمْحِبّث ذ ڒهْنَا اَذ يِيڒِي اَكِذْوم.

^12-13 تْسدْجَامث خ وَايَاوْيَا س يِجّن ن سْڒَام يصْفَا. تْسدْجَامن-د خَاوم مَارَّا ڒْمُوْمِنِين صَّلِحِين.

¹⁴ أَرْضَا ن سِيذِيثْنغ عِيْسَى لْمَسِيح ذ ڒمْحِبّث ن أَربِّـي ذ ومْعَشَار ن أَرُّوْح يقدّْسن اَكِذْوم يِيڒِي مَارَّا. آمِين.