22 أيث-كورينث 11 - ثريفيث 2020

أَرَّسُوْل بُوْلُس اَقَاث ضذ إِ يِنِّي يتَارَّان يخف نْسن ذ اَرُّسُل

^1-2 إِيوَا رزُّوْغ اَذ تصْبَرم شْوَايْت اَك ثُوْبُّوْهْڒِيَا-يَا ينُو زَعْمَا. وَاه، صبَّرث اَكِذِي لِأَنَّا غَارِي يجّن ن لْغِرَا خَاوم، يعْنِي يجّن ن لْغِرَا زِي أَربِّـي. أَقَا خطْبغ-كنِّيو زَعْمَا إِ يِجّن ن ورْيَاز يعْنِي ذ لْمَسِيح اَكنِّيو اَوِيغ غَارس اَم يِجّن ن ثعْزْرِيْث وَار ذَايس بُو ڒْعِيب.

³ وَلَكِن نش ݣّْوْذغ مَامّش ذَاس يوْقع إِ حَوَّا يشْمث-يت وفِيغَر س ثحْرَايْمِيث نّس ؤُڒَا ذ كنِّيو ڒَعْقُوْڒَاث نْوم اَذ فّْغن اَبْرِيذ، وَار ذَاس تْطِيعِيم شَا إِ لْمَسِيح س وُوْڒَاون نْوم بْڒَا نِّفَاق أُو بْڒَا ڒْعِيب.

⁴ لِأَنَّا كنِّيو ثقَّارم مَعْلِيش وَاخَّا يُوْسَا-د غَارْوم يجّن يتْبشَّارن س يِجّن ن عِيْسَى نّغْنِي مْزُوَّر مَاشِي ذ ونِّي إِي خف نتْبشَّار نشِّين زِي قْبڒ. نِغ ذغْيَا ثْقبّْڒم يجّن ن اَرُّوْح نّغْنِي مْزُوَّر مَاشِي ذ ونِّي إِي تُوْغَا ثْقبْڒم زِي قْبڒ. نِغ ذغْيَا ثْقبّْڒم يجّن ن لْإِنْجِيل نّغْنِي مْزُوَّر مَاشِي ذ ونِّي إِي تُوْغَا ثْقبْڒم زِي قْبڒ.

⁵ شُوْف، وَار حسّْبغ شَا يخف ينُو ذ اَنقْصِي زِي اَرُّسُل يمزْوُوْرَا. لَّا وَالُو.

⁶ أُو نش وَاخَّا وَار سِّينغ شَا لْخُطْبَا ينُو مْلِيح، وَار ذَايِي ثنْقِيص شَا ثُوْسْنَا. نشِّين ثُوْسْنَا-يَا نسْبيّن-اَوم-ت-يد نِيشَان س مَارَّا ثِمسْڒَايِين.

⁷ مَا ذ ڒْعِيب مڒَا بشَّرغ-كنِّيو س لْإِنْجِيل ن أَربِّـي بْڒَا مَا ذَايِي ثْخدْجْسم، يعْنِي سمْزَايغ يخف ينُو بَاش اَكنِّيو سْݣَعّْذغ؟

⁸ نش جمْعغ تْمنْيَاث زِي ثْجُوْمَع نّغْنِي ن ڒْمُوْمِنِين قبْڒغ زَّايْسن مَانَاينِّي بَاش اَكِذْوم خذْمغ.

⁹ وَامِي حْضَارغ اَكِذْوم تُوْغَا نش تحْذَاجِيغ، وَار تْبسَّاڒغ خ حَدّ زَّايْوم؛ لَّا، ؤُشِين-اَيِي مِين تحْذَاجِيغ اَيثْمَاثْنغ ينِّي إِي د يُوْسِين زِي مَاسِدُوْنْيَا. أَمنِّي ؤُݣِيغ اَخَاوم بسّْڒغ، أَذ قِّيمغ مسْتَمّر اَمنِّي.

¹⁰ س ڒْحَقّ ن لْمَسِيح إِي ذَايِي، ؤُڒَا ذ يجّن ذݣ يمُوْشَان ن ؤُخَايَا مَا ٱذ يكّس لْإِفْتِخَار-أَ ينُو.

¹¹ مَايمِّي؟ مَا وَار كنِّيو تخْسغ شَا؟ قَا أَربِّـي يسّن بلِّي ثْعِيزّم خَافِي.

¹² فَا مِين تݣّغ اَذ قِّيمغ اَمُّو تݣّغ-ث. مَايمِّي؟ خْسغ اَذ قسّغ يضَارن إِ يِنِّي يرزُّوْن لْفُرْصَا اَذ يڒِين مْقُوْدَّان اَكِذْنغ ذِي ثْمسْڒَايِين-أَ إِي خف تفْتَخَرن.

¹³ شُوْف، يرْيَازن اَم يِيْنَا تَارَّان يخف نْسن ذ اَرُّسُل خدّْمن ذ يغدَّارن، سْنعْمِيڒن ذ اَرُّسُل ن لْمَسِيح.

¹⁴ إِيوَا وَار نسْتغْڒِيب شَا لِأَنَّا شِّيطَان نتَّا س يِيخف نّس يسْنعْمِيڒ ذ يجّن ن لْمَلَائِكَا ن نُّوْر.

¹⁵ فَلِهَاذَا، وَار نسْتغْڒِيب شَا مڒَا يخدَّامن ن شِّيطَان سْنعْمِيڒن ذ يخدَّامن ن ڒْحَقّ. ڒفْنَا نْسن اَذ يِيڒِي عْلَاحْسَاب مِين سْتَاحْقنْت ڒفْعَايڒ نْسن.

أَرَّسُوْل بُوْلُس ذ ڒمْحَاين نّس

¹⁶ أَذ ينِيغ عَاوذ، وَار ذَايِي حسّْبث شَا ذ اَبُوْهَاڒِي. وَاخَّا ثْحسْبم-اَيِي ذ اَبُوْهَاڒِي، قبّْڒم-اَيِي بَاش اَذ فْتَخَرغ شْوَايْت.

¹⁷ مَانَايَا إِي زِي تفْتَخَرغ قَّارغ-ث نش اَم يِجّن ن ثُوْبُّوْهْڒِيَا، وَار ث يقَّار شَا سِيذِيثْنغ.

¹⁸ خْمِي تفْتَخَرن يِوْذَان-أَ اَطَّاس عْلَاحْسَاب مِين يتݣّ بْنَاذم، ؤُڒَا ذ نش اَذ فْتَخَرغ.

¹⁹ مَا كنِّيو زَعْمَا ثْفهْمم مْلِيح؟ إِيوَا مَايمِّي س ڒفْرَاحث ثْصبَّرم يبُوْهَاڒِيْين؟

²⁰ أَقَا ثْصبَّرم ؤُڒَا ذ يِنِّي إِي كنِّيو يتَارَّان ذ يسمْغَان، ذ يِنِّي إِي كنِّيو يتتّن، ذ يِنِّي إِي خَاوم يتْبُوْصَرن، ذ يِنِّي إِي ذِي يدْجَا تَّكبُّر، ذ يِنِّي إِي كنِّيو يشَّاثن س يسقِّيڒن.

²¹ نش تْسذْحِيغ زَعْمَا، نشِّين نضْعف وَار نْزمَّر أَ نخْذم اَمنِّي! قَّارغ نش زَعْمَا س ثُوْبُّوْهْڒِيَا-يَا قَا مڒْمِي مَا يزْعَم حَدّ اَزَّايس يفْتَخَر ؤُڒَا ذ نش اَزَّايس فْتَخَرغ.

²² مڒَا نِثْنِي ذ يعِيبْرَانِيْين، ؤُڒَا ذ نش ذ اَعِيبْرَانِي. مڒَا نِثْنِي زِي أَيث-إِسْرَائِيل، ؤُڒَا ذ نش ذ اَئِسْرَائِيلِي. مڒَا نِثْنِي ؤُسِين-د زِي ثَارْوَا ن بْرَاهِيم، ؤُڒَا ذ نش ؤُسِيغ-د زِي ثَارْوَا ن بْرَاهِيم.

²³ مڒَا نِثْنِي ذ يخدَّامن ن لْمَسِيح، ؤُڒَا ذ نش حْسن عَاذ ذ اَخدَّام ن لْمَسِيح (سَّاوَاڒغ زَعْمَا س ثُوْبُّوْهْڒِيَا-يَا). نش شَّاثغ تَمَارَا كْتَار زَّايْسن، حبّْسن-اَيِي كْتَار زَّايْسن، ؤُوْثِين-اَيِي س وسْغُوْن كْتَار زَّايْسن. نش مشْحَاڒ ن ثْوَاڒَاثِين تْوَاجَاهغ ڒْموْث.

²⁴ خمْسَا ن ثْوَاڒَاثِين شَّاثن-اَيِي يسْرَائِيلِيْين س اَربعِين ن ثْيِيْثَا قلّ يشْتن س وسْغُوْن.

²⁵ ثْڒَاثَا ن ثْوَاڒَاثِين تْمَارَّاثن-اَيِي س وعْمُوْذ. ئِجّن ن ثْوَاڒَا رجْمن-اَيِي س وزْرُو. ثْڒَاثَا ن ثْوَاڒَاثِين يغْرق زَّايِي وغَرَّابُو سعْذُوْغ يجّن وَاسّ ن ذ يِجّن ن دْجِيڒث ذِي ڒبْحَر.

²⁶ نش مشْحَاڒ ن ثْوَاڒَاثِين تِيڒِيغ تْسَفَرغ ذِي لْخَطَر ن يغزْرَان، ذ لْخَطَر ن يشفَّارن، ذ لْخَطَر ن ڒْقُم ينُو، ذ لْخَطَر ن ييُوْنَانِيْين، ذ لْخَطَر ذِي ثنْدِينْت، ذ لْخَطَر ذِي ڒخْڒَا، ذ لْخَطَر ذِي ڒبْحَر، ذ لْخَطَر ن يِنِّي يتَارَّان يخف نْسن ذ اَيثْمَا.

²⁷ خدّْمغ، شَّاثغ تَمَارَا، تْنُوْسغ اَطَّاس ن دْجِيَاڒِي بْڒَا يضص. فُوْذغ دْجُوْزغ، قِّيمغ اَطَّاس ن ثْوَاڒَاثِين بْڒَا لْمَكْلَا. ثْنقّ-اَيِي ثسْمض اَرُّوْض ينُو ذ ؤُقْلِيل.

²⁸ إِيوَا قَاع ثِمسْڒَايِين-أَ أُو عَاذ ذَايِي اَمْنُوْس كُڒ نْهَار عْلَاحْسَاب مَارَّا ثِجُوْمَع ن ڒْمُوْمِنِين.

²⁹ مڒَا شَان يِجّن يضْعف، نش مَا وَار تضْعِيفغ شَا؟ مڒَا شَان يِجّن يتْوَاسُوْفغ زݣ وبْرِيذ، نش مَا وَار ذَايِي يتقّس شَا وُوْڒ ينُو؟

³⁰ مڒَا نش أُو لَابُد اَذ فْتَخَرغ، أَذ فْتَخَرغ س مِين ذَايِي د يسْبيَّانن ضعْفغ.

³¹ ونِّي يتْوَابَرْكن إِ ڒبْدَا يعْنِي أَربِّـي بَابَاس ن سِيذِيثْنغ عِيْسَى، ئِسّن إِلَّا نش قَّارغ لْحَقِيقَا.

³² ذِي ثنْدِينْت ن دِمَشق قَا لْوَالِي ن وزدْجِيذ حَارِث يݣَّا ڒْعَسّث ذِي ثنْدِينْت حمَا اَذَايِي يطّف.

³³ وَلَكِن سهْوَان-اَيِي-د يمحْضَارن ينُو ذݣ يِجّن ن وقْبُوْب س يسغْوَان زݣ يِجّن ن ثْبُوْرْجَات ن صُّوْر ن ثنْدِينْت ڒخْدّنِّي نجْمغ زݣ يفَاسّن نّس.