1 تيموتاوس 2 - ثريفيث 2020

ڒُوْصِيَاث خ لْعِبَادَا

¹ ذ اَمزْوَارُو تْوصِّيغ-كنِّيو اَذ تتَّارم إِ أَربِّـي اَث تدْعِيم اَث طلْبم اَث تْشكَّرم خ مَارَّا يوْذَان

² ذ يزدْجِيذن ذ مَارَّا يِنِّي يحكّْمن بَاش أَ نْعِيشث ذݣ يِجّن ن ڒهْنَا بْڒَا سّْدَع ذݣ يِجّن ن طَّاعَا ن أَربِّـي ذ يِجّن ن لْمَعْقُوْل.

³ مَانَايَا ذ اَصبْحَان يَارْضَا خَاس أَربِّـي إِي ذَانغ د يسْنجْمن،

⁴ يخس مَارَّا يوْذَان اَذ تْوَاسْنجْمن اَذ اَوْضن اَذ سّْنن لْحَقِيقَا.

⁵ لِأَنَّا ذِنِّي يجّن ن أَربِّـي وَاحْذس ذ يِجّن لْوَاسِيط وَاحْذس جَار أَربِّـي ذ يِوْذَان يعْنِي اَرْيَاز-أَ ذ عِيْسَى لْمَسِيح.

⁶ نتَّا يصدّق ثُوْذَارْث نّس ذ يجّن ن لْفِدْيَا بَاش اَزَّايس يسنْجم مَارَّا يوْذَان، مَانَايَا اَذ يتْوَاشْهذ ذِي ڒْوقْث نّس.

⁷ خ مَانَاينِّي إِي تْوَاخْضَرغ نش بَاش اَذ حدّْثغ اَذ يڒِيغ ذ اَرَّسُوْل اَذ يڒِيغ ذ اَمْسڒْمَاذ عْلَاحْسَاب لْإِيمَان ذ ڒْحَقّ جَار يِنِّي وَار يدْجِين شَا زِّي أَيث-إِسْرَائِيل. قَّارغ لْمَعْقُوْل مَاشِي ذ يخَرِّيقن.

⁸ فَلِيهَذَا خْسغ يرْيَازن ذِي مَارَّا يمُوْشَان اَذ ࢲَّادْجن اَذ يْسِين يفَاسّن نْسن يصْفَان غَار وجنَّا بْڒَا مَا ٱذ تْعصّْبن بْڒَا مَا ٱذ تْمنْغَان.

⁹ أَمنِّي عَاوذ خْسغ ثِمْغَارِين اَذَايْسنْت يِيڒِي لْإِحْتِرَام اَذَايْسنْت يِيڒِي ڒحْيَا ذ لْمَعْقُوْل، مَاشِي اَذ قِّيمنْت س وشوَّاف يضْڒق اَطَّاس نِغ س دّْهب ذ جُّوْهَار ذ وَارُّوْض إِي يغْڒَان.

¹⁰ لَّا، أَذ صَارنْت يخف نْسنْت س لْحَسَانَاث إِݣ يدْجَان لَابُد ذِي ثمْغَارِين نِّي يقَّارن قَا نشِّين نْعبّذ أَربِّـي.

¹¹ ثَمْغَارْث أُو لَابُد اَذ تڒْمذ س طَّاعَا ذ ڒْهُدْنث.

¹² نش وَار تجِّيغ شَا ثَمْغَارْث اَذ تْسڒْمذ اَرْيَاز نِغ اَخَاس ثحْكم؛ لَّا، لَابُد اَذ تِيڒِي مْهدْنَا.

¹³ مَايمِّي؟ أَربِّـي يخْڒق-د آدَم ذ اَمزْوَارُو، عَاذ إِي د يخْڒق حَوَّا.

¹⁴ عَاوذ آدَم وَار ث يشْمِيث شَا شِّيطَان، ذ ثَمْغَارْث يتْوَاشمْثن ثعْصَا أَربِّـي.

¹⁵ ثَمْغَارْث اَذ تْوَاسنْجم عْلَاحْسَاب ثَارْوَا وَلَكِن يتْخصَّا وَا لَابُد اَذ قِّيمنْت نِثنْتِي ذِي لْإِيمَان ذ ڒمْحِبّث ذ ڒصْفِيّث عْلَاحْسَاب لْمَعْقُوْل.