1 تيموتاوس 1 - ثريفيث 2020

لْمُقَدِّمَا

¹ نش ذ بُوْلُس ذ اَرَّسُوْل ن عِيْسَى لْمَسِيح س لْأَمَر ن أَربِّـي ونِّي إِي ذَانغ يسنْجَامن ذ عِيْسَى لْمَسِيح نتَّا ذ لْأَمَال نّغ.

² تَارِيغ ثَبْرَات-أَ إِ تِيْمُوْتَاوُس ونِّي إِي يدْجَان اَم ممِّي ذ صَّح ذِي لْإِيمَان. أَكِذش يِيڒِي اَرْضَا ذ اَرَّاحْمث ذ ڒهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.

يِنِّي يسڒْمَاذن يخَرِّيقن وَاهَا

³ نش وَامِي رُوْحغ غَار لْإِقْلِيم ن مَسِدُوْنْيَا وصِّيغ-شك اَذ تقِّيمذ ذِي ثنْدِينْت ن ؤُفَسُوْس بَاش اَذ تنْهِيذ شَان يرْيَازن اَذَاسن ثِينِيذ وَار سڒْمَاذم شَا ثِمسْڒَايِين إِݣ يتْخَلَافن ذِي لْإِيمَان.

⁴ أَذَاسن ثِينِيذ وَار ذفَّارم شَا ثِحُوْجَا نِغ ذ ثَشجَّارْث نِّي وَار يقطِّين شَا خ ڒجْذُوْذ نْوم. ثِمسْڒَايِين-أَ اَم ثِيْنَا غِيڒ تْسجَّاعنْت-اَنغ بَاش أَ نْودَّار ذِي لْأَفْكَار يخْوَان، وَار ذَانغ ثْسِيوِّيْضنْت شَا غَار مِين يتْخطّط أَربِّـي مِينْزِي مِين ذَانغ يسَاوَّاضن غَار أَربِّـي نتَّا ذ لْإِيمَان.

⁵ مِين يعنَا لْغَرَض ن ڒُوْصِيّث-أَ؟ لْغَرَض نّس ذ يجّن ن ڒمْحِبّث إِي د يتَاسن زݣ وُوْڒَاون يصْفَان ذ يِجّن ن ضَّمِير ذ اَصبْحَان ذ يِجّن ن لْإِيمَان بْڒَا نِّفَاق.

⁶ ڒبْعَاض فّْغن زِي ثْمسْڒَايِين-أَ ؤُذْفن ذݣ وَاوَاڒن إِي يخْوَان.

⁷ رزُّوْن اَذ دوْڒن ذ يمْسڒْمَاذن ن شَّرِيعَا، وَلَكِن وَار فهّْمن شَا مِين قَّارن ؤُڒَا ذ مِينْخف تْأَكَّادن اَطَّاس.

⁸ شَّرِيعَا-يَا مڒَا يسْتعْمل-يت بْنَاذم نِيشَان، نشِّين نسّن-يت ذ ثَصبْحَانْت.

⁹ نسّن شَّرِيعَا-يَا عَاوذ وَار د ثخْرِيق شَا إِ يِنِّي يسمْصْڒَاحن اَك أَربِّـي. لَّا، ثخْڒق-د إِ يِنِّي يدْجَان ذ يعفَّانن ذ يِنِّي إِي ذِي ثدْجَا ثْغنَّانْت ذ يِنِّي وَار يذفِّيرن شَا أَربِّـي ذ يِنِّي يعصَّان ذ يِنِّي وَار يصْفِين شَا ذ يِنِّي وَار غَار يدْجِي بُو دِّين ذ يِنِّي ينقّن بَابَاثْسن ذ يمَّاثْسن ذ يِنِّي ينقّن يوْذَان

¹⁰ ذ يِنِّي يتݣّن لْفَسَاد ذ يرْيَازن يفسّْذن اَك وَايَاوْيَا ذ يِنِّي يتَاشَارن يوْذَان حمَا اَثن اَرّن ذ يسمْغَان ذ يِنِّي يقَّارن يخَرِّيقن ذ يِنِّي يشهّْذن ࢲُّوْر نِغ ذ يِنِّي يتݣّن شَان ن ثْمسْڒَايِين نّغْنِي يدْجَان ضد إِ تَّعْلِيم ن لْإِيمَان يدْجَان نِيشَان.

¹¹ تَّعْلِيم-أَ يدْجَان نِيشَان اَث نَاف ذِي لْإِنْجِيل ن أَربِّـي لْعَظِيم إِݣ يتْوَابَرْكن. لْإِنْجِيل-أَ يكلّف-اَيِي-د خَاس نش اَم يِجّن ن لْأَمَنَا.

أَرَّسُوْل بُوْلُس يتْشكَّر سِيذِيثْنغ خ اَرْضَا نّس

¹² تْشكَّرغ سِيذِيثْنغ عِيْسَى لْمَسِيح ونِّي إِي ذَايِي يُوْشِين جّْهذ نّس يُوْفَا ذَايِي تِّقث يسِيذف-اَيِي غَار ڒْخذْمث نّس.

¹³ نش قْبڒ تُوْغَا قَّارغ اَوَاڒن وَار يحْڒِين خ أَربِّـي تْعدَّابغ ڒْمُوْمِنِين، نش ذ يجّن بْنَاذم يضدْجْمن. وَاخَّا تُوْغَا خذْمغ مَانَاينِّي يسظْهَار-اَيِي-د أَربِّـي اَرَّاحْمث نّس لِأَنَّا خذْمغ مَانَاينِّي س ڒقْفَاڒث ينُو بْڒَا مَا ٱذ سّْنغ مِين يدْجَان نِيشَان، ؤُڒ ينُو وَار ذَايس بُو لْإِيمَان.

¹⁴ أَرْضَا ن سِيذِيثْنغ ينْفيّض-د خَافِي س وَاطَّاس ذ وَاطَّاس، أَكِذس يجّن ن لْإِيمَان ذ يِجّن ن ڒمْحِبّث إِݣ يدْجَان ذِي عِيْسَى لْمَسِيح.

¹⁵ أَقَا يجّن ن وَاوَاڒ ذَايس تِّقث أُو لَابُد اَذ يتْوَاقْبڒ مَارَّا، يعْنِي عِيْسَى لْمَسِيح يُوْسَا-د غَار دُّنشْت-أَ بَاش اَذ يسنْجم يِنِّي يعصَّان، زَّايْسن نش إِݣ يدْجَان ذ لْعَاصِي ذ اَمقّْرَان خَاسن مَارَّا.

¹⁶ وَامِي نش ذ لْعَاصِي ذ اَمقّْرَان خَاسن مَارَّا يسظْهَار-اَيِي-د أَربِّـي اَرَّحْمث نّس بَاش عِيْسَى لْمَسِيح اَزَّايِي د يسْمظْهَار مَارَّا صْبَار نّس اَذ يِيڒِي مَانَايَا ذ يجّن ن لْمِثَال إِ يِنِّي إِي زَّايس غَا يَامْنن اَغَارْسن ثِيڒِي ثُوْذَارْث ن ڒبْدَا.

¹⁷ اَزدْجِيذ نّغ اَغَارس ثِيڒِي لْعَظَمَا إِ ڒبْدَا ن ڒبْدَاث، ونِّي عمَّارْص اَذ يفْنَا عمَّارْص اَذ يمّث ونِّي وَار ث يتْوِيڒِي حَدّ ونِّي يدْجَان ذ أَربِّـي وَاحْذس. آمِين.

لْمَسْؤُلِيَا إِݣ يتِيشّ اَرَّسُوْل بُوْلُس إِ تِيمُوْتَاوُس

¹⁸ آ وُلِدِي تِيْمُوْتَاوُس، أَذَاش ؤُشغ لْمَسْؤُلِيَا-يَا ثَانِيتَان عْلَاحْسَاب اَوَاڒن نِّي إِي خَاش نَّان لْأَنْبِيَا زِي قْبڒ بَاش خْمِي خَاسن غَا ثْعقْڒذ اَتَاف اَذ تْمنْغذ مْلِيح اَمنْغِي-يَا اَصبْحَان،

¹⁹ أَتَاف اَغَارش يِيڒِي لْإِيمَان نّش ذ يِجّن ضَّمِير ذ اَصبْحَان. مَاشِي اَم ڒبْعَاضِيث سمْحن ذِي مَانَايَا أُوْشَا لْإِيمَان نْسن يغَرق اَم يِج وغَرَّابُو ذِي ڒبْحَر.

²⁰ زَّايْسن حِمِّيت ذ إِسْكَنْدر، جِّيغ-ثن نش إِ شِّيطَان حمَا اَذ تْوَاربَّان وَار قَّارن شَا اَوَاڒن نِّي وَار يحْڒِين خ أَربِّـي.