1 أيث-سلونيك 3 - ثريفيث 2020

^1-2 إِذن، وَامِي نُوْݣِي أَ نصْبَر عَاذ كْتَار، تُوْغَا نفكَّر حْسن أَ نقِّيم ذِي ثنْدِينْت ن ؤُتِينَا وَاحذْنغ، تِيْمُوْتَاوُس اَثِيذ نسّكّ غَارْوم بَاش اَكنِّيو يسجْهذ اَكنِّيو يشجّع ذِي لْإِيمَان نْوم. نتَّا ذ ؤُمَاثْنغ يخدّم اَكِذْنغ ذِي ڒْخذْمث ن لْإِنْجِيل ن لْمَسِيح.

³ نسّكّ-يث حمَا ؤُڒَا ذ يجّن وَار يترْجِيجِي شَا س ڒمْحَاين-أَ نْوم؛ أَقَا ثسّْنم بلِّي مَانَايَا إِي خَانغ يُوْرِين.

⁴ وَاه، وَامِي تُوْغَانغ اَكِذْوم قْبڒ نقَّار-اَوم قَا ڒمْحَاين اَخَانغ كّنْت. ذ مَانَايَا إِݣ يوقْعن قَا ثسّْنم كنِّيو.

⁵ خ مَانَايَا، وَامِي ؤُݣِيغ اَذ صْبَرغ عَاذ كْتَار، سّكّغ-د غَارْوم تِيْمُوْتَاوُس بَاش اَذ سّْنغ لْإِيمَان نْوم. ݣّْوْذغ ونِّي يتْغَرَّان تُوْغَا يغَرّ-يكنِّيو س يبْرِيذن نّس أُوْشَا مِين تُوْغَا نخْذم جَارَاوم يمْكن يذْوڒ اَخْمِي وَار نݣِّي وَالُو.

⁶ ڒخُّو يذْوڒ-د غَارْنغ زَّايْوم تِيْمُوْتَاوُس، يُوْوِي-يَانغ-د يجّن ن ڒخْبَار ذ اَصبْحَان خ لْإِيمَان نْوم ذ ڒمْحِبّث نْوم. ينَّا-ٱنغ اَقَا تْخمَّامم ذَايْنغ مْلِيح، ذَايْوم عَاوذ مزْڒِي اَذَانغ ثࢲرم ؤُڒَا ذ نشِّين ذَايْنغ مزْڒِي اَكنِّيو نْࢲر.

⁷ خ مَانَايَا آي أَيثْمَا، نشِّين نتْوَاشجّع س لْإِيمَان نْوم وَاخَّا اَقَانغ ذَانِيتَا ذِي ڒمْحَاين ذ يِج وزيَّار.

⁸ ڒخُّو اَقَا نتْعِيش مْلِيح وَامِي تْبدَّام نِيشَان ذݣ وبْرِيذ ن سِيذِيثْنغ.

⁹ مَامّش إِي غَا نݣّ أَ نْشكَّر أَربِّـي خَاوم؟! مشْحَاڒ ن ڒفْڒَاحث إِي غَارْنغ زَّاث إِ أَربِّـي عْلَاحْسَاب كنِّيو!

¹⁰ دْجِيڒث ذ نْهَار نْتتَّار-اَس إِ أَربِّـي س وُوْڒَاون نّغ بَاش اَكنِّيو نْࢲر عَاوذ، أَذَاوم نَرْنِي مِين ينقّْصن ذِي لْإِيمَان نْوم.

¹¹ أَذَانغ يرْزم أَربِّـي بَابَاثْنغ اَبْرِيذ غَارْوم نتَّا س يِيخف نّس اَك سِيذِيثْنغ عِيْسَى.

¹² أَذ يَرْنِي سِيذِيثْنغ ڒمْحِبّث نْوم اَك وَايَاوْيَا اَت يسْفيّض س وَاطَّاس اَك مَارَّا يوْذَان اَم نشِّين نخْس-يكنِّيو.

¹³ أَذَاوم يسجْهذ ؤُڒَاون نْوم بَاش اَذ تِيڒِيم بْڒَا ڒْعِيب اَذ تِيڒِيم مُقدّْسِين زَّاث إِ أَربِّـي بَابَاثْنغ خْمِي د غَا يَاس سِيذِيثْنغ عِيْسَى اَك مَارَّا صَّالِحِين نّس.