1 أيث-سلونيك 2 - ثريفيث 2020

ڒْخذْمث ن اَرَّسُوْل بُوْلُس ذِي ثنْدِينْت ن سَلُوْنِيك

¹ آي أَيثْمَا، كنِّيو س يِيخف نْوم ثسّْنم نّْفَع نِّي إِي د نُوْوِي وَامِي د نُوْسَا غَارْوم.

² ذِي ثنْدِينْت ن فِيلِيپِّـي ثسّْنم بلِّي تْعدَّان خَانغ ذِنِّي تْبُوْصَارن خَانغ. وَلَكِن نشِّين نْزَعم اَكِذْوم، تُوْغَا يتْعَاوَان-اَنغ أَربِّـي بَاش أَ نْبشَّر جَارَاوم س لْإِنْجِيل وَاخَّا شَان يِوْذَان تْعَارَّاضن-اَنغ.

³ أَوَاڒ نّغ إِي زِي نتْوصَّا وَار د يتِيس شَا زݣ وغْذَار نِغ زِي مِين يخنْزن نِغ زِي ثحْرَايْمِيث.

⁴ لَّا، ئِضْبع-اَنغ أَربِّـي يكلّف-اَنغ خ وَاوَاڒن-أَ يدْجَان ذِي لْإِنْجِيل. زِي مَانَايَا نسَّاوَاڒ بَاش اَخَانغ يَارْضَا أَربِّـي مَاشِي اَخَانغ اَرْضَان يِوْذَان مِينْزِي ذ نتَّا إِݣ يدْجَان ذ ونِّي يتْميَّازن مِين غَارْنغ ذݣ وُوْڒَاون نّغ.

⁵ شُوْف، قَا ثسّْنم عمَّارْص مَا نْسڒْهَا حَدّ س وَاوَاڒن نِغ عمَّارْص مَا نضْمع حَدّ عْلَاحْسَاب شَا ن سَّبَاب. ئِشهّذ خَانغ أَربِّـي!

⁶ وَار نخْس شَا يرْيَازن اَذَانغ شهَّارن: لَّا كنِّيو، لَّا شَان يرْيَازن نّغْنِي. نشِّين تُوْغَا نْزمَّر اَخَاوم نْزيَّار س سُّلْطَا نّغ اَم اَرُّسُل.

⁷ وَلَكِن لَّا، نشِّين نْخدّم اَكِذْوم س تَّوَاضُع اَم ثمْغَارْث اَك ثَارْوَا نّس.

⁸ أَمُّو إِي نتْهلَّا ذَايْوم نتْخس-يكنِّيو. نْفَرح وَامِي نْشَرش اَكِذْوم لْإِنْجِيل ذ ثُوْذَارْث نّغ مِينْزِي ثْعِيزَّم خَانغ اَطَّاس.

⁹ آي أَيثْمَا، أَقَا ثْعقْڒم خ ڒْخذْمث نّغ قَا نشِّين نُوْوْثَا خَاس تَمَارَا. وَامِي كنِّيو نتْبشَّار س لْإِنْجِيل ن أَربِّـي، قَا نْخدّم دْجِيڒث ذ نْهَار بَاش وَار نتْبسِّيڒ شَا خ شَان حَدّ زَّايْوم.

¹⁰ نتْعِيش اَكِذْوم كنِّيو إِي يُوْمْنن س يِجّن ن صّْفَا ذ يِجّن ن وبْرِيذ نِيشَان بْڒَا ڒْعِيب. كنِّيو ذ ڒشْهُوْذ خ مَانَايَا ؤُڒَا ذ أَربِّـي.

¹¹ نْتݣّ اَكِذْوم اَم يِجّن ورْيَاز اَك ثَارْوَا نّس. نتْوصَّا-كنِّيو نتْشجَّاع-يكنِّيو نتْزيَّار خَاوم

¹² بَاش اَذ تُوْيُوْرم س يِجّن ن ثِيشْرِي إِي ذَاس يتِيشّن لْقِيمَا إِ أَربِّـي إِݣ يسْذَاهدْج نتَّا يعْنِي ونِّي إِي ذَاوم د يتْڒَاغَان غَار ڒْمُلْك نّس ذ لْعَظَمَا نّس.

¹³ نشِّين نتْشكَّر أَربِّـي خَاوم بْڒَا مَا ٱ نْبدّ وَامِي ثْقبْڒم اَوَاڒ نّس إِي ذَاوم د نْسِيْوض. ثْقبْڒم-ث مَاشِي اَم وَاوَاڒ ن يِوْذَان، ثْقبْڒم-ث اَم وَاوَاڒ ن أَربِّـي نِيشَان. ئِخدّم وَاوَاڒ-أَ عَاوذ ذَايْوم كنِّيو إِي يُوْمْنن.

¹⁴ آي أَيثْمَا، ثْذوْڒم اَم ثْجُمَاع نِّي ن ڒْمُوْمِنِين ن أَربِّـي ذِي عِيْسَى لْمَسِيح ثِنِّي إِي يدْجَان ذِي ثْمُوْرْث ن يَهُوْذِيَا. لِأَنَّا يوْذَان ن ثْمُوْرْث نْوم تْبُوْصَارن خَاوم اَم أَيث-يَهُوْذِيَا تْبُوْصَارن خ ثْجُمَاع ن ڒْمُوْمِنِين إِي ذِنِّي.

^15-16 نِثْنِي نْغِين سِيذِيثْنغ عِيْسَى ذ لْأَنْبِيَا، ؤُڒَا ذ نشِّين سُوْفْغن-اَنغ سّنِّي. وَار خَاسن يَارْضِي شَا أَربِّـي نِثْنِي تْعَارَّاضن إِ مَارَّا يوْذَان، ڒَاحقَّاش وَار ذَانغ تجِّين شَا أَ نسِّيوڒ اَك ڒݣْنُوْس بَاش أَذ نجْمن. أَمنِّي ڒْمُعْصِيَاث نْسن اَرنِّينْت تْعمَّرنْت، لْعِقَاب ن أَربِّـي يوْضَا خَاسن قَاع.

أَرَّسُوْل بُوْلُس ذَايس مزْڒِي اَذ يࢲر ڒْمُوْمِنِين ن أَيث-سَلُوْنِيك

¹⁷ آي أَيثْمَا، تُوْغَا نْغَاب خَاوم شْوَاي ن ڒْوقْث، وَلَكِن ذݣ وُوْڒَاون نّغ وَار خَاوم نْغِيب شَا. ذِي ڒْوقْث نِّي نتْحَوَاڒ اَطَّاس بَاش أَ د نَاس مِينْزِي ذَايْنغ مزْڒِي اَكنِّيو نْࢲر.

¹⁸ مشْحَاڒ ن ثْوَاڒَاثِين نخْس اَغَارْوم د نَاس، نش س يِيخف ينُو عَاوذ، وَلَكِن يتْقَاطع-اَنغ-د شِّيطَان ذݣ وبْرِيذ.

¹⁹ لِأَنَّا ذ كنِّيو إِي يدْجَان ذ لْأَمَال نّغ ذ ڒفْرَاحث نّغ ذ تَّاج نّغ ن شَّان زَّاث إِ سِيذِيثْنغ عِيْسَى خْمِي د غَا يَاس.

²⁰ وَاه، ذ كنِّيو إِي يدْجَان ذ شَّان نّغ ذ ڒفْرَاحث نّغ.