1 بطرس 5 - ثريفيث 2020

ڒُوْصِيَاث غَار يمقّْرَانن ن ثْجُمَاع ن ڒْمُوْمِنِين

¹ فَا نش تْڒَاغِيغ-د خ يمقّْرَانن يدْجَان جَار ن ثْجُمَاع، نش إِي يدْجَان ذ يجّن ن ومقّْرَان اَم كنِّيو ذ يِجّن ن شَّاهذ خ مِين خف يتْوَاعدّب لْمَسِيح، نش ذ يِجّن عَاوذ إِي غَا يشَرْشن ذِي لْعَظَمَا إِي د غَا يمظْهَارن.

² اَروْسث ثْحِيْمرْث نِّي ن أَربِّـي إِي خف كنِّيو يتْكلَّاف نتَّا. حْضَام-تث س ڒْخَاضَر نْوم مَاشِي س يِجّن ن بزّز إِي خَاوم تݣّن مِينْزِي اَمُّو إِي يخس أَربِّـي. مَاشِي س طّْمَع ن ڒفْضِيحث، لَّا س وُوْڒَاون نْوم.

³ مَاشِي اَخَاسن ثْحكْمم س ؤُزِيَّار خ يِنِّي إِي خف تْكلَّافم؛ لَّا، أَذ تِيڒِيم ذ لْمِثَال إِ ثْحِيْمرْث إِي غَا تبْعن.

⁴ خْمِي د غَا يمظْهَار ؤُمكْسَاو اَمقّْرَان اَتَاف اَذ تْقبْڒم يجّن ن تَّاج عمَّارْص اَذ يكْشف.

⁵ آي يحنْجِيرن، كنِّيو طَاعث عَاوذ إِ يِنِّي يدْجَان ذ يمقّْرَانن. سْوجْذث يخف نْوم مَارَّا كنِّيو س يِجّن ن اَرَّاي اَك وَايَاوْيَا وَار ذَايس بُو تَّكبُّر مِينْزِي <أَربِّـي اَقَاث ضد ن يِنِّي يسمْغَارن يخف نْسن، يِنِّي يسمْزَاين يخف نْسن يتِيشّ-اَسن اَرْضَا نّس.>

⁶ إِذن، سمْزَايم يخف نْوم سْوَادَّاي ن ؤُفُوْس يجهْذن ن أَربِّـي، أَكنِّيو يسمْغَار ذِي ڒْوقْث إِي يخس نتَّا.

⁷ مَارَّا يمْنُوْسن جّم-ثن إِ نتَّا مِينْزِي نتَّا يتْهلَّا ذَايْوم.

⁸ أَرّم-د ڒْبَاڒ نْوم، إِڒِيث عْلَابَال. ڒَعْذُو نْوم إِبْڒِيس قَا يتْقيَّاذ-كنِّيو اَم سّْبَاع يتْهِيرِّيو يرزُّو خ ونِّي إِي غَا يسغْڒِي.

⁹ عَرّْضم-اَس إِ إِبْڒِيس، بدّم نِيْشَان خ دْسَاس ن لْإِيمَان نْوم مِينْزِي ثسّْنم بلِّي أَيثْمَاثْوم ذِي مَارَّا دُّنشْت-أَ اَقَا تْوَاعدَّابن اَم كنِّيو.

¹⁰ أَتَاف اَذ تْوَاعدّْبم شْوَايْت ن ڒْوقْث ڒخْدّنِّي اَكنِّيو يسْريّح أَربِّـي نّغ إِي ذِي يدْجَا مَارَّا اَرْضَا ذ نتَّا إِي ذَاوم د يڒَاغَان غَار لْعَظَمَا نّس وَار يفنِّين شَا ذِي لْمَسِيح. أَكنِّيو يسْبدّ، أَكنِّيو يسجْهذ، أَكنِّيو يݣّ خ دْسَاس.

¹¹ أَغَارس يِيڒِي ڒحْكَام إِ ڒبْدَا ن ڒبْدَاث. آمِين.

لْخِتَام ن ثبْرَات-أَ

¹² ؤُرِيغ-اَوم-د ثَبْرَات-أَ ثَمزْيَانْت خ ؤُفُوْس ن سِيْلْوَان حسّْبغ-ث نش اَم ؤُمَاثْنغ ذَايس تِّقث. تْشجَّاعغ-كنِّيو، شهّْذغ مِين قَّارغ مَانَايَا ذ اَرْضَا ن أَربِّـي ذ صَّح. بدّم ذَايس نِيْشَان.

¹³ ثْسَاوَّاض-اَوم-د سْڒَام جْمَاعث إِي يدْجَان ذِي ثنْدِينْت ن بَابِل، نِثْنِي تْوَاخْضَرن اَم كنِّيو. وَاخَّا ؤُڒَا ذ مَرْقُس يسَاوَّاض-اَوم-د سْڒَام ونِّي يدْجَان اَم ممِّي.

¹⁴ تْسدْجَامث خ وَايَاوْيَا س يِجّن ن سْڒَام ن ثمْعَشَارْث. أَغَارْوم يِيڒِي ڒهْنَا إِ مَارَّا كنِّيو إِي يدْجَان ذِي لْمَسِيح.