1 بطرس 4 - ثريفيث 2020

اَرنِّيث ذِي لْإِيمَان نْوم

¹ فَا عِيْسَى لْمَسِيح يتْوَاعدّب ذِي دَّات نّس. خ مَانَايَا عَاوذ كنِّيو اَذ تسْجهْذم يخف نْوم س اَرَّاي نِّي نّس. مَايمِّي؟ مڒَا ثتْوَاعدّْبم ذِي دَّات نْوم، صَافِي ثْبعّْذم عَاوذ خ ڒْمُعْصِيّث.

² خ مَانَايَا نْهُوْرَاث نِّي إِي ذَاوم يتْغِيمَان ذِي دَّات نْوم مَاشِي اَثن ثْسعْذُوْم عْلَاحْسَاب شّهَاوَاث ن بْنَاذم؛ لَّا، سعْذُوْم-ثن عْلَاحْسَاب ڒْخَاضَر ن أَربِّـي.

³ إِيوَا صَافِي، ثجِّيْوْنم زِي مِين تُوْغَا تْعِيشم عْلَاحْسَاب مِين رزُّوْن اَذ ݣّن لْكُفَّار يعْنِي ڒقْبَاحث ذ شّهَاوَاث ثِعفَّانِين ذ وَاطَّاس ن شّْرب ذ لْفَسَاد ذ زّْهُو ذ لْعِبَادَا ن لْأَصْنَام يعِيفّن.

⁴ تْعجِّيبن نِثْنِي يعْنِي مڒَا كنِّيو وَار كِذْسن تِيْذْفم شَا ذِي لْفَيَضَان ن ؤُفلّس-أَ اَذ قِّيمن عَاوذ تْزَوَّارن-كنِّيو.

⁵ وَلَكِن لْحِسَاب نْسن اَث يݣّ ونِّي يوجّْذن اَذ يحَاسب يِنِّي يدَّرن ذ يِنِّي يمُّوْثن.

⁶ خ سَّبَاب-أَ تْوَابشَّرن س لْإِنْجِيل ؤُڒَا ذ يمتِّينن. مُّوْثن مَامّش تْمتَّان يِوْذَان مَارَّا، وَلَكِن نِثْنِي اَذ دَّرن س أَرُّوْح نْسن عْلَاحْسَاب لْغَرَض ن أَربِّـي.

ڒْمُوْمِنِين أُو لَابُد اَذ سْتعْمَالن لْقُدْرَاث نْسن

⁷ أَقَا يُوْسَا-د ونݣَّارُو ن مَارَّا ثِمسْڒَايِين. إِذن يتْخصَّا اَذ د تَارّم ڒْبَاڒ نْوم اَغَارْوم يِيڒِي ڒَعْقڒ نْوم بَاش اَتَاف اَذ تْزمَّرم اَذ تْࢲَادْجم.

⁸ مِين يدْجَان مُهِم قَاع؟ ئِتْخصَّا اَذ تْحِبّم اَيَاوْيَا زݣ وُوْڒ مِينْزِي ڒمْحِبّث ثْقطَّا خ وَاطَّاس ن دُّنُوْب.

⁹ لَابُد اَذ تْرحّْبم زݣ وَايَاوْيَا اَم ينوْجِيون بْڒَا مَا ٱذ تْشثْشَام.

¹⁰ ئِتْخصَّا-يَاس إِ مْكُڒ يجّن اَذ يسخْذم لْقُدْرَا نِّي إِي ذَاس يمُّوْشن اَك يِوْذَان. أَذ يسخْذم نِيْشَان لْبَرَكَا ن أَربِّـي إِي زِي يتْكلَّاف كُڒ نُّوْع نّس.

¹¹ ونِّي ؤُمِي يمُّوْش اَذ يسِّيوڒ يتْخصَّا-يَاس اَذ يسِّيوڒ اَم ونِّي يسَّاوَاڒن اَوَاڒن ن أَربِّـي. ونِّي ؤُمِي يمُّوْش اَذ يخْذم يتْخصَّا-يَاس اَذ يخْذم اَم ونِّي يخدّْمن س جّْهذ إِݣ يتِيشّ أَربِّـي. حمَا س مَارَّا ثِمسْڒَايِين-أَ اَذ يتْوَاحْمذ أَربِّـي س وفُوْس ن عِيْسَى لْمَسِيح. أَغَارس ثِيڒِي لْعَظَمَا ذ ڒحْكَام إِ ڒبْدَا ن ڒبْدَاث. آمِين.

ڒْمِحْنث ن ونِّي ييُوْمْنن س لْمَسِيح

¹² آي يمْعِيزّن ينُو، وَار تْعجِّيبم شَا عْلَاحْسَاب ڒْمِحْنث-أَ إِي خَاوم د يوْضَان اَم ثْمسِّي بَاش اَكنِّيو ثْجَرّب. وَار تْفكَّرث شَا بلِّي مَانَايَا عَاجِب.

¹³ لَّا، ئِتخصَّا كنِّيو اَذ تْفَرْحم وَامِي ثْشَرّْشم ذݣ وعدّب ن لْمَسِيح بَاش اَذ تْفَرْحم عَاوذ اَطَّاس خْمِي د غَا ثْمظْهَار لْعَظَمَا نّس.

¹⁴ مڒَا يوْذَان تُوْكَّارن-كنِّيو عْلَاحْسَاب يسم ن لْمَسِيح اَتَاف سَّعْذ نْوم، مِينْزِي أَرُّوْح ن لْعَظَمَا ذ أَرُّوْح ن أَربِّـي يمَارْس-د خَاوم.

¹⁵ حْضَام اَكِذْوم يِيڒِي يجّن جَارَاوم إِݣ يتْوَاعدَّابن مِينْزِي ينْغَا بْنَاذم نِغ يُوْشَار نِغ ذ لْمُجْرِيم نِغ يتَاذف ذِي شّْغُوْڒَاث ن مِدّن.

¹⁶ إِنَّمَا، مڒَا شَان يجّن يتْوَاعدَّاب ڒَاحقَّاش نتَّا ذ اَمَسِيحِي يتْخصَّا-ٱس وَار يتْسذْحِي شَا، أُو لَابُد اَذ يسمْغَار أَربِّـي ڒَاحقَّاش ييْسِي-د يسم نّس.

¹⁷ أَقَا ثُوْوض-د ڒْوقْث بَاش اَذ يبْذَا لْحِسَاب جَار اَيثْبَاب ن ثدَّارْث ن أَربِّـي. مڒَا اَذ يبْذَا لْحِسَاب-أَ جَارَانغ مِين غَا يوقْعن إِ يِنِّي وَار يتْطِيعِين شَا إِ لْإِنْجِيل ن أَربِّـي؟

¹⁸ أَقَا يقَّار: <مڒَا يقْسح اَذ ينْجم شَان يِجّن زݣ يِنِّي يدْجَان نِيْشَان، مَامش غَا ݣّن يِنِّي يعصَّان، ذ يِنِّي وَار يتْطِيعِين شَا إِ أَربِّـي؟>

¹⁹ فَالِيهَذَا يِنِّي يتْوَاعدَّابن س اَرَّاي ن أَربِّـي، ئِتْخصَّا-يَاسن اَذ سلّْمن ڒَعْمَار نْسن ذݣ يفَاسّن ن لْخَالِق نْسن نتَّا إِي ذِي ثدْجَا تِّقث، أَذ قِّيمن تݣّن مِين يدْجَان ذ اَصبْحَان.