1 بطرس 3 - ثريفيث 2020

ڒُوْصِيَاث عْلَاحْسَاب يرْيَازن ذ ثمْغَارِين نْسن

¹ آ ثِمْغَارِين، أَمنِّي عَاوذ يتْخصَّا اَذ طَاعنْت إِ يرْيَازن نْكنْت. حمَا يِنِّي وَار يتݣّن شَا اَرَّاي إِ وَاوَاڒ ن أَربِّـي اَتَاف ثِمْغَارِين نْسن اَثن د اَرّنْت غَار ڒْمُوْمِنِين بْڒَا مَا ٱكِذْسن سِّيوْڒنْت س وَاوَاڒ غِير س ثِيْشْرِي نْسنْت أُو صَافِي.

² يِـيْنَا غِير اَذ ࢲرّن ثِيْشْرِي نْكنْت ثصْفَا تْسذْحَانْت زَّايْسن اَتَاف اَذ اَمْنن.

³ زِّين نْكنْت مَاشِي ذ لْمُهِم غَار بَارَّا يعْنِي اَذ تْمُوْذنْت يشوَّافن نِغ اَذ تݣّنْت ثِسنْسْڒِين ذ ثمْقيَّاسِين ن دّْهب نِغ ذ اَرُّوْض إِي يغْڒَان.

⁴ لَّا، زِّين نْكنْت يتْخصَّا اَذ يِيڒِي غَار ذَاخڒ نْكنْت يعْنِي زِّين نِّي يتِيڒِين ينُوْفَّر ذݣ وُوْڒ. زِّين-أَ وَار يفنِّي شَا عمَّارْص، غَارس اَرُّوْح مْهدّن ذَايس تَّوَاضُع ذ يِجّن ن شَّان ذ اَمقّْرَان زَّاث إِ ثِيطَّاوِين ن أَربِّـي.

⁵ أَمُّو إِي تُوْغَا يدْجَا زِّين ن لَالَّاث ن زْمَان سْرُوْسَانْت لْأَمَال نْسنْت ذِي أَربِّـي. تْطَاعَانْت إِ يرْيَازن نْسنْت،

⁶ أَم سَارَا تُوْغَا يتݣّن اَرَّاي إِ ورْيَاز نّس بْرَاهِيم تْڒَاغَا-يَاس<آ سِيذِي.> كنِّينْت اَذ تِيڒِينْت اَم يِسِّيس يعْنِي مڒَا تݣّنْت ڒْخِير وَار تݣّْوْذنْت شَا زِي مِين يسَاݣّْوَاذن.

⁷ آي يرْيَازن، أَمنِّي يتْخصَّا-يَاوم اَذ تݣّم عَاوذ، أَذ تْعِيشم اَك ثمْغَارِين نْوم س يِجّن ن ڒفْهَامث جَارَاوم. ؤُشم-اَس لْقِيمَا إِ ثمْغَارْث يدْجَان نتَّاث اَم ثْغرَّافْث يتْرزَّان ذغْيَا مِينْزِي ذ نِثنْتِي يتْوَارَّاثن اَكِذْوم لْبَرَكَا ن ثُوْذَارْث. حمَا وَار ذِنِّي تِيڒِي بُو شَان ن ڒْحَاجث اَذ ترز ثْࢲَادْجِيث نْوم.

ونِّي يتْوَاعدَّابن خ سَّبَاب ن ڒْحَقّ إِݣ يتݣّ

⁸ لْمُهِيم، ئِتْخصَّا-كنِّيو مَارَّا إِذْوم ڒَعْقُوْڒَاث نْوم اَذ يڒِين ذ يجّن، أَذ تسْحِيسّم اَك وَايَاوْيَا، أَغَارْوم ثِيڒِي يِجّن ن ڒمْحِبّث ن وَاوْمَاثن، أَذ تْحِينّم ذݣ وَايَاوْيَا، وَار ذَايْوم يتِيڒِي بُو تَّكبُّر.

⁹ وَار تَارَّاث شَا شَّرّْ س شَّرّْ نّغْنِي نِغ ڒْعِيب س ڒْعِيب نّغْنِي. لَّا، بَرْكث ينّغْنِي، مَايمِّي؟ مِينْزِي يڒَاغَا-د خَاوم إِ مَانَايَا بَاش اَذ تْخَاڒْسم س يِجّن ن لْبَرَكَا.

¹⁰ لِأَنَّا يقَّار: <ونِّي يرزُّوْن اَذ يحِبّ ثُوْذَارْث نّس، نِغ يخس عَاوذ اَذ يࢲر ؤُسَّان ذ يصبْحَانن، أَو لَابُد اَذ يحْضَا يڒس نّس زِي شَّرّْ، ذ ؤُقمُّوْم نّس زݣ وَاوَاڒ ن ثحْڒَايْمِيث.

¹¹ ئِتْخصَّا اَذ يݣّْوج خ شَّرّْ اَذ يݣّ ڒْخِير، أَذ يرْزُو خ سَّلَام اَث يذْفَار.

¹² أَقَا ثِيطَّاوِين ن سِيذِي أَربِّـي خزَّرنْت صَّالِحِين، ئِمجَّان نّس نُوْرْزْمن إِ ثْࢲَادْجِيث نْسن. مَاشَا ؤُذم ن سِيذِي أَربِّـي، يَارَّا اَعْرُوْر غَار يِنِّي يتݣّن شَّرّْ.>

¹³ إِيوَا مڒَا ثْحَاوْڒم اَذ تݣّم ڒْخِير، مِين يعْنَا ونِّي إِي كنِّيو غَا يضَرّن؟

¹⁴ وَلَكِن وَاخَّا ثتْوَاعدّْبم مڒَا ثݣِّيم ڒْحَقّ، أَذ يِيڒِي ذ سَّعْذ نْوم. وَار تݣّْوْذم شَا زݣ يِوْذَان، وَار ثن تجَّام شَا اَكنِّيو سْذهْشن.

¹⁵ لَّا، سمْغَارث لْمَسِيح ذݣ وُوْڒَاون نْوم اَرّم-ث ذ سِيذِيثْوم. إِڒِيث ڒبْدَا ثْوجْذم بَاش اَذ تْدَافْعم خ يِيخف نْوم اَذ تْجَاوْبم ونِّي يرزُّوْن خ سَّبَاب ن لْأَمَال إِي ذَايْوم. وَلَكِن جَاوْبم-ث س يِجّن ن تَّوَاضُع ذ لْإِحْتِرَام

¹⁶ ذ يِجّن ن ضَّمِير مرْتَاح. أَمُّو يِنِّي خَاوم يقَّارن ڒْبَاطڒ اَتَاف اَذ سذْحَان س ثِيْشْرِي نْوم ثَصبْحَانْت إِي خَاوم تْعيَّابن نِثْنِي.

لْمَسِيح يمُّوْث عْلَاحْسَاب يِنِّي يعصَّان

¹⁷ شُوْف، مڒَا يخس أَربِّـي اَتَاف حْسن اَذ تْوَاعدَّابم عْلَاحْسَاب ڒْخِير إِي تݣّم مَاشِي عْلَاحْسَاب شَّرّْ.

¹⁸ أَمنِّي إِݣ يݣَّا لْمَسِيح وَامِي يتْوَاعدّب يجّن ن تْوَاڒَا إِ ڒبْدَا عْلَاحْسَاب ڒْمُعْصِيَاث. يعْنِي ونِّي يدْجَان نِيْشَان يتْوَاعدّب ذݣ ومْشَان ن يِنِّي يعصَّان حمَا اَكنِّيو يسِّيوض غَار أَربِّـي. دَّات نّس نْغِين-تث، ئِسدَّر-يت-يد أَرُّوْح يقدّْسن.

¹⁹ س أَرُّوْح-أَ إِي زِي يرُوْح بَاش اَذ يبشَّر اَرُّوْحَاث ن يِوْذَان نِّي يتْوَاحبّْسن.

²⁰ مَايمِّي؟ لِأَنَّا مشْحَاڒ زݣ وَامِي ذِي زْمَان ن نُوْح ؤُݣِين يِوْذَان-أَ اَذ ݣّن اَرَّاي إِ أَربِّـي وَامِي ثن تُوْغَا يتْرَاجَا س صّْبَر يتْصنَّاع اَغَرَّابُو ن نُوْح. ذݣ وغرَّابُو-يَا ذْرُوْسْت ن يِوْذَان ثْمنْيَا وَاهَا كِّين خ وَامَان نِّي نجْمن.

²¹ أَمَان-أَ نِثْنِي ذ يجّن لْمِثَال خ طَّهَارث نّغ ن وَامَان إِي كنِّيو يسنْجَامن ڒخُّو. مَاشِي اَذ يتْوَاكّس ڒوْسخ زِي دَّات نّغ؛ لَّا، طَّهَارث-أَ نتَّاث ذ يجّن ن ؤُڒَاغِي نْوم إِ أَربِّـي بَاش اَذَاوم د يُوْش يجّن ن ضَّمِير مرْتَاح. مَانَايَا خ سَّبَاب ن عِيْسَى لْمَسِيح وَامِي د يكَّر زِي ڒْموْث.

²² ذ نتَّا يݣَعّْذن غَار وجنَّا اَقَاث خ وفُوْسِي ن أَربِّـي، يَارَّا لْمَلَائِيكَاث سْوَادَّاي ن لْحُكم نّس ذ يِنِّي يحكّْمن ذ يِنِّي يجهْذن.