1 بطرس 2 - ثريفيث 2020

ئِجّن ن وزْرُو يدَّرن ذ يِجّن ن شَّعْب اَمْقدّس

¹ إِذن فَا كّْسث زݣ وُوْرَاون نْوم مَارَّا شَّرّْ ذ مَارَّا لْغذْرَان ذ نِّفَاق ذ ڒحْسذ ذ مَارَّا ڒْبَاطڒ.

² إِڒِيث اَم يحْضِيضن، سْغُوْيِوث خ ؤُغِي نِّي يصْفَان ن أَرُّوْح يقدّْسن بَاش اَزَّايس ثمْغَرم ذِي لْإِيمَان نْوم إِݣ يسنْجَامن.

³ أَقَا ثقَّاسم سِيذِيثْنغ نتَّا مشْحَاڒ ذ اَصبْحَان.

⁴ خْمِي غَارس د ثْقَارَّابم غَار نتَّا إِي يدْجَان ذ اَزْرُو نِّي يدَّرن عِيفّن-ث يرْيَازن وَلَكِن أَربِّـي يخْضَر-يث يعِيزّ خَاس،

⁵ ؤُڒَا ذ كنِّيو عَاوذ اَم شَا ن يِزْرَا يدَّرن زَّايْوم إِي ثْبنَّا يجّن ن ثدَّارْث ن أَرُّوْح يقدّْسن. حمَا اَذ تِيڒِيم كنِّيو ذ يجّن ن جْمَاعث ن ڒْفُقَهَا صَّالِحِين، تْقدَّامم دْبِيحَاث رُّوْحِيَاث يَارْضَا خَاسنْت أَربِّـي س وفُوْس ن عِيْسَى لْمَسِيح.

⁶ قَا مَانَايَا إِݣ يقَّار لْكِتَاب: <أَقَا خْضَرغ يج ن وزْرُو، سْرُوْسِيغ-ث خ وذْرَار ن لْقُدْس. نتَّا يسوَّا اَطَّاس، ݣِّيغ-ث ذِي ثْغمَّارْث ن دْسَاس. ونِّي إِي زَّايس غَا يَامْنن وَار يندّم شَا.>

⁷ فَا اَزْرُو-يَا يسوَّا اَطَّاس إِ كنِّيو إِي يُوْمْنن، يِنِّي وَار يُوْمِينن شَا لَّا. أَقَا يُوْرَا ذِي لْكِتَاب: <أَزْرُو نِّي إِي عِيفّن ئِبنَّاين، يوْقع ذݣ ومْشَان اَصبْحَان ذِي ثْغمَّارْث ن دْسَاس.>

⁸ أُو عَاوذ يقَّار: <ئِج ن تِّيرْشث إِي ذِي تنْقْڒَاضن يِوْذَان، ذ يجّن ن وزْرُو إِي ثن يغطّْڒن.> قَا تنْقْڒَاضن ذَايس مِينْزِي عصَّان اَوَاڒ نّس، أَمنِّي إِي خَاسن يُوْرَا.

⁹ فَا كنِّيو ذ يجّن ن شَّعْب يتْوَاخْضَرن ذ يجّن ن جْمَاعث ن ڒْفُقَهَا ن وزدْجِيذ ذ يجّن ن ڒْݣنْس ذ اَمْقدّس ذ يِوْذَان نِثْنِي بَابْ نْسن ذ أَربِّـي بَاش اَذ تْبشَّارم س ثْمسْڒَايِين ثِصبْحَانِين ن ونِّي إِي كنِّيو يسُّوْفْغن زݣ يِجّن ن ثَادْجسْت يَارِّي-كنِّيو-د غَار نُّوْر نّس عَاجِب.

¹⁰ تُوْغَا كنِّيو ذݣ يِجّن ن ڒْوقْث مَاشِي ذ ڒْݣنْس، ڒخُّو كنِّيو ثْذوْڒم ذ شَّعْب ن أَربِّـي. تُوْغَا ذݣ يِجّن ن ڒْوقْث وَار ثسِّينم شَا اَرَّاحْمث ن أَربِّـي، ڒخُّو ثسّْنم اَرَّاحْمث نّس.

¹¹ آي يمْعِيزّن ينُو، نش قَّارغ-اَوم إِ كنِّيو إِي يدْجَان ذ يعزَّابن ذ يبَرَّانِيْين ذِي دُّنشْت-أَ، بعّْذث زِي شّهَاوَاث نِّي ثِعفَّانِين إِي كنِّيو يتْحَارَابن ضد ن ڒَعْمَار نْوم.

¹² عِيْشث س لْمَعْقُوْل جَار ڒݣْـنُوْس. مڒَا تَهَامن-كنِّيو خ شَان ڒْحَاجث ذ ثَعفَّانْت أُوْشَا نِثْنِي ࢲرّن لْحَسَانَاث نْوم اَتَاف اَذ حمْذن أَربِّـي ذِي نْهَار نِّي إِي خَاسن د غَا يخْضڒ.

طَاعث إِ يِنِّي خَاوم يتحْكَامن

¹³ خ سَّبَاب ن سِيذِيثْنغ طَاعث إِ كُڒ لْحَاكم ؤُمِي يمُّوْش ڒْحَقّ نِيْشَان اَذ يحْكم. وَاخَّا نتَّا ذ اَزدْجِيذ يتحْكَامن خ مَارَّا،

¹⁴ نِغ ذ لْحُكَّام إِي د يسّكّ وزدْجِيذ اَذ عَاقْبن يِنِّي يتݣّن شَّرّْ اَذ تْشكَّرن يِنِّي يتݣّن مِين يدْجَان ذ اَصبْحَان.

¹⁵ لِأَنَّا مَانَايَا ذ ڒْخَاضَر ن أَربِّـي يعْنِي مڒَا ثݣِّيم مِين يدْجَان ذ اَصبْحَان اَتَاف اَذ تقْضَام خ وَاوَاڒن يجَهْڒن ن يرْيَازن نِّي إِي ذِي ثدْجَا ثُوْبُّوْهْڒِيَا أُو صَافِي.

¹⁶ عِيْشث اَم يِوْذَان إِي غَار ثدْجَا لْحُرِّيَا وَلَكِن وَار سْتعْمَالث شَا لْحُرِّيَا-يَا نْوم بَاش اَذ تسْنُوْفَّرم شَّرّْ نْوم؛ لَّا، ئِتْخصَّا اَذ تْعِيْشم اَم يخدَّامن ن أَربِّـي.

¹⁷ وقَّارث مَارَّا يوْذَان. سْعِيزّث اَيثْمَاثْوم. ݣّْوْذث زِي أَربِّـي. وقَّارث اَزدْجِيذ.

قبّْڒث اَعدّب عْلَاحْسَاب لْمَسِيح

¹⁸ آي يخدَّامن، طَاعث إِ اَيثْبَاب نْوم س لْإِحْتِرَام مَارَّا. مَاشِي غِير إِ يِنِّي يدْجَان ذ يصبْحَانن ذَايْسن تَّوَاضُع؛ لَّا، حتَّا ذ يِنِّي يقسْحن.

¹⁹ شُوْف، مڒَا يجّن يطَاع إِ أَربِّـي يصْبَر إِ وعدّب نتَّا وَار يسْذِيهدْج شَا تَمَارَا نِّي، مَا ذَايس شَان ن شُّكر؟ وَاه، ذَايس شُّكر.

²⁰ وَلَكِن مڒَا ثعْصَام ثشِّيم خَاس اَعْمُوْذ ثصْبَرم خ مَانَاينِّي، مَا ذَايس شَان ن شُّكر؟ لَّا، وَالُو. مڒَا ثݣِّيم ڒْخِير ثتْوَاعدّْبم خَاس ثصْبَرم خَاس، أَتَاف مَانَايَا وَاه ذَايس يجّن ن شُّكر ذ اَمقّْرَان زَّاث إِ أَربِّـي.

²¹ ئِڒَاغَا-يَاوم-د أَربِّـي غَار مَانَايَا مِينْزِي لْمَسِيح يتْوَاعدّب عْلَاحْسَاب كنِّيو؛ ئِجَّا-ٱوم-د يجّن ن لْمِثَال اَث تْذفَّرم ذݣ يسُوْرِيفن نّس.

²² نتَّا وَار يݣِّي ؤُڒَا ذ يجّن ن ڒْمُعْصِيّث، وَار ذَاس د يكِّي ؤُڒَا ذ يج وخَرِّيق زݣ وقمُّوْم نّس.

²³ وَامِي تُوْغَا خَاس تْبُوْصَارن، نتَّا وَار خَاسن د يَارِّي شَا اَبُوْصَار نْسن. وَامِي تُوْغَا ث تْعدَّابن، نتَّا وَار ثن يهدّذ شَا؛ لَّا، نتَّا يسلّم يخف نّس ذݣ يفَاسّن ن ونِّي يتحْكَامن نِيْشَان.

²⁴ نتَّا س يِيخف نّس ييْسِي ڒْمُعْصِيَاث نّغ ذِي دَّات نّس خ ثحْنَاشْت نِّي حمَا أَ نمّث نشِّين س وُوْڒَاون نّغ إِ ڒْمُعْصِيَاث، أَ ندَّر إِ مِين يدْجَان نِيْشَان. أَقَا س وجَرِّيح نّس إِي زِي ثْݣنْفَام كنِّيو.

²⁵ تُوْغَا كنِّيو اَم يحُوْڒِيْين يتْودَّرن، ڒخُّو ثْذوْڒم-د غَار ونِّي إِي كنِّيو يرَاسّن يتْكلَّافن زِي ڒَعْمَار نْوم.