1 بطرس 1 - ثريفيث 2020

لْمُقَدِّمَا

¹ نش ذ بُطْرُس ذ اَرَّسُوْل ن عِيْسَى لْمَسِيح. تْسكِّيغ-د ثَبْرَات-أَ إِ يِنِّي إِݣ يخْضَر أَربِّـي إِي يدْجَان ذ يعزَّابن يتمْزدْجَاعن ذِي لْإِقْلِيم ن پُـنْطُس ذ لْإِقْلِيم ن ݣَلَاطْيَا ذ لْإِقْلِيم ن كَفَدُوْسْيَا ذ لْإِقْلِيم ن آسْيَا ذ لْإِقْلِيم ن بِـيْثَانْيَا.

² أَربِّـي بَابَاثْنغ يخْضَر-يكنِّيو عْلَاحْسَاب مَامّش تُوْغَا يسّن نتَّا زِي قْبڒ، ئِسِّيصْفَا-كنِّيو س يِجّن ن ڒْخذْمث ن أَرُّوْح يقدّْسن حمَا اَذ تْطَاعم إِ عِيْسَى لْمَسِيح اَذ تْوَارُوْشّم س يذَامّن نّس إِي يُوْزّْڒن. أَذَايْوم يمَارْنِي اَرْضَا ذ ڒهْنَا س وَاطَّاس.

نتْوَاخْڒق-د ذ جْذِيذ غَار يِجّن ن لْأَمَال يدَّرن

³ أَذ يتْوَابَرك أَربِّـي، بَابَاس ن سِيذِيثْنغ عِيْسَى لْمَسِيح إِي ذَانغ يُوْشِين س اَرَّاحْمث نّس ثَمقّْرَانْت اَد نخْڒق ذ جْذِيذ غَار يِجّن ن لْأَمَال يدَّرن وَامِي د يسكَّر عِيْسَى لْمَسِيح زݣ يمتِّينن.

⁴ حمَا أَ نْوَارث يجّن ن وَاݣْڒَا عمَّارْص اَذ يفْنَا عمَّارْص اَذ يخْسَر عمَّارْص اَذ يكْشف ونِّي إِي ذَاوم يتْوَاخمّْڒن ذݣ وجنَّا.

⁵ عْلَاحْسَاب لْإِيمَان نْوم أَربِّـي يحطَّا-كنِّيو س ثْزمَّار نّس غَار يِجّن ن وسنْجم إِݣ يسوْجذ نتَّا اَثِيذ يسْمظْهَار ذِي نْهَار اَنݣَّارُو.

⁶ س وسنْجم-أَ كنِّيو ثْفَرّْحم وَاخَّا ڒبْعَاض زَّايْوم تْوَاعدَّابن ڒخُّو ذِي ڒمْحَاين شْوِيت ن ڒْوقْث.

⁷ ڒمْحَاين-أَ ؤُسِينْت-يد بَاش اَذ د سْمظْهَارنْت إِلَّا لْإِيمَان نْوم نتَّا اَقَاث ذ صَّح؛ نتَّا يسوَّا كْتَار زِي دّْهب إِݣ يفنَّان وَاخَّا يتْوَاسِّيصْفَا ذِي ثْمسِّي. حمَا لْإِيمَان نْوم اَث شكَّرن اَذَايس يِيڒِي شَّان ذ لْقِيمَا خْمِي د غَا يمظْهَار عِيْسَى لْمَسِيح.

⁸ ثْحِبّم-ث وَاخَّا وَار ث ثࢲْرِيم شَا. أَقَا ثُوْمْنم زَّايس وَاخَّا وَار ث تْوِيڒِيم شَا ڒخُّو. كنِّيو ثْعمَّرم س يِجّن ن ڒفْرَاحث ذ ثَمقّْرَانْت وَار ثْزمَّرم شَا اَت ثْشَرّْحم.

⁹ أَقَا كنِّيو ثْقبّْڒم لْغَرَض ن لْإِيمَان نْوم يعْنِي اَذ ينْجم ڒَعْمَار نْوم.

لْأَنْبِيَا تُوْغَا سْڒَان خ لْمَسِيح

¹⁰ خ وسنْجم-أَ وَانِيتَا سِّيوْڒن خَاس لْأَنْبِيَا، يعْنِي اَرْضَا نِّي إِي تُوْغَا ذَاوم د غَا يمظْهَارن. نِثْنِي رزُّوْن خَاس مْلِيح تْفتَّاشن خَاس اَطَّاس.

¹¹ تُوْغَا رزُّوْن خَاس بَاش اَذ سّْنن مڒْمِي د غَا يمظْهَار وسنْجم-أَ ذ ظُّرُوْف نّس. رزُّوْن اَذ سّْنن مِينْخف يسَّاوَاڒ أَرُّوْح ن لْمَسِيح إِي يدْجَان ذَايْسن وَامِي أَرُّوْح-أَ يعْڒم-اَسن زِي قْبڒ مشْحَاڒ إِي غَا يتْوَاعدّب لْمَسِيح، سّنِّي مشْحَاڒ إِي غَا يتْوَاسمْغَار منْبَعْد.

¹² ئِسْمظْهَار-اَسن-د إِ لْأَنْبِيَا بلِّي مَانَايَا وَار ث خدّْمن شَا إِ يِيخف نْسن، خدّْمن-ث إِ كنِّيو وَامِي سَّاوَاڒن س ثْمسْڒَايِين-أَ. أُو ڒخُّو نَّان-اَوم ثِمسْڒَايِين-أَ يِنِّي إِ كنِّيو يتْبشَّارن س لْإِنْجِيل س جّْهذ ن أَرُّوْح يقدّْسن إِي ذَاوم د يتْوَاسّكّن زݣ وجنَّا. وَاخَّا ذ لْمَلَائِكَاث ذَايْسنْت مزْڒِي اَذ خْزَرنْت ذِي ثْمسْڒَايِين-أَ.

ئِذَامّن ن لْمَسِيح إِي ذَانغ يسنْجَامن زِي دُّنشْت-أَ

¹³ إِذن، سْوجْذم ڒَعْقُوْرَاث نْوم بَاش اَذ تْخذْمم. أَرّم-د ڒْبَاڒ نْوم. ݣّم لْأَمَال نْوم غِير ذِي اَرْضَا ن وسنْجم نِّي إِي ذَاوم د غَا يمُّوْشن خْمِي د غَا يمظْهَار عِيْسَى لْمَسِيح.

¹⁴ إِڒِيم اَم ثَارْوَا يتْطَاعَان، وَار ذفَّارث شَا شّهَاوَاث نِّي ثِعفَّانِين ثِنِّي إِي ذِي تُوْغَا تْعِيشم ذِي ڒقْفَاڒث نْوم يعْذُوْن.

¹⁵ لَّا، ئِتْخصَّا اَذ تِيڒِيم ثصْفَام ذِي مَارَّا مِين تݣّم اَم مَامّش يصْفَا أَربِّـي ونِّي إِي ذَاوم د يڒَاغَان.

¹⁶ أَقَا يُوْرَا ذِي لْكِتَاب: إِڒِيث كنِّيو ثصْفَام مِينْزِي نش صْفِيغ.

¹⁷ مڒَا ثقَّارم-اَس "آ بَابَا" إِ ونِّي يتحْسَابن ڒخْذَايم ن كُڒ بْنَاذم بْڒَا ؤُذمَاون اَتَاف يتْخصَّا اَذ تْعِيشم س يِجّن ن ثِيݣّْوْذِي اَخْمِي غَا ثْعزّْبم ذِي ثْمُوْرْث-أَ.

¹⁸ أَقَا ثسّْنم كنِّيو س يِجّن ن لْفِدْيَا أَربِّـي يسُّوْفغ-يكنِّيو-د زݣ يِجّن ن ثُوْذَارْث ثخْوَا إِي ذَاوم يمُّوْشن زِي ڒجْذُوْذ نْوم، وَلَكِن لْفِدْيَا-يَا إِي خَاوم يخدْجس مَاشِي ذ شَان ن ڒْحَاجث اَم دّْهب نِغ اَم نُّقَارْث إِݣ يفنَّان.

¹⁹ لَّا، ئِسُّوْفغ-يكنِّيو-د س يذَامّن نِّي إِي يغْڒَان س وَاطَّاس ن لْمَسِيح يعْنِي يزْمَار نِّي يدْجَان بْڒَا ڒْعِيب بْڒَا ڒوْسخ.

²⁰ أُو نتَّا يتْوَاخْضَر قْبڒ مَا د تْوَاخْڒق دُّنشْت-أَ، وَلَكِن يسْمظْهَار-يث-يذ أَربِّـي ذِي زْمَان-أَ اَنݣَّارُو خ سَّبَاب نْوم.

²¹ زَّايس نتَّا إِي زِي تَامْنم زِي أَربِّـي إِي ثِيذ يسكَّرن زݣ يمتِّينن، يُوْشَا-ٱس لْعَظَمَا بَاش تِّقث نْوم ذ لْأَمَال نْوم تِيڒِين ذِي أَربِّـي.

²² ڒخُّو ثسِّيصْفَام يخف نْوم وَامِي ثْطَاعم إِ لْحَقِيقَا بَاش اَذ تِيڒِي ذَايْوم يجّن ن ڒمْحِبّث جَار وَاوْمَاثن بْڒَا نِّفَاق. س مَانَايَا يتْخصَّا-كنِّيو اَذ ثخْسم اَيَاوْيَا اَطَّاس س وُوْڒَاون نْوم.

²³ أَقَا تْوَاخڒْقم-د ذ جْذِيذ مَاشِي زݣ يِجّن ن زَّرِّيعث يفنَّان؛ لَّا، ثنِّي وَار يفنِّين شَا عمَّارْص، س وَاوَاڒ ن أَربِّـي يدَّرن يتْدُوْمَّان.

²⁴ لِأَنَّا: <شَّان ن بْنَاذم مَارَّا، أَم نْوَار ن اَرْبِيع إِݣ يدْجَا. كُڒ بْنَاذم اَم اَرْبِيع نتَّا. أَقَا اَرْبِيع يتِيسْرَاو نْوَار نّس يوطَّا،

²⁵ مَاشَا اَوَاڒ ن أَربِّـي يتْغِيمَا إِ ڒبْدَا.> أَوَاڒ-أَ نتَّا ذ لْإِنْجِيل إِي ذَاوم د يتْوَابشَّرن.