1 يوحنا 3 - ثريفيث 2020

¹ خْزَرث مشْحَاڒ ذ ثَمقّْرَانْت ڒمْحِبّث إِي ذَانغ د يُوْشَا بَابَاثْنغ وَامِي نتْوَاسمَّا ذ ثَارْوَا ن أَربِّـي! أُو ذ صَّح اَمُّو إِي ندْجَا. دُّنشْت-أَ، مَايمِّي وَار ذَانغ ثسِّين شَا نشِّين؟ ڒَاحقَّاش ؤُڒَا ذ نتَّا وَار ث ثسِّين شَا.

² آي يمْعِيزّن ينُو، ڒخُّو نشِّين ذ ثَارْوَا ن أَربِّـي. عَاذ وَار د تْمظْهَار شَا صِّيفث نّغ مَامش غَا ثِيڒِي، وَلَكِن نسّن اَذ تِيڒِي اَم نتَّا خْمِي د غَا يمظْهَار ڒَاحقَّاش اَث نْࢲر نتَّا مَامش إِي يدْجَا.

³ أُو مَارَّا ونِّي غَار يدْجَا لْأَمَال-أَ اَذ يسِّيصْفَا يخف نّس اَم مَامّش يدْجَا نتَّا يصْفَا.

⁴ مَارَّا ونِّي يقِّيمن يعصَّا نتَّا يتْرزَّا ڒُوْصِيَاث. وَاه، ڒْمُعْصِيّث نتَّاث ذ ثَرزِّيث ن ڒُوْصِيَاث.

⁵ أَقَا ثسّْنم بلِّي عِيْسَى لْمَسِيح نتَّا يمظْهَار-د بَاش اَخَانغ يكّس ڒْمُعْصِيَاث. أُو ڒْمُعْصِيّث نتَّا وَار ذَايس ثدْجِي شَا.

⁶ ؤُڒَا ذ يجّن إِݣ يتْعِيشن ذَايس وَار يقِّيم شَا يسْخدَّام ڒْمُعْصِيَاث. ونِّي إِݣ يقِّيمن يسْخدَّام ڒْمُعْصِيَاث نتَّا وَار ث يࢲْرِي شَا وَار ث يسِّين شَا.

⁷ آ يحنْجِيرن، وَار تجَّام حَدّ اَكنِّيو يخْذع. ونِّي إِݣ يقِّيمن يسْخدَّام مِين يدْجَان نِيْشَان قَا نتَّا اَقَاث نِيْشَان مَامّش إِݣ يدْجَا سِيذِيثْنغ.

⁸ ونِّي إِݣ يقِّيمن يسْخدَّام ڒْمُعْصِيَاث نتَّا زݣ إِبْڒِيس ڒَاحقَّاش إِبْڒِيس يقِّيم يعصَّا زݣ ومزْوَارُو. مَايمِّي د يمظْهَار مِّيس ن أَربِّـي؟ ئِمظْهَار-د بَاش اَذ يرز ڒفْعَايڒ ن إِبْڒِيس.

⁹ ونِّي د يخڒْقن زِي أَربِّـي وَار يقِّيم شَا يسْخدَّام ڒْمُعْصِيَاث ڒَاحقَّاش ثَقُّوْشْت ن أَربِّـي ثْزدّغ ذَايس. وَار يزمَّر شَا اَذ يقِّيم ذِي ڒْمُعْصِيَاث ڒَاحقَّاش يخْڒق-د زِي أَربِّـي.

¹⁰ مَامّش غَا نݣّ أَ نسْفرق ثَارْوَا ن أَربِّـي ذ ثَارْوَا ن إِبْڒِيس؟ قَا يِنِّي وَار يقِّيمن شَا سْخدَّامن مِين يدْجَان نِيْشَان وَار دْجِين شَا زِي أَربِّـي. عَاوذ ونِّي وَار يتخْسن شَا ؤُمَاس وَار يدْجِي شَا زِي أَربِّـي.

وَا لَابُد أَ نخْس اَيَاوْيَا

¹¹ ذ وَا ذ اَوَاڒ إِي تسْڒَام زݣ ومزْوَارُو يعْنِي يتْخصَّا وَا لَابُد أَ نْتخْس اَيَاوْيَا.

¹² مَاشِي أَ نِيڒِي اَم قَبِيل يدْجَان زِي لْمُفْسِيد نِّي يرُوْح ينْغَا ؤُمَاس. مَايمِّي إِي ث ينْغَا؟ ڒَاحقَّاش ڒخْذَايم نّس نتَّا ذ ثِعفَّانِين، ڒخْذَايم ن وُوْمَاس ذ ثِصبْحَانِين.

¹³ إِيوَا آ أَيثْمَا، وَار تْعجِّيبم شَا وَامِي دُّنشْت-أَ تْعِيفَّا-كنِّيو.

¹⁴ نشِّين نسّن بلِّي نࢲْوَا زِي ڒْموْث غَار ثُوْذَارْث ڒَاحقَّاش نْتخْس أَيثْمَاثْنغ. ونِّي وَار يتخْسن شَا عَاذ اَقَاث يتْعِيش ذِي ڒْموْث.

¹⁵ مَارَّا ونِّي إِݣ يتْعِيفَّان ؤُمَاس اَم ونِّي إِݣ ينقّن بْنَاذم. أَقَا كنِّيو ثسّْنم ونِّي إِݣ ينقّن بْنَاذم وَار ذَايس تِيڒِي شَا ثُوْذَارْث ن ڒبْدَا.

¹⁶ س مِينْزِي إِي غَا نسّن ڒمْحِبّث؟ مِينْزِي سِيذِيثْنغ يصدّق خَانغ يخف نّس. أُو اَمُّو عَاوذ إِي غَا نِيڒِي نوْجذ أَ نْصدّق يخف نّغ خ أَيثْمَاثْنغ.

¹⁷ ونِّي غَار يدْجَا وَاݣْڒَا ن دُّنشْت-أَ يتْوَاڒَا ؤُمَاس وَار غَارس شَا يتحْذَاجَا أُوْشَا يسقْسح ؤُڒ نّس خَاس، مَامّش غَا ثِيڒِي ڒمْحِبّث ن أَربِّـي ذݣ وَانِيتَا؟

¹⁸ آ يحنْجِيرن، مَاشِي أَ نْتخْس بْنَاذم س وَاوَاڒن ذ يِيڒس وَاهَا؛ لَّا، ئِتْخصَّا اَث نخْس س ڒخْذَايم ذ ڒْحَقّ.

¹⁹ أَمنِّي إِي غَا نسّن بلِّي نشِّين زِي لْحَقِيقَا، أَمنِّي عَاوذ أَ نسْريّح ؤُڒَاون نّغ زَّاث إِ أَربِّـي.

²⁰ مڒَا عَاقْبنْت-اَنغ لْأَفْكَار ن وُوْڒَاون نّغ اَتَاف مَعْلِيش، أَقَا أَربِّـي ذ اَمقّْرَان خ لْأَفْكَار ن وُوْڒَاون نّغ قَا يفهّم مَارَّا ثِمسْڒَايِين.

²¹ آي يمْعِيزّن ينُو، مڒَا وَار ذَانغ تْعَاقِيبن شَا وُوْڒَاون نّغ اَتَاف اَغَارْنغ ثِيڒِي يجّن ن زْعَامث زَّاث إِ أَربِّـي،

²² أَتَاف اَزَّايس نقْبڒ مَارَّا مِين ذَاس غَا نتَّار نشِّين ڒَاحقَّاش نتْطَاعَا ڒُوْصِيَاث نّس نْتݣّ مِينْخف يرطَّا نتَّا.

²³ أَقَا ثَانِيتَا ذ ڒُوْصِيّث نّس أَ نَامن زݣ يِيْسم ن مِّيس عِيْسَى لْمَسِيح، أَ نْتخْس اَيَاوْيَا اَم مَامّش إِي ذَانغ د يوصَّا نتَّا.

²⁴ ونِّي إِݣ يسْخدَّامن ڒُوْصِيَاث نّس اَتَاف اَذ يعِيش ذِي أَربِّـي، أَربِّـي يزدّغ ذَايس. مَامّش غَا نݣّ نشِّين أَ نسّن بلِّي يزدّغ ذَايْنغ؟ نسّن-يث س أَرُّوْح نِّي إِي ذَانغ د يُوْشَا.