1 يوحنا 1 - ثريفيث 2020

لْمُقَدِّمَا

¹ مِين تُوْغَا ذِنِّي زݣ ومزْوَارُو، نتْسْڒَا-يَاس نࢲّر-يث س ثِيطَّاوِين نّغ، نخزَّر ذَايس نتْحَاذَا-ث س يفَاسّن نّغ يعْنِي ذ اَوَاڒ ن ثُوْذَارْث.

² ثُوْسَا-د ثُوْذَارْث ثْمظْهَار-د، نشِّين نْࢲر-يت نشْهذ خَاس. نتْبشَّار-يكنِّيو س ثُوْذَارْث-أَ وَار يفنِّين شَا عمَّارْص. تُوْغَا ثدْجَا ذِنِّي اَك بَابَاس سّنِّي ثْمظْهَار-اَنغ-د.

³ مِين نࢲْرَا ذ مِين نتْسْڒَا نتْبشَّار-يكنِّيو زَّايس حمَا ؤُڒَا ذ كنِّيو اَذ تمْعَاشَرم اَكِذْنغ. مَارَّا نشِّين ثَمْعَاشَرْث نّغ اَقَات اَك بَابَاثْنغ ذ مِّيس عِيْسَى لْمَسِيح.

⁴ نْتَارِي-يَاوم-د ثِمسْڒَاِين-أَ حمَا ڒفْرَاحث نّغ اَذ تجَّاون.

نُّوْر ن أَربِّـي يتْشعْشِيعن ذِي ثَادْجسْت

⁵ ذ وَا ذ اَوَاڒ إِي زَّايس نتْسْڒَا نتْبشَّار-يكنِّيو زَّايس يعْنِي أَربِّـي ذ نُّوْر وَار ذَايس بُو ثَادْجسْت.

⁶ مڒَا نقَّار قَا نشِّين نْتمْعَاشَر اَكِذس وَلَكِن نݣُّوْر ذݣ وبْرِيذ ن ثَادْجسْت اَتَاف نسْخَرِّيق وَاهَا وَار نسْخدِّيم شَا لْحَقِيقَا.

⁷ وَلَكِن مڒَا نݣُّوْر ذِي نُّوْر مَامّش يدْجَا نتَّا ذِي نُّوْر، أَتَاف نْتمْعَاشَر اَك وَايَاوْيَا اَتَاف يذَامّن ن مِّيس عِيْسَى سِّيصْفَان-اَنغ زِي مَارَّا ڒْمُعْصِيَاث.

⁸ مڒَا نقَّار وَار ذَايْنغ بُو ڒْمُعْصِيَاث اَتَاف نسْخَرِّيق خ يِيخف نّغ وَاهَا، أَتَاف لْحَقِيقَا وَار ذَايْنغ ثْزدّغ شَا.

⁹ وَلَكِن مڒَا نعْتَرف س ڒْمُعْصِيَاث نّغ إِ أَربِّـي، نتَّا اَقَاث نِيشَان ذَايس تِّقث، أَذَانغ يغْفَر ڒْمُعْصِيَاث نّغ اَذَانغ يسِّيصْفَا زِي مَارَّا شَّرّْ.

¹⁰ مڒَا نقَّار قَا نشِّين وَار نعْصِي شَا أَربِّـي، أَتَاف نتَّا نْتَارَّا-ث ذ بُو-يخَرِّيقن، أَتَاف اَوَاڒ نّس وَار ذَايْنغ يزدّغ شَا.