1 أيث-كورينث 9 - ثريفيث 2020

ڒْحَقّ ن شَّارْض إِي غَارْسن غَار يِنِّي يتْرَايَان خ ڒْمُوْمِنِين

¹ غَارِي لْحُرِّيَا يعْنِي نش مَاشِي ذ يسْمغ. نش ذ اَرَّسُوْل، ࢲْرِيغ سِيذِيثْنغ عِيْسَى. يَاش ذ كنِّيو إِي يدْجَان ذ نَّتِيجَا ن ڒْخذْمث ينُو ذِي سِيذِيثْنغ، نِغ لَّا؟

² مڒَا وَار دْجِيغ ذ اَرَّسُوْل إِ شَان يِوْذَان نّغْنِي، أَتَاف إِ كنِّيو إِي غَا دْجِيغ ذ اَرَّسُوْل. لِأَنَّا كنِّيو ذ دَّلِيل يݣَّا-ٱيِي نش سِيذِيثْنغ ذ اَرَّسُوْل.

³ ذ وَا ذ دِّفَاع ينُو غَار يِنِّي ذَايِي يتݣّن لْإِسْتِجْوَاب.

⁴ يعْنِي، نشِّين مَا وَار غَارْنغ بُو ڒْحَقّ أَ نشّ أَ نْسو؟

⁵ نشِّين مَا وَار غَارْنغ بُو ڒْحَقّ أَ نَاوِي اَكِذْنغ ثِمْغَارِين ڒْمُوْمِنَاث مَامّش ݣِّين اَرُّسُل نّغْنِي ذ اَيثْمَاس ن سِيذِيثْنغ ذ بُطْرُس؟

⁶ مَا نش ذ بَرْنَابَا وَاحذْنغ إِي وَار غَار يدْجِي ڒْحَقّ ذِي شَّارْض، مَا يتْخصَّا-يَانغ إِ نشِّين أَ نخْذم ذِي شَان ڒْحَاجث نّغْنِي بَاش أَ نْعِيش؟

⁷ شُوْف، مَا يدْجَا شَا حَدّ اَذ يَاذف ذِي ڒْعَسْكَار اَذ يخْذم بْڒَا مَا اَذ يتْخَاڒس؟ لَّا! مَا يدْجَا شَا حَدّ اَذ يࢲُّو ثْزَايَارْث وضِيڒ بْڒَا مَا ٱذ يشّ ثِزوْرِين نّس؟ لَّا! مَا يدْجَا شَا حَدّ اَذ يَرْوس ثْحِيمرْث بْڒَا مَا اَذ يسو اَغِي نّس؟ لَّا!

⁸ مَا قَّارغ مَانَايَا عْلَاحْسَاب اَرَّاي ن بْنَاذم وَاهَا؟ لَّا، عْلَاحْسَاب اَرَّاي ن شَّرِيعَا يقَّار كِيف-كِيف.

⁹ يعْنِي يقَّار لْكِتَاب ن مُوْسَى: وَار ذَاس تݣّ بُو ثَشْمَانْت إِ وفُوْنَاس نِّي يتْصَرْوَاثن. مَا إِ يينْدُوْزن وَاهَا ؤُمِي يتِيشّ أَربِّـي لْهِمَّا؟

¹⁰ نِغ يقَّار-يت مَارَّا عْلَاحْسَاب نشِّين؟ وَاه، ئِقَّار-يت عْلَاحْسَاب نشِّين. لِأَنَّا ونِّي يشرّْزن ذ ونِّي يصَرْوَاثن أُو لَابُد اَذ رزُّوْن اَذ شّن زِي ثْفدْجَاحْث نِّي.

¹¹ مڒَا تُوْغَا نزْرع جَارَاوم ثِمسْڒَايِين ن وجنَّا، مَا ذ اَطَّاس خَانغ مڒَا نمْجَار زَّايْوم ثِمسْڒَايِين ن ثْمُوْرْث؟

¹² مڒَا يوْذَان نّغْنِي غَارْسن ڒْحَقّ نِّي ن شَّارْض اَذَاسن ثُوْشم، يَاك نشِّين غَارْنغ ڒْحَقّ-أَ كْتَار نِغ لَّا؟ وَلَكِن نشِّين نُوْݣِي أَ نْكسِّي ڒْحَقّ-أَ وَانِيتَا. نْصبَّر اَطَّاس إِ ثْمسْڒَايِين بَاش وَار نتْبلَّاع شَا ثَوَّارْث إِ لِإِنْجِيل.

¹³ مَا وَار ثسِّينم شَا يِنِّي يخدّْمن ذِي ثمْزِيذَا كسِّين-د لْمَكْلَا نْسن زَّايس، ذ يِنِّي يخدّْمن ذِي ڒْمذْبَاح كسِّين-د ڒْحَقّ نْسن زِي مِين يتْوَاغَرّْصن ذِي ڒْمذْبَاح؟

¹⁴ أَمنِّي ؤُڒَا ذ يِنِّي يتْبشَّارن س لْإِنْجِيل، يُوْمَر خَاسن سِيذِيثْنغ اَذ كسِّين شَّارْض نْسن زِي لْإِنْجِيل.

¹⁵ وَلَكِن نش وَار كْسِيغ شَا ؤُڒَا ذ يجّن زِي ڒْحُقُوْق نِّي. عَاوذ نش وَار تَارِيغ شَا ثَبْرَات-أَ ڒخُّو حمَا اَتَاف كنِّيو اَذَايِي ثُوْشم ڒْحُقُوْق نِّي؛ لَّا، نش حْسن مڒَا مُّوْثغ قْبڒ مَا ٱذَايِي يكّس حَدّ مَانَايَا مِينْزِي غَا فْتَخْرغ.

¹⁶ وَلَكِن مڒَا تْبشَّارغ، وَار زمَّرغ اَذ فْتَخْرغ لِأَنَّا يتْخصَّا-ٱيِي أُو لَابُد اَذ بشَّرغ. يَا تَمَارَا خَافِي نش مَعْلِيك وَار تْبشَّارغ شَا!

¹⁷ مڒَا بشَّرغ س ڒْخَاضَر ينُو، أَتَاف اَذَايِي يجَازَا أَربِّـي. مڒَا وَار يدْجِي بُو س ڒْخَاضَر ينُو، يعْنِي اَتَاف تݣّغ يجّن ن لْمسْؤُلِيَا بزّز خَافِي وَاهَا.

¹⁸ إِذن، مِين يعْنَا شَّارْض ينُو؟ شَّارْض ينُو ذ وَا: خْمِي تْبشَّارغ س لْإِنْجِيل تْقدَّامغ-ث بَاطڒ يعْنِي مَاشِي عْلَاحْسَاب ڒْحَقّ ن شَّارْض-أَ إِي غَارِي ذِي لْإِنْجِيل.

¹⁹ وَاخَّا نش وَار غَارِي بُو بَاب ينُو، وَلَكِن أَرِّيغ يخف ينُو ذ يسْمغ زَعْمَا إِ مَارَّا بَاش اَذ ربْحغ اَطَّاس ن زِّيَادَا ن يِوْذَان.

²⁰ نش اَرِّيغ يخف ينُو اَم يِجّن ذ اَئِسْرَائِيلِي غَار أَيث-إِسْرَائِيل بَاش اَتَاف اَثن ربْحغ. أَرِّيغ يخف ينُو اَم يِجّن مِينْخف ثْحكّم شَّرِيعَا ن مُوْسَى غَار يِنِّي مِينْخف ثْحكّم شَّرِيعَا ن مُوْسَى بَاش اَتَاف اَثن ربْحغ (وَاخَّا نش وَار خَافِي ثْحكّم شَا شَّرِيعَا نِّي).

²¹ أَرِّيغ يخف ينُو اَم يِجّن وَار غَارس ثدْجِي شَا شَّرِيعَا ن مُوْسَى غَار يِنِّي وَار غَارْسن ثدْجِي شَا شَّرِيعَا ن مُوْسَى بَاش اَتَاف اَثن ربْحغ (وَاخَّا نش وَار دْجِيغ شَا بْڒَا شَّرِيعَا ن أَربِّـي، ثْحكّم خَافِي شَّرِيعَا ن لْمَسِيح).

²² أَرِّيغ يخف ينُو اَم يِجّن يضْعف غَار يِنِّي يضعْفن بَاش اَتَاف اَثن ربْحغ. أَرِّيغ يخف ينُو ذ مَارَّا إِ مَارَّا يوْذَان بَاش اَذ ݣّغ مَارَّا لْإِمْكَانِيَاث اَذ سْنجْمغ شَا زَّايْسن.

²³ نش تݣّغ مَارَّا مَانَايَا عْلَاحْسَاب لْإِنْجِيل حمَا اَذ شَرْشغ ذِي لْبَرَكَاث نّس.

²⁴ مَا وَار ثسِّينم شَا ثَازْڒَا نِّي يتݣّن ذِي لْملْعَب؟ مَارَّا تَازّْڒن وَلَكِن يجّن وَاهَا إِي غَا يربْحن لْجَائِزَا. أَمنِّي ؤُڒَا ذ كنِّيو يتْخصَّا اَذ تَازْڒم بَاش اَت ثْربْحم.

²⁵ مَارَّا يِنِّي يتمْعَانَاذن ذِي لْملْعَب حكّْمن خ دَّات نْسن ذِي مَارَّا ثِمسْڒَايِين-أَ. تݣّن مَانَايَا بَاش اَذ د اَوِين يجّن ن تَّاج وَار ذَاسن يتْدُوْمِي شَا. وَلَكِن نشِّين نْتݣّ مَانَايَا بَاش أَ د نَاوِي يجّن ن تَّاج يتْدُوْمَان إِ ڒبْدَا.

²⁶ خ مَانَايَا وَار تِيزّْڒغ شَا بْڒَا لْإِتِجَاه، وَار شِّيثغ شَا س ڒْبُوْكْس اَم ونِّي يشَّاثن ذِي لْهَوَا وَاهَا.

²⁷ لَّا، تْزيَّارغ خ دَّات ينُو تَارِّيغ-ت ذ ثِيسْمغْث ينُو. مَاشِي اَذ بشَّرغ اَوَاڒ إِ يِوْذَان أُو غَار ونݣَّارُو اَذ يڒِيغ اَك يِنِّي إِي ثن يسُوْفُوْغن بْڒَا لْجَائِزَا.