1 أيث-كورينث 7 - ثريفيث 2020

أَرَّسُوْل بُوْلُس يتْوصَّا ڒْمُوْمِنِين خ ڒمْڒَاش

¹ فَا ڒخُّو أَ نْسِّيوڒ خ ثْمسْڒَايِين إِي خف ثُوْرِيم كنِّيو. مَثَالَان، مْلِيح اَرْيَاز مڒَا وَار يتْحِيذِي شَا ثَمْغَارْث.

² وَلَكِن حْسن مڒَا كُڒ يجّن اَغَارس ثِيڒِي ثمْغَارْث نّس، كُڒ يشْتن اَغَارس يِيڒِي ورْيَاز نّس حمَا وَار يتِيڒِي شَا لْفَسَاد.

³ أُو لَابُد اَرْيَاز اَذ يُوْش ڒْحَقّ ن ڒمْڒَاش إِ ثمْغَارْث نّس. أَمُّو عَاوذ أُو لَابُد ثَمْغَارْث اَذ تُوْشّ ڒْحَقّ ن ڒمْڒَاش إِ ورْيَاز نّس.

⁴ ڒَاحقَّاش ثَمْغَارْث وَار تْرَايِـي شَا خ دَّات نّس وَاحْذس، ئِتْرَايَا خَاس ؤُڒَا ذ اَرْيَاز نّس. أَمُّو عَاوذ اَرْيَاز وَار يتْرَايِي شَا خ دَّات نّس وَاحْذس، تْرَايَا خَاس ؤُڒَا ذ ثَمْغَارْث نّس.

⁵ ئِتْخصَّا وَار ثْقطّْعم شَا خ وَايَاوْيَا إِلَّا مڒَا ثْتَافْقم اَك وَايَاوْيَا يجّن ن لْمُدَّا وَاهَا حمَا اَذ تُوْشم ڒْوقْث نِّي إِ ثْࢲَادْجِيث نْوم. منْبَعْد اَذ تْمُوْنم حمَا وَار كنِّيو يتْغَارِّي شَا شِّيطَان ڒَاحقَّاش اَتَاف وَار ثْزمَّرم شَا اَذ تْحكْمم مْلِيح خ شّهْوث نْوم.

⁶ وَلَكِن مَانَايَا مَاشِي ذ يجّن ن ڒُوْصِيّث، قَّارغ-اَوم-ت اَم يِجّن ن تّسْرِيح.

⁷ رزُّوْغ مَارَّا يرْيَازن اَذ يڒِين اَم نش. وَلَكِن كُڒ يجّن غَارس ثِزمَّار إِي ذَاس يُوْشَا أَربِّـي، ئِجّن غَارس ثِين، ئِجّن غَارس ثَا.

⁸ فَا ڒخُّو اَذ سِّيوْڒغ خ يِنِّي وَار يمْڒِيشن شَا ذ ثَاجَّاڒِين. يعْنِي مْلِيح مڒَا قِّيمن اَم نش.

⁹ وَلَكِن مڒَا وَار زمَّرن شَا اَذ حكْمن خ شّهْوث نْسن أُو لَابُد اَذ مڒْشن. ڒَاحقَّاش مڒَا مڒْشن حْسن زِي مڒَا قِّيمن حرّْقن ذِي شّهْوث نْسن.

¹⁰ فَا يِنِّي يمڒْشن، ئِوصَّا خَاسن سِيذِيثْنغ مَاشِي ذ نش: ممْنُوْع ثَمْغَارْث اَذ تسْمح ذݣ ورْيَاز.

¹¹ مڒَا ثَمْغَارْث ثسْمح ذݣ ورْيَاز نّس يتْخصَّا-يَاس وَار تْمدْجش شَا عَاوذ، نِغ اَذ تْمصْڒَاح اَك ورْيَاز نّس. ممْنُوْع عَاوذ اَرْيَاز اَذ يدْجف إِ ثمْغَارْث نّس.

¹² فَا يِنِّي نّغْنِي، قَّارغ-اَسن نش (يعْنِي وَار ت يقَّار شَا سِيذِيثْنغ، غِير نش): مڒَا شَان ؤُمَاثْنغ غَارس ثَمْغَارْث مَاشِي ذ ڒْمُوْمنَا ثقْبڒ اَكِذس ثْعِيش، ممْنُوْع اَذَاس يدْجف.

¹³ عَاوذ ثَمْغَارْث، مڒَا غَارس اَرْيَاز مَاشِي ذ ڒْمُوْمن يقْبڒ اَكِذس يعِيش، ممْنُوْع اَذَاس ثدْجف.

¹⁴ شُوْف، أَرْيَاز مَاشِي ذ ڒْمُوْمن اَقَاث سْوَادَّاي إ لْعِنَايَا ن أَربِّـي س ثمْغَارْث نّس. ثَمْغَارْث مَاشِي ذ ڒْمُوْمنَا اَقَات سْوَادَّاي ن لْعِنَايَا ن أَربِّـي س ورْيَاز نّس. مڒَا مَاشِي اَمنِّي، ثَارْوَا نْوم اَذ يڒِين س بَارَّا ن لْعِنَايَا ن أَربِّـي. وَلَكِن ڒخُّو اَقَاثن سْوَادَّاي إِ لْعَنَايَا نّس.

¹⁵ إِنَّمَا، ونِّي نِغ ثنِّي وَار يُوْمِينن شَا مڒَا يسْمح، صَافِي اَذ يسْمح. يعْنِي ڒْمُوْمن-أَ ذ ڒْمُوْمنَا-يَا غَارْسن لْحُرِّيَا س ظُرُوْف-أَ لِأَنَّا يڒَاغَا-يَاوم-د أَربِّـي اَذ تْعِيشم ذِي ڒهْنَا.

¹⁶ شُوْف آ ثَمْغَارْث، مَانِيس ثسّْنذ شم زَعْمَا بَاش اَذ تسْنجْمذ اَرْيَاز نّم؟ ئِي شك آي اَرْيَاز، مَانِيس ثسّْنذ شك زَعْمَا بَاش اَذ تسْنجْمذ ثَمْغَارْث نّش؟

¹⁷ كُڒ يجّن اَذ يعِيش ثُوْذَارْث نّس مَامش ذَاس ت يُوْشَا سِيذِيثْنغ، مَامش ذَاس د يڒَاغَا أَربِّـي. أَمُّو إِي تْوصِّيغ نش مَارَّا ثِجُوْمَع ن ڒْمُوْمِنِين.

¹⁸ شَان يجّن، مڒَا يڒَاغَا-يَاس-د أَربِّـي أُو نتَّا تُوْغَا ݣِّين-اَس طَّهَارث، مَاشِي اَذ يرَاح اَذ يكّس طَّهَارث نِّي. شَان يجّن، مڒَا يڒَاغَا-يَاس-د أَربِّـي تُوْغَا وَار ذَاس ݣِّين شَا طَّهَارث، مَاشِي اَذ يرْزُو اَذ يݣّ طَّهَارث.

¹⁹ مڒَا يتْطهَّار نِغ وَار يتْطهِّير شَا، مَانَاينِّي يتْوَاحْسَاب ذ وَالُو. مڒَا يتݣّ س ڒُوْصِيَاث ن أَربِّـي ذ مَانَاينِّي إِݣ يتْوَاحْسَابن.

²⁰ كُڒ يجّن اَذ يقِّيم ذِي لْحَالَا إِي ذِي تُوْغَا يدْجَا زِي قْبڒ مَا ذَاس د يڒَاغَا أَربِّـي.

²¹ شك مَا ذ يسْمغ وَامِي ذَاش د يڒَاغَا؟ إِيوَا بْڒَا ٱش يشْقَا مَانَايَا. وَلَكِن مڒَا غَارك لْفُرْصَا اَذ تْربْحذ لْحُرِّيَا نّش، اݣّ-يت.

²² لِأَنَّا ونِّي تُوْغَا يدْجَان ذ يسْمغ وَامِي ذَاس د يڒَاغَا سِيذِيثْنغ، نتَّا ڒخُّو غَارس يجّن ن لْحُرِّيَا زِي سِيذِيثْنغ. أَمنِّي عَاوذ ونِّي تُوْغَا يدْجَان غَارس لْحُرِّيَا، نتَّا ڒخُّو يذْوڒ ذ يسْمغ ن سِيذِيثْنغ.

²³ صَافِي، يسْغِي-كنِّيو س يِجّن ن تَّمَن، وَار تَارَّام شَا يخف نْوم ذ يسمْغَان ن بْنَاذم.

²⁴ آي اَيثْمَا، أَذ يقِّيم كُڒ يجّن ذِي لْحَالَا نِّي إِي ذِي ذَاس د يڒَاغَا أَربِّـي.

²⁵ فَا ڒخُّو اَذ سِّيوْڒغ خ ثْحَرْمُوْشِين وَار يمْڒِيشن شَا. وَار غَارِي بُو ڒُوْصِيّث زِي سِيذِيثْنغ؛ لَّا، قَّارغ مَانَايَا س اَرَّاي ينُو. تيّْقم ذَايِي عْلَاحْسَاب اَرَّاحْمث ن سِيذِيثْنغ.

²⁶ عْلَاحْسَاب ڒْوقْث-أَ يقسْحن، يعْنِي مْلِيح مڒَا يقِّيم بْنَاذم مَامش يدْجَا.

²⁷ شك، مَا غَارك ثَمْغَارْث؟ وَار رزُّو شَا اَذ تْسمْحذ ذِي مَانَايَا. شك، مَا وَار غَارك بُو ثمْغَارْث؟ وَار رزُّو شَا خ ثمْغَارْث.

²⁸ وَلَكِن شك مڒَا ثْمڒْشذ مَعْلِيش، وَار ثعْصِيذ شَا. عَاوذ ثَحَرْمُوْشْت مڒَا ثمْڒش مَعْلِيش، وَار ثعْصِي شَا. وَلَكِن يِنِّي يمڒْشن اَغَارْسن يڒِين لْمَشَاكِل ذِي دُّنشْت-أَ. نش رزُّوْغ اَخَاوم سْبعّْذغ مَانَاينِّي.

²⁹ فَا آي اَيثْمَا، مِين رزُّوْغ اَذ ينِيغ؟ ڒْوقْث اَقَا ثْقَارّب-د. سَّا ٱڒ ثْسَاونْت يِنِّي يمڒْشن اَذ عِيشن اَخْمِي وَار مْڒِيشن شَا،

³⁰ ذ يِنِّي يتْخيَّاقن اَخْمِي وَار تْخيِّيقن شَا، ذ يِنِّي يفَرّْحن اَخْمِي وَار فَرّْحن شَا، ذ يِنِّي يسَّاغن اَخْمِي مَانَاينِّي وَار زَّايس تْملِّيكن شَا،

³¹ ذ يِنِّي ينفّْعن زِي دُّنشْت-أَ اَخْمِي مَانَاينِّي وَار زَّايس نفّْعن شَا. مَايمِّي؟ مِنْزِي طَّبِيعَا ن دُّنشْت-أَ وَار تْدُوْمِي شَا.

³² فَا رزُّوْغ اَذ تِيڒِيم بْڒَا اَمْنُوْس. ونِّي وَار يمْڒِيشن شَا غَارس يجّن ن لْمُهِيمَا إِ شّْغڒ ن سِيذِيثْنغ، مَامّش غَا يݣّ اَخَاس يَارْضَا سِيذِيثْنغ.

^33-34 وَلَكِن اَرْيَاز يمڒْشن غَارس يجّن ن لْمُهِيمَا إِ شّْغڒ ن دُّنشْت-أَ، مَامّش غَا يݣّ اَخَاس ثَارْضَا ثمْغَارْث نّس. نتَّا لْمُهِيمَاث نّس فَرّْقنْت خ ثْنَاين. ثَمْغَارْث وَار يمْڒِيشن شَا ذ ثنِّي إِݣ يدْجَان ذ ثَعْزْرِيث غَارْسنْت يجّن ن لْمُهِيمَا إِ شّْغڒ ن سِيذِيثْنغ، مَامّش غَا ݣّنْت اَذ عبْذنْت سِيذِيثْنغ س دَّات نْسنْت ذ وُوْڒ نْسنْت. ثَمْغَارْث يمڒْشن غَارس يجّن ن لْمُهِيمَا إِ شّْغڒ ن دُّنشْت-أَ، مَامّش غَا ثݣّ اَخَاس يَارْضَا ورْيَاز نّس.

³⁵ مَانَايَا قَّارغ-ث بَاش اَكنِّيو نفْعغ، مَاشِي اَكنِّيو سْحسْڒغ. لَّا، رزُّوْغ اَذ تْعِيشم س لْمَعْقُوْل اَذ تْعبّْذم سِيذِيثْنغ مَاشِي س شَان ن لْمُهِيمَا نّغْنِي.

³⁶ فَا ونِّي يخظْبن، مڒَا وَار يزمَّر شَا اَذ يصْبَر خ ثْحنْجِيرْث نِّي يعْنِي وَار يحكّم شَا مْلِيح خ شّهَاوَاث نّس، صَافِي يتْخصَّا-ٱس اَذ يݣّ لْوَاجِب نّس يعْنِي اَذ يمْڒش اَكِذس. مَعْلِيش نتَّا وَار يعصِّي شَا.

³⁷ أَمَّا ونِّي يعوّْڒن مْلِيح ذݣ وُوْڒ نّس اَذ يفْسخ اَك ثنِّي إِݣ يخْظب. مڒَا يعمّذ خ مَانَايَا ذݣ وُوْڒ نّس وَار ذِنِّي حتَّا ذ شَا ن ڒْحَاجث اَخَاس ثْزيَّار يعْنِي يحكّم خ شّهْوث نّس، مَعْلِيش يݣَّا مْلِيح.

³⁸ خ مَانَايَا ونِّي يمڒْشن اَك ثنِّي إِݣ يخْظب، مَعْلِيش يݣَّا مْلِيح. أُو ونِّي وَار كِذس يمْڒِيشن شَا، يݣَّا حْسن عَاذ.

³⁹ ثَمْغَارْث يمڒْشن نتَّاث ثقّن غَار ورْيَاز نّس مڒَا يدَّر. وَلَكِن مڒَا يمُّوْث، نتَّاث غَارس ڒْحَقّ اَذ تمْڒش اَك ونِّي ثْخس نتَّاث مڒَا نتَّا ذ ڒْمُوْمن زِي سِيذِيثْنغ.

⁴⁰ وَلَكِن مَامّش تْوَاڒِيغ نش، أَذ تْفَرح كْتَار مڒَا ثقِّيم مَامّش ثدْجَا. وَاه، تْفكَّرغ بلِّي ؤُڒَا ذ نش اَكِذِي اَرُّوْح ن أَربِّـي ذِي مَانَايَا.