1 أيث-كورينث 6 - ثريفيث 2020

شِّكَايَاث جَار ڒْمُوْمِنِين

¹ شَان يِجّن زَّايْوم غَارس شِّكَايَا ضذ إِ يِجّن نّغْنِي. مَا ذ صَّح وَار يتْصذْحِي شَا نتَّا، ئِتْبدَّا ذِي لْمَحْكَمَا غَار زَّاث ن ينِّي وَار يُوْمِينن شَا مَاشِي غَار زَّاث ن صَّالِحِين؟

² مَا وَار ثسِّينم شَا بلِّي نِثْنِي صَّالِحِين إِي غَا يحكْمن خ دُّنشْت-أَ؟ ئِي كنِّيو مڒَا ثْحكْمم خ دُّنشْت-أَ، مَايمِّي وَار ثْزمَّرم شَا اَذ تْحلّم شِّكَايَاث ثِمزْيَانِين؟

³ مَا وَار ثسِّينم شَا بلِّي أَ نحْكم خ لْمَلَائِكَاث؟ إِيوَا أُو لَابُد أَ نحْكم خ ثْمسْڒَايِين ن ثُوْذَارْث-أَ!

⁴ إِذن، وَامِي جَارَاوم شِّكَايَاث اَم ثِيْنَا، مَايمِّي ثنْت ثْسرْسم زَّاث إِ يِنِّي وَار غَار ثدْجِي شَا لْقِمَا اَك جْمَاعث ن ڒْمُوْمِنِين؟

⁵ قَّارغ-اَوم مَانَايَا حمَا اَذ تْسذْحِيم. مَا ذ صَّح وَار ذِنِّي حَدّ جَارَاوم ذَايس ڒفْهَامث حمَا اَذ يحلّ شِّكَايَاث-أَ جَار ڒْمُوْمِنِين؟

⁶ وَلَكِن مَاشِي مْلِيح اَوْمَاثن تمْشَرَّاعن اَك وَايَاوْيَا زَّاث إِ يِنِّي وَار يُوْمِينن شَا.

⁷ خْمِي كنِّيو تمْشَرَّاعم اَك وَايَاوْيَا، أَتَاف صَافِي ثخْسَرم. إِيوَا حْسن إِ كنِّيو مڒَا تْوَاضڒْمم نِغ تْوَاغشّم.

⁸ لَّا، وَلَكِن كنِّيو ثْضدْجْمم تݣّم ڒْغشّ، تݣّم مَانَايَا إِ اَيثْمَاثْوم.

⁹ مَا وَار ثسِّينم شَا بلِّي يِنِّي وَار يُوْمِينن شَا وَار زْمَّرن اَذ وَارْثن ڒْمُلْك ن أَربِّـي؟ وَار خدّْعم شَا يخف نْوم. يِنِّي يتݣّن لْفَسَاد، ذ يِنِّي يعبّْذن لْأَصْنَام، ذ يِنِّي يزنَّان، ذ يحَنْجِيرن يفسّْذن اَك يرْيَازن، ذ يرْيَازن يفسّْذن اَك يرْيَازن،

¹⁰ ذ يشفَّارن، ذ يضمَّاعن، ذ يِنِّي يسسّن اَطَّاس ن شّْرب، ذ يِنِّي يقَّارن ڒْبَاطڒ، ذ يغشَّاشن وَار تْوَارَاثن شَا ڒْمُلْك ن أَربِّـي.

¹¹ أَمُّو إِي تُوْغَا تݣّن ڒبْعَاض زَّايْوم، وَلَكِن ڒخُّو تْوَاسِيرْذم، تْوَاسِّيصْفَام، تْوَاسمْصْڒَاحم اَك أَربِّـي س يِيسم ن سِيذِيثْنغ عِيْسَى لْمَسِيح أُو س اَرُّوْح ن أَربِّـي نّغ.

بعّذث خ لْفَسَاد

¹² نش غَارِي مَارَّا ثِمسْڒَايِين حدْجْڒنْت، وَلَكِن وَار نفّْعنْت شَا مَارَّا ثِمسْڒَايِين نِّي. غَارِي مَارَّا ثِمسْڒَايِين حدْجْڒنْت، وَلَكِن يتْخصَّا وَار خَافِي تْرَايِي ؤُڒَا ذ يجّن ن ثْمسْڒَايْث.

¹³ أَذ يِينِي يجّن: "إِيوَا لْمَكْلَا ن وعدِّيس، أَعدِّيس ن لْمَكْلَا." وَلَكِن أَربِّـي اَثن يهْذم س ثْنَاين إِذْسن. دَّات مَاشِي ن لْفَسَاد، دَّات نتَّاث ن سِيذِيثْنغ. أُو سِيذِيثْنغ يتْذبَّر إِ دَّات.

¹⁴ أَربِّـي س جّْهذ نّس يسكَّر-د سِيذِيثْنغ زِي ڒْموْث، أَذَانغ د يسكَّر زِي ڒْموْث ؤُڒَا ذ نشِّين.

¹⁵ مَا وَار ثسِّينم شَا بلِّي دَّات نْوم نتَّاث ذ طْرُوْفَاث ن دَّات ن لْمَسِيح؟ إِيوَا طْرُوْفَاث-أَ، مَا ٱثنْت يْسِيغ اَثنْت سْمُوْنغ اَكذ لْفَسْدَاث؟ لَّا، عمَّارْص!

¹⁶ مَا وَار ثسِّينم ونِّي يتْمُوْنن اَكذ لْفَسْدَا اَذ يذْوڒ ذ يج ن دَّات اَكِذس؟ وَاه، لِأَنَّا يقَّار لْكِتَاب: <نِثْنِي س ثْنَاين إِذْسن اَذ ذوْڒن ذ يجّن.>

¹⁷ وَلَكِن ونِّي يمُوْنن اَكذ سِيذِيثْنغ اَذ يذْوڒ ذ يج ن اَرُّوْح اَكِذس.

¹⁸ اَروْڒث زِي لْفَسَاد. كُڒ ڒْمُعْصِيّث نّغْنِي إِݣ يتݣّ بْنَاذم اَذ تِيڒِي غَار بَارَّا ن دَّات نّس. ونِّي يتݣّن لْفَسَاد يعصَّا دَّات نّس نِّيث.

¹⁹ نِغ مَا وَار ثسِّينم دَّات نْوم نتَّاث ذ ثَمْزِيذَا ن اَرُّوْح يقدّْسن إِݣ يزدّْغن ذَايْوم؟ إِيوَا غَارْوم اَرُّوْح-أَ زِي أَربِّـي. كنِّيو وَار تْرَايِيم شَا خ يِيخف نْوم

²⁰ مِينْزِي تْوَاسْغم كنِيو س يِجّن ن تَّمَن. فَلِهَاذَا، سمْغَارث أَربِّـي س دَّات نْوم.