1 أيث-كورينث 16 - ثريفيث 2020

صَّذَاقَا إِ ڒْمُوْمِنِين صَّالِحِين ذِي ثنْدِينْت ن لْقُدْس

¹ عْلَاحْسَاب صَّذَاقَا إِ ڒْمُوْمِنِين صَّالِحِين، سْوجْذث كنِّيو مَامّش ثنْت وصِّيغ إِ ثْجُمَاع ن ڒْمُوْمِنِين ذِي لْإِقْلِيم ن ݣَلَاطْيَا.

² ذِي نْهَار اَمزْوَارُو ن كُڒ سِيمَانَا، كُڒ يجّن زَّايْوم يتْخصَّا-يَاس اَذ يكّس شَا ن تْمنْيَاث عْلَاحْسَاب لْمَنْضَا نّس اَثنْت يخمّڒ. مَاشِي اَڒ د غَا اَسغ نش عَاذ اَذ تبْذَام اَذ تسْمُوْنم تْمنْيَاث-أَ.

³ منْبَعْد، يعْنِي خْمِي إِي د غَا اَوْضغ نش، أَتَاف اَذ د سّكّغ يِنِّي إِي غَا ثْسجّْلم ذِي ثبْرَاثِين بلِّي ذَايْسن تِّقث اَذ رَاحن اَذ اَوِين صَّذَاقَا-يَا إِي ثسْمُوْنم غَار ثنْدِينْت ن لْقُدْس.

⁴ مڒَا أُو لَابُد اَذ رَاحغ ؤُڒَا ذ نش، أَكِذِي رَاحن.

أَرَّسُوْل بُوْلُس ذ يِنِّي إِي كِذس يخدّْمن إِ سِيذِيثْنغ

⁵ فَا خْمِي غَا عْذُوْغ مَسِيدُوْنْيَا اَغَارْوم د اَسغ، قَا نش عَاذ اَذ د كّغ سّنِّي خ مَسِيدُوْنْيَا.

⁶ يمْكن اَكِذْوم قِّيمغ يجّن ن ڒْوقْث نِغ اَكِذْوم سعْذُوْغ ڒْمشْتَا بَاش اَذَايِي ثْعَاوْنم ذݣ وسَفَار ينُو مَانِي مَا رُوْحغ.

⁷ ڒخُّو وَار خْسغ شَا اَكنِّيو ࢲْرغ مِينْزِي اَخَاوم د كّغ وَاهَا؛ لَّا، تْمنِّيغ عَاذ اَكِذْوم قِّيمغ يجّن ن لْمُدَّا يعْنِي مڒَا يخس أَربِّـي.

⁸ نش اَذ قِّيمغ ذِي ثنْدِينْت ن ؤُفَسُوْس اَڒ غَا د يَاوض ڒْعِيذ ن نْهَار وِيس خمْسِين.

⁹ أَقَا ثْنُوْرْزم-اَيِي-د يجّن ن ثوَّارْث ذ ثَمقّْرَانْت إِ ڒْخذْمث وَلَكِن يِنِّي إِݣ يتْعَارَّاضن اَقَاثن مُوْجُوْدِين.

¹⁰ مڒَا يُوْسَا-د تِيْمُوْتَاوُس تْهلَّام ذَايس مْلِيح بَاش وَار ذَايس يتِيڒِي شَا ومْنُوْس ڒَاحقَّاش نتَّا يتݣّ ڒْخذْمث ن سِيذِيثْنغ اَمشْنَاو نش.

¹¹ ئِتْخصَّا ؤُڒَا ذ يجّن وَار ٱث يسحْقَار شَا. عَاوْنم-ث ذݣ ؤُسَفَار نّس بَاش اَغَارِي د يعْقب ذِي ڒهْنَا ڒَاحقَّاش نش تْڒَاجِيغ-ث اَك أَيثْمَاثْنغ.

¹² أُو عْلَاحْسَاب ؤُمَاثْنغ أَپُـوْلُّوْس، تَّارغ زَّايس اَطَّاس حمَا اَغَارْوم د يَاس اَك أَيثْمَاثْنغ نّغْنِي وَلَكِن نتَّا يُوْݣِي اَغَارْوم د يَاس ڒخُّو. أَغَارْوم د يَاس اَخْمِي اَغَارس ثِيڒِي يجّن ن لْفُرْصَا.

¹³ إِڒِيث عْلَابَال، بدّث نِيشَان ذِي لْإِيمَان، إِڒِيث ذ يرْيَازن، إِڒِيث ثْجهْذم.

¹⁴ مَارَّا مِين غَا ثݣّم كنِّيو تݣّم-ث س ڒمْحِبّث.

^15-16 أَقَا ثسّْنم سِتِيفَانُوْس ذ ڒحْبَاب نّس ذ نِثْنِي إِي يُوْمْنن زِي لْمَسِيح ذ يمزْوُوْرَا ذِي لْإِقْلِيم ن ؤُخَايَا، طوّْعن يخف نْسن اَذ سخَّارن إِ ڒْمُوْمِنِين صَّالِحِين. آي أَيثْمَا، تتَّارغ زَّايْوم اَذ تْثْطَاعم إِ يِوْذَان-أَ اَم يِيْنَا أُو ذ يِنِّي مَارَّا يشَرّْشن ذِي ڒْخذْمث-أَ تَمَارَان ذَايس اَطَّاس.

¹⁷ نش فَرْحغ وَامِي د ؤُسِين سْتِيفَانُوْس ذ فُرْتُوْنَاوْس ذ أَخيكُوْس ڒَاحقَّاش عمَّارن يمُوْشَان نْوم.

¹⁸ نِثْنِي سْريَّاحن ؤُڒ ينُو ذ وُوْڒ نْوم. إِيوَا وقَّرث يوْذَان اَم يِيْنَا.

لْخِتَام ن ثبْرَات-أَ

¹⁹ ثِجُمَاع ن ڒْمُوْمِنِين ذِي لْإِقْلِيم ن آسْيَا تْسدْجَامنْت-يد خَاوم. أَكِيلَاس ذ پْـرِيسْكِيلَا ذ يِنِّي يدْجَان ذِي جْمَاعث ن ڒْمُوْمِنِين ذِي ثدَّارْث نْسن تْسَادْجَامن-د خَاوم اَطَّاس ذِي سِيذِيثْنغ.

²⁰ تْسدْجَامن-د خَاوم مَارَّا أَيثْمَاثْنغ. سدْجَامم خ وَايَاوْيَا س يِجّن ن سْڒَام يصْفَا.

²¹ سْڒَام-أَ ؤُرِيغ-ث نش بُوْلُس س وفُوْس ينُو.

²² ونِّي وَار يخْسن شَا سِيذِيثْنغ اَذ يتْوَاحَارّم. أَرَاح-د آ مَوْلَانَا!

²³ أَرْضَا ن سِيذِيثْنغ عِيْسَى اَكِذْوم يِيڒِي.

²⁴ ڒمْحِبّث ينُو اَكِذْوم ثِيڒِي كنِّيو مَارَّا ذِي عِيْسَى لْمَسِيح. آمِين.