1 أيث-كورينث 14 - ثريفيث 2020

ثْنَاين لْقُدْرَاث رُوْحِيَاث وَار تْوَافْهِيمنْت شَا مْلِيح

¹ ذْفَارث اَبْرِيذ ن ڒمْحِبّث، رْزُوْث مْلِيح خ لْقُدْرَاث رُوْحِيَاث خَاصَّتَن ثنِّي ن وَاوَاڒ يتْوَاعڒْمن زِي أَربِّـي.

² شُوْف، ونِّي يسَّاوَاڒن س لُّغَا رُوْحِيَا، مَا يسَّاوَاڒ اَك يِوْذَان؟ لَّا، ئِسَّاوَاڒ اَك أَربِّـي. وَار ذِنِّي حَدّ إِي ذَاس يفهّْمن، ئِقَّار ثِمسْڒَايِين س أَرُّوْح يقدّْسن ذَايْسنْت ڒْمَعْنَاث ينُوْفَّرن.

³ وَلَكِن ونِّي يسَّاوَاڒن اَك يِوْذَان س مِين يعْڒم زِي أَربِّـي اَتَاف يسَّاوَاض-اَسن يجّن ن وَاوَاڒ بَاش اَذ تْوَاجهّْذن اَذ تْوَاشجّْعن اَذ تْوَاصبَّرن.

⁴ ونِّي يسَّاوَاڒن س لُّغَا رُوْحِيَا يسْتنْفَاع يخف نّس. ونِّي يسَّاوَاڒن س مِين يعْڒم زِي أَربِّـي يسْتنْفَاع جْمَاعث ن ڒْمُوْمِنِين.

⁵ إِيوَا خْسغ مَارَّا كنِّيو اَذ تسِّيوْڒم س لُّغَاث رُوْحِيَاث، وَلَكِن مْلِيح عَاذ اَذ تسِّيوْڒم س وَاوَاڒن إِي ثْعڒْمم زِي أَربِّـي. ونِّي يسَّاوَاڒن س وَاوَاڒ إِݣ يعْڒم زِي أَربِّـي نتَّا يمْغَر خ ونِّي يسَّاوَاڒن س لُّغَاث رُوْحِيَاث، إِلَّا مڒَا شَان يِجّن اَذ يسْتَرْجم حمَا اَذ يسْتنْفع جْمَاعث ن ڒْمُوْمِنِين.

⁶ فَا ڒخُّو آي اَيثْمَا، مڒَا ؤُسِيغ-د غَارْوم سَّاوَاڒغ نش س لُّغَاث رُوْحِيَاث، مَان نّْفَع إِي زِي كنِّيو غَا نفْعغ إِلَّا مڒَا ؤُوِيغ-اَوم-د شَا ن لْوَاحِي نِغ شَا ن ثُوْسْنَا نِغ شَا ن وَاوَاڒ إِي عڒْمغ زِي أَربِّـي نِغ شَان ن تَّعْلِيم؟

⁷ أَمنِّي ؤُڒَا ذ لْأَلَاث ن لْمُسِيقَا وَار ذَايْسنْت بُو بُوْحْبڒ اَم ثمْجَا نِغ اَم ثْݣَامْبْرِيت. مڒَا وَار ثْصُوْضذ نِيشَان وَار ثْنقْطذ وَار ذَاش تِيشّن بُو نّغْمَا، وَار ثْزمَّرذ اَذ تسّْنذ لْمُوْسِيقَا نِّي مِين ثعْنَا.

⁸ عَاوذ اَمشْنَاو زَّمَّار، مڒَا وَار ذَايس ثْصُوْضذ شَا س يِجّن ن ثْمِيجَّا ثصْفَا، وِي غَا يسْوجْذن إِ ڒْحَارْب؟

⁹ أَمُّو عَاوذ ؤُڒَا ذ كنِّيو، مڒَا تْوجْوِيجم وَاهَا س وَاوَاڒ نْوم، وِي ذَاوم غَا يفهْمن مِين ثقَّارم؟ أَتَاف اَوَاڒ نْوم كنِّيو اَم ونِّي يسَّاوَاڒن ذِي ڒهْوَا!

¹⁰ بْڒَا شّكّ دْجَان اَطَّاس ن لْأَنْوَاع ن لُّغَاث ذِي دُّنشْت-أَ، وَلَكِن كُڒ يشْت س ڒْمَعْنَا نّس.

¹¹ إِيوَا مڒَا نش وَار سِّينغ شَا ڒْمَعْنَا ن لُّغَا نِّي، أَتَاف نش اَذ يڒِيغ اَم يِجّن ذ اَبَرَّانِي اَك ونِّي يسَّاوَاڒن اَتَاف نتَّا عَاوذ اَكِذِي يِيڒِي اَم يِج وبَرَّانِي.

¹² إِيوَا كنِّيو، وَامِي ثْرزُّوْم اَطَّاس خ لْقُدْرَاث رُوْحِيَاث، ݣّث لْمجْهُوْد نْوم حمَا اَذ تَرْنُوْم ذِي ثِنِّي إِي زِي يسْتنْفَاعن جْمَاعث ن ڒْمُوْمِنِين.

¹³ س مَانَاينِّي، ونِّي يسَّاوَاڒن س لُّغَاث رُوْحِيَاث يتْخصَّا-يَاس اَذ يࢲَّادْجْ حمَا اَذ يسْتَرْجم مِين يقَّار.

¹⁴ لِأَنَّا مڒَا ࢲُّوْدْجغ س لُّغَا رُوْحِيَا، أَرُّوْح ينُو يتْࢲَادْجَا وَلَكِن ڒَعْقڒ ينُو وَار يسْتنْفِيع شَا.

¹⁵ إِيوَا مِين غَا ݣّغ؟ أَذ ࢲَّادْجغ س اَرُّوْح ينُو، أَذ ࢲَّادْجغ عَاوذ س ڒَعْقڒ ينُو. أَذ غنّْجغ س اَرُّوْح ينُو، أَذ غنّْجغ عَاوذ س ڒَعْقڒ ينُو.

¹⁶ مڒَا تْشكَّرذ أَربِّـي س اَرُّوْح وَاهَا، ونِّي إِي غَارْوم د يُوْسِين س زِّيَارَا وَار يزمَّر اَذ يِينِي آمِين خ شُّكر نّش لِأَنَّا وَار يسِّين شَا مِين ثقَّارذ.

¹⁷ وَاه، يمْكن شك ثْشكَّرذ أَربِّـي وَلَكِن ونِّي نّغْنِي وَار ث ينفّع شَا.

¹⁸ تْشكَّرغ أَربِّـي نش سَّاوَاڒغ س لُّغَاث رُوْحِيَاث كْتَار زَّايْوم مَارَّا.

¹⁹ إِنَّمَا، مڒَا سِّيوْڒغ اَك جْمَاعث ن ڒْمُوْمِنِين غِير س خمْسَا ن وَاوَاڒن اَتَاف اَذَايِي فهّْمن حْسن زِي مڒَا سِّيوْڒغ س عشْرَاڒَاف ن وَاوَاڒن س يِجّن ن لُّغَا رُوْحِيَا.

²⁰ لَّا آي اَيثْمَا، وَار تْفكَّرث شَا اَم يحنْجِيرن يمزْيَانن. إِڒِيث اَم يسيْمَان ذِي شَّرّْ؛ إِڒِيث اَم يمقّْرَانن عْلَاحْسَاب ڒَعْقڒ.

²¹ ئِقَّار ذِي شَّرِيعَا ن مُوْسَى: "نش اَذ سِّيوْڒغ اَڒ يِوْذَان-أَ س لُّغَاث ن يثَرَّاسن س يينْشِيشن ن يبَرَّانِيْين، وَاخَّا اَمنِّي وَار ذَايِي تْصنِّيطن شَا. مَانَايَا يقَّار-يث سِيذِي أَربِّـي."

²² س وَاوَاڒ-أَ، لُّغَاث رُوْحِيَاث نِثنْتِي ذ يجّن ن لْعَلَامَا وَار ثدْجِي بُو إِ يِنِّي يُوْمْنن؛ لَّا، أَقَات إِ يِنِّي وَار يُوْمِينن شَا. وَلَكِن اَوَاڒ نِّي يتْوَاعڒْمن زِي أَربِّـي يسْتنْفَاع يِنِّي يُوْمْنن مَاشِي إِ يِنِّي وَار يُوْمِينن شَا.

²³ إِذن، مڒَا ثْمُوْنم جْمَاعث ثكْمَاڒ ن ڒْمُوْمِنِين ثسَّاوَاڒم مَارَّا س لُّغَاث رُوْحِيَاث ؤُذْفن-د جَارَاوم يِوْذَان ن بَارَّا نِغ ذ لْكُفَّار، أَتَاف قَّارن خَاوم قَا يوْذَان-أَ ذ يبُوْهَاڒِيْين.

^24-25 وَلَكِن، مڒَا ثسَّاوَاڒم مَارَّا كنِّيو س وَاوَاڒن إِي ثْعڒْمم زِي أَربِّـي يُوْذف-د جَارَاوم حَدّ زِي بَارَّا نِغ ذ يجّن ن لْكَافِر، أَتَاف اَذ يحسّ ذݣ يِيخف نّس قَا اَذ يتْوَاحَاسب اَذ يقْنع زَّايْوم مَارَّا نتَّا ذ لْعَاصِي، أَتَاف اَزَّايس تْوَاسُوْفْغن مَارَّا لْأَسْرَار ن وُوْڒ نّس. ثُمَّا اَذ يسجّذ اَذ يعْبذ أَربِّـي اَذ يِينِي قَا أَربِّـي ذ صَّح اَقَاث جَارَاوم!

نِّيظَام إِي يدْجَان ذِي لْعِبَادَا ذِي جْمَاعث ن ڒْمُوْمِنِين

²⁶ إِذن فَا آي اَيثْمَا، خْمِي غَا ثْمُوْنم يجّن اَغَارس يِيڒِي يجّن ن وغنِّيج، ئِجّن اَغَارس يِيڒِي يجّن ن وَاوَاڒ ن وسڒْمذ، ئِجّن اَغَارس يِيڒِي لْوَاحِي، ئِجّن اَغَارس ثِيڒِي لُّغَا رُوْحِيَا، ئِجّن اَغَارس ثِيڒِي تَّرْجَمَا. مَارَّا ثِمسْڒَايِين-أَ اَذ يڒِينْت حمَا اَذ تْجهْذم.

²⁷ مڒَا ثسِّيوْڒم س يِجّن ن لُّغَا رُوْحِيَا، لَابُد اَذ تسِّيوْڒم ثْنَاين نِغ ثْڒَاثَا أُو صَافِي. أَذ تسِّيوْڒم ئِج-يج، أُو لَابُد اَذ يقِّيم يجّن زَّايْوم اَذ يسْتَرجم.

²⁸ مڒَا وَار ذِنِّي حَدّ اَذ يسْتَرْجم، ونِّي يسَّاوَاڒن اَذ يسْتُوْك اَذ يسِّيوڒ ذݣ وُوْڒ نّس ذ أَربِّـي.

²⁹ فَا لْأَنْبِيَا أُو لَابُد اَذ سِّيوْڒن ثْنَاين نِغ ثْڒَاثَا. ئِنّغْنِي اَذ ميّْزن اَوَاڒن نِّي.

³⁰ مڒَا يهْوَا-د شَا ن وَاوَاڒ ن لْوَاحِي خ شَان يِجّن جَار ن يِنِّي يقِّيمن جَارَاوم، أَتَاف ونِّي يسَّاوَاڒن ذ اَمزْوَارُو اَذ يسْتُوْك.

³¹ لِأَنَّا ثْزمَّرم مَارَّا اَذ تسِّيوْڒم س مِين ثْعڒْمم زِي أَربِّـي ئِج-يج حمَا مَارَّا ڒْمُوْمِنِين اَذ ڒمْذن اَذ تْوَاشجّْعن.

³² وَا لْقُدْرَاث رُوْحِيَاث ن لْأَنْبِيَا اَقَاثنْت خ يِيرِي نْسن س يِيخف نْسن.

³³ لِأَنَّا أَربِّـي وَار يدْجِي بُو ن ڒْفَاوْضَا وَلَكِن ن ڒهْنَا. ذ ثَانِيتَا ذ لْعَادَا إِي ذَايْسنْت ذِي مَارَّا ثِجُمَاع ن ڒْمُوْمِنِين.

³⁴ ثِمْغَارِين ذِي ثْجُمَاع ن ڒْمُوْمِنِين لَابُد اَذ قِّيمنْت سْتُوْكَانْت. وَار ذَاسنْت يتْوَاسْمِيح شَا اَذ سِّيوْڒنْت. لَابُد اَذ تْسذْحَانْت مَامّش ثقَّار شَّرِيعَا ن مُوْسَى.

³⁵ مڒَا رزُّوْنْت اَذ سّْننْت شَان ثْمسْڒَايْث، لَابُد اَذ سّقْسَانْت يرْيَازن نْسنْت ذِي ثدَّارْث. لِأَنَّا ثَمْغَارْث ذ ڒْعِيب اَذ تسِّيوڒ ذِي ڒْوسْط ن جْمَاعث ن ڒْمُوْمِنِين.

³⁶ أَوَاڒ ن أَربِّـي، مَا يفّغ-د زَّايْوم كنِّيو؟ مَا يُوْوض-د غَارْوم كنِّيو وَاهَا؟

³⁷ مڒَا يجّن يحسّب يخف نّس نِيشَان ذ نَّبِي نِغ ذ يجّن ن بْنَاذم رُوْحِيَا اَتَاف أُو لَابُد اَذ يقْبڒ مِين ذَاوم د تَارِيغ ذِي ثبْرَات-أَ نتَّاث ذ ڒُوْصِيّث ن سِيذِيثْنغ.

³⁸ مڒَا وَار يقْبِيڒ شَا مَانَايَا، وَار يتْوَاقبِّيڒ شَا نتَّا.

³⁹ س مَانَايَا آي اَيثْمَا، رْزُوْث اَطَّاس حمَا اَذ تسِّيوْڒم س وَاوَاڒ يتْوَاعڒْمن زِي أَربِّـي، أُو عَاوذ وَار منَّاعْث شَا يوْذَان اَذ سِّيوْڒن س لُّغَاث رُوْحِيَاث.

⁴⁰ وَلَكِن يتْخصَّا-كنِّيو اَذ تݣّم كُڒْشِي مَعْقُوْل س يِجّن ن نِّيظَام نِيشَان.