1 أيث-كورينث 10 - ثريفيث 2020

ثَغنَّانْت ن أَيث-إِسْرَائِيل نتَّاث ذ يجّن ن لْعِبْرَا إِ نشِّين

¹ شُوْف آي اَيثْمَا، وَار خْسغ شَا اَذ تتُّوْم بلِّي ڒجْذُوْذ نّغ تُوْغَاثن قَاعِين سْوَادَّاي إِ وسيْنُو نِّي يحطَّا-ثن. مَارَّا نِثْنِي ࢲْوَان غَار ؤُجمَّاض-ين ن ڒبْحَر اَزݣّْوَاغ.

² مَارَّا نِثْنِي تْوَاطهَّارن س وَامَان عْلَاحْسَاب مُوْسَى وَامِي عْذُوْن ذݣ وسيْنُو نِّي ذ ڒبْحَر نِّي.

³ مَارَّا نِثْنِي شِّين زݣ يِجّن ن لْمَكْلَا رُوْحِيَا.

⁴ مَارَّا نِثْنِي سْوِين زݣ يِجّن ن ثْسسِّي رُوْحِيَا. لِأَنَّا نِثْنِي سْوِين زݣ وغْبَاڒ نِّي ن وزْرُو رُوْحِيَا إِي ثن يذفَّارن، أَغْبَاڒ نِّي ن وزْرُو تُوْغَاث نتَّا ذ لْمَسِيح.

⁵ وَاخَّا اَمنِّي ڒبْعَاض زَّايْسن وَاهَا مِيخف يَارْضَا أَربِّـي، ينّغْنِي منْضَارن ذِنِّي ذ يمُّوْرْضَاس ذِي ڒخْڒَا نِّي.

⁶ ثِمسْڒَايِين-أَ وقْعنْت ذ يجّن ن لْعِبْرَا إِ نشِّين. مَايمِّي؟ بَاش وَار ذَايْنغ يتِيڒِي مزْڒِي خ شَّرّْ مَامّش تُوْغَا شهَّان نِثْنِي.

⁷ وَار عبّْذث شَا لْأَصْنَام مَامّش ݣِّين ڒبْعَاض زَّايْسن. مَامّش يقَّار لْكِتَاب: <ئِوْذَان نِّي قِّيمن اَذ سْون اَذ شّن، أُوْشَا كَّرن اَذ زْهُوْن.>

⁸ ئِتْخصَّا وَار نْفسّذ شَا مَامّش ݣِّين ڒبْعَاض زَّايْسن، مُّوْثن وْضَان غَار ثْمُوْرْث شَان ثْڒَاثَا أُو عِشْرِين اَڒَاف زَّايْسن ذݣ يِجّن ن نْهَار.

⁹ ئِتْخصَّا وَار نْزعّم شَا أَ نْࢲر مِين غَا يݣّ لْمَسِيح، مَامّش ݣِّين ڒبْعَاض زَّايْسن أُوْشَا تْوَانْغن س يفِيغرَان.

¹⁰ ئِتْخصَّا وَار نتْشثْشَا شَا مَامّش ݣِّين ڒبْعَاض زَّايْسن وَامِي خَاسن يقْضَا عَزْڒَاين.

¹¹ وقْعنْت-اَسن ثِمسْڒَايِين-أَ ذ يجّن ن لْعِبْرَا إِ نشِّين. زمّْمن-ثنْت حمَا اَزَّايْسنْت نڒْمذ نشِّين، يعْنِي خضْڒنْت-يد خَانغ اَڒ ونݣَّارُو-يَا ن زْمَانَاث.

¹² س مَانَايَا ونِّي ؤُمِي يتْغِيڒ-اَس قَا يبدّ وَار يوطِّي شَا، ئِتْخصَّا-يَاس اَذ د يَارّ ڒْبَاڒ نّس.

¹³ ثِمسْڒَايِين نِّي ثِنِّي إِݣ يتِيڒِين ڒبْدَا اَك بْنَاذم ذ ثِنِّي إِي كنِّيو يتْغَارَّان. أُو أَربِّـي نتَّا ذَايس تِّقث، وَار كنِّيو يتجِّي شَا اَذ تْوَاغَارَّام س مِين وَار ثْزمَّرم اَذ تصْبَرم؛ لَّا، أَذَاوم يذبَّر يجّن ن ثوَّارْث حمَا اَذ تصْبَرم إِ مَانَاينِّي.

¹⁴ س مَانَاينِّي آي يمْعِيزّن ينُو، اَروْڒث زِي لْأَصْنَام.

¹⁵ سَّاوَاڒغ اَكِذْوم غَارْوم ڒَعْقڒ نْوم، ميّْزث مِين قَّارغ مَا ذ صَّح مَا لَّا.

¹⁶ ڒْكَاس نِّي ن لْبَرَكَا إِي زِي نتْبَرَاك نشِّين، زَّايس إِي نْشَرّش ذݣ يذَامّن ن لْمَسِيح. أَغْرُوْم نِّي إِي نتْرزَّا، زَّايس إِي نْشَرّش ذِي دَّات ن لْمَسِيح.

¹⁷ ذِنِّي يجّن ن ثْخبَّاسْت ن وغْرُوْم وَاحْذس، س سَّبَاب-أَ نشِّين ذ يجّن، وَاخَّا ذِنِّي اَطَّاس إِي إِذْنغ. مِينْزِي نشِّين مَارَّا إِذْنغ نْشَرّش ذݣ يِجّن ن ثْخبَّاسْت.

¹⁸ فكَّرث ذِي أَيث-إِسْرَائِيل، يَاك يِنِّي يتتّن دْبِيحَاث نِثْنِي شَرّشن ذِي ڒْمذْبَاح نِّي، نِغ لَّا؟

¹⁹ مِين خْسغ نش اَذ ينِيغ؟ مَا قَّارغ بلِّي لْمَكْلَا نِّي يتْقدَّامن إِ لْأَصْنَام نتَّاث ذ شَا ن ڒْحَاجث؟ نِغ قَّارغ بلِّي لْأَصْنَام نِثْنِي ذ شَا ن ڒْحَاجث؟

²⁰ لَّا، وَلَكِن قَّارغ بلِّي مِين غَرّْصن لْكُفَّار ذ دْبِيحَاث تْقدَّامن-ثنْت إِ شَّيَاطِين مَاشِي إِ أَربِّـي. نش وَار خْسغ شَا اَكِذْسن ثْشَرْشم اَك شَّيَاطِين.

²¹ وَار ثْزمَّرم شَا اَذ تسْوم زِي ڒْكَاس ن سِيذِيثْنغ نِغ زِي ڒْكَاس ن شَّيَاطِين س ثْنَاين إِذْسن. وَار ثْزمَّرم شَا اَذ تْشَرْشم ذِي مِيسَّا ن سِيذِيثْنغ ذ مِيسَّا ن شَّيَاطِين س ثْنَاين إِذْسنْت.

²² مَا نْرزُّو أَ نسْعصّب سِيذِيثْنغ س لْغِرَا؟ نِغ مَا نجْهذ خَاس نشِّين؟

لْحُرِّيَا ن ڒْمُوْمِنِين

²³ مَارَّا ثِمسْڒَايِين حدْجْڒنْت، وَلَكِن مَاشِي مَارَّا ثِمسْڒَايِين تسْتنْفَاعنْت. مَارَّا ثِمسْڒَايِين حدْجْڒنْت، وَلَكِن مَاشِي مَارَّا ثِمسْڒَايِين اَذَانغ سْجهْذنْت.

²⁴ وَار رزُّوْث شَا ڒْخِير إِ يِيخف نْوم، رْزُوْم-ث إِ وَاجَّار نْوم.

²⁵ شّث مِين مَا ثُوْفِيم يتْمنْزَا ذِي سُّوْق ن يݣزَّارن، وَار تْسقْسَام شَا جّث ضَّمِير نْوم مرْتَاح.

²⁶ لِأَنَّا يقَّار: <ثَمُوْرْث-أَ نتَّاث ذ مَارَّا مِين ذَايس ن سِيذِي أَربِّـي.>

²⁷ مڒَا شَان يِجّن مَاشِي ذ ڒْمُوْمن يعَرض-يكنِّيو بَاش اَذ تشّم اَكِذس أُو كنِّيو ثْرزُّوْم اَذ تْرَاحم، شّث مِين مَا ثُوْفِيم سرْسن-ت زَّاث نْوم وَار تْسقْسَام شَا، جّث ضَّمِير نْوم مَرْتَاح.

²⁸ وَلَكِن مڒَا ينَّا-ٱوم حَدّ قَا مَانَايَا قدّْمن-ث ذ دْبِيحث إِ لْأَصْنَام، وَار ت تتّم شَا. مَانَايَا عْلَاحْسَاب ونِّي إِي ذَاوم ث يقَّارن أُو عْلَاحْسَاب ضَّمِير.

²⁹ يعْنِي ضَّمِير ن ونِّي إِي كنِّيو يعَرْضن، مَاشِي ذ ضَّمِير نْوم. ڒَاحقَّاش نش مَايمِّي ضَّمِير ن يِجّن نّغْنِي اَذ يحْكم خ لْحُرِّيَا ينُو؟

³⁰ مڒَا شكَّرغ أَربِّـي خ شَان لْمَكْلَا، مَايمِّي إِي ذَايِي غَا حَاسْبن خ مَانَاينِّي إِي زِي شكَّرغ أَربِّـي؟

³¹ إِذن، مڒَا ثْسسّم نِغ تتّم نِغ مِين مَا تݣّم، ݣّث مَارَّا مَانَاينِّي بَاش اَذ يتْوَاسمْغَار أَربِّـي.

³² وَار غطّْڒث حَدّ وَاخَّا نِثْنِي ذ يسْرَائِيْلِيْين نِغ ذ ييُوْنَانِيْين نِغ ذ جْمَاعث ن ڒْمُوْمِنِين ن أَربِّـي.

³³ نش رزُّوْغ اَذ سَارْضِيغ مَارَّا يوْذَان ذِي مَارَّا مِين تݣّغ. وَار رزُّوْغ شَا ڒْخِير إِ يِيخف ينُو، رزُّوْغ-ث إِ مَارَّا يوْذَان بَاش اَذ نجْمن.