Yohane 6 - MMA SHIYYA

¹ Numa Yesu kakwimboo kaenda kwa kulya ya nruva ya Galilaya ya kulya Tiberia.

² Na isyamu iingi likansoṛa, fulya veelloliaa myorusie ilya minini andetana ya ikiṛa vandu valole.

³ Yesu kaaṛukia uron kakaa-fo rembo andu emwi na vaseṛo vamwi.

⁴ Na nkonu ulya nnini wa Vayuda ulya wa Pasaka wikee kufui.

⁵ Yesu kaimboo miso kalolia isyamu iingi lya vandu liinsheaa. Kaia Filipo: Nkwi tuuṛaa mikate vandu va woose valye?

⁶ Ikyo anderera kya imwelelia. Amu ye muni eeshi kilya atanaa.

⁷ Filipo kamwaṛua: Mikate ya shilingi mayana avili ivafilaa na akwaa nndu awaria kibeṛeshu tubu ndi.

⁸ Na umwi wa vanalosho vamwi yye Anderera mwanamae wa Simon Petiro kamwia:

⁹ Ayo mwana umwi wa woomi awore mikate iraanu ya ngano shuu na makunga avili. Kake ifi fitanaa ki na vandu va vafile kuri?

¹⁰ Kanumbua: Songosień vandu wo rembo! Na io vakaa eeworee mooṛo mwiingi wa maṛe. Na va-seṛo wo veeyoo veekee sha fiku firaanu.

¹¹ Yesu kawaria mikate ilya iraanu kaana Iṛuva kaavia vandu valya veekee rembo. Na makunga alya mfo kuro da kavaavia sheeli vafurie.

¹² Neeli vandu vandewuura, kaia vaseṛo vamwi: Saṅiṛień fibeṛeshu filya foose fasaa, manya mutaree-wo nta kimwi!

¹³ Vakasaṅiṛia vakaishuṛa mikusha ikumi na ivili fibeṛeshu fa mikate ilya iraanu, mfilya findesaa ili vallya.

¹⁴ Kyasia ili vandu vandelolia myorusie ilya Yesu andetana, vakanumbua: Nkya dede uu yye mwauya fisuku ulya ashaa isangeń.

¹⁵ Kyasia ili Yesu andemanya sheeli vafurie isha vawware na finya vamwaṛue mangi, kauka kari kawo kaenda na kulya uroń ye muni.

¹⁶ Neeli kundeila vanalosho vamwi vakaoloka na kulya mbaambaa ya nruva.

¹⁷ Vakaaṛukia ngalaveń vakabooka iṛuka nruva vafike Kaperinaumu. Llema ukawara kitaare Yesu awafikia.

¹⁸ Na nruva ikabooka ikoola iivititwaa mmburaato nini.

¹⁹ Ili vandeenda kyeenga kya saa na mmwasi kinnya, vakalolia Yesu eendaa eeiraa kwa ule ya nruva na iserikia ngalava. Nawo vakaeṛea.

²⁰ Nae kavaia: Nniń, manya muteeṛee!

²¹ Nawo vakafura insaamisa ngalaveń. Lia eni vakakooya ngalava yamfika mbaai ya uruka lua veekee yenda.

²² Neeli lya ndesi syamu ilya iiselelee kwa kulya ya nruva ikalolia sheeli kitaare iifo ngalava ingi kulya kita ilya imwi iifoo. Na Yesu nta andeaṛukia andu emwi na vanalosho vamwi ngalaveń ilya ndi. Vvanalosho vamwi vandeenda wo veni.

²³ Kyasia tikasha ngalava tingi tuuka kulya Tiberia tikafika kufui na alya valiya mikate, ili Nndumi ammaa yaana Iṛuva.

²⁴ Kyasia ili isyamu lia lindelolia, sheeli Yesu atakiiyo ana nta vanalosho vamwi, vakasaama ngalaveń wo veni. Vakafika Kaperinaumu veeṛuyaa Yesu.

²⁵ Vakankooya ammaa iṛuka kafika taari ilya ingi ya nruva. Vakamwia: Llosha, iwe kwafika iri ki kunu?

²⁶ Yesu kavaaṛua kanumbua: Nkue nkue namuia: Ini nta mukee ishiṛuya kiimba kya myorusie ilya mundelolia ndi, nkiimba kya mikate ilya mundelya mukawuura.

²⁷ Manya mutakwatarie mashoṛa a shoonga ikashaa, kwatarień shoonga yo ikaa kumande muu wa miṛeṛe. Nayo yyo Mwana wa nndu amuniingaa, amu ito yye anderwaywa kiringisio nNdee yye Iṛuva.

²⁸ Kyasia vakamwia: Titanaań are amu timakii iṛunda mashoṛa wo a Iṛuva?

²⁹ Yesu kaaṛua kavaia: Iva wwo mashoṛa a Iṛuva ni ikusura ito anderumwa yye.

³⁰ Vakamwuṛa lingi: Mmyorusie ingai kutanaa amu tilolie tikukusure? A nkiki iwe kumuni kukee ikurambua nakyo?

³¹ Vaande yeru valye Manna kulya bateń, sheeli kyatisiṛwa: ”Andevaniinga nkate uuka iṛuvewu valye.“

³² Yesu kavaia: Nkue nkue namuia: Mmose amuniingie nkate to uukie iṛuvewu ndi. Kake nNde yakwa yye amuniinga nkate to uukie iṛuvewu ukee wa dede.

³³ Amu nkate wa Iṛuva ni ulya aoloka auka iṛuvewu kaniinga va isangeń muu.

³⁴ Vakamwia: Nndumi, tiniinge nkate to mikonu yoose.

³⁵ Yesu kavaia: Niń nniń nkate to wa muu! Nndu kasha kwakwa akiliwaa lingi nsoto ndi. Na ulya ashikusuraa niń akiwarwaa nnyura nta nkonu umwi ndi.

³⁶ Kake neemmuiaa: Ilolia mwanshilolia nta mutautie-wo ishikusura.

³⁷ Woose Nde anshiniinga wwo vashaa kwakwa. Na ulya ashaa na kwakwa mmuumbutaa na wooṛo ndi.

³⁸ Amu kishinnde nuuka iṛuvewu ni ishetana kilya nkundie niń ndi, nkilya kikundio̱ ni ito ashirumie.

³⁹ Na kilya kikundio̱ ni ito ashirumie nkyo iki: Nkindo kyoose ankishiniinga, kaaṛa ntarete-wo nta kimwi. Kake nkiṛute nkonu wa ifurumia.

⁴⁰ Amu ii yyo mifurie ya Nde yakwa: Ulya woose allaa Mwana na inkusura ave na muu wa miṛeṛe na miṛeṛe, nań nindutaa nkonu wa ifurumia.

⁴¹ Kyasia Vayuda vakaṅṅuṅuria, fulya anumbua: Nniń nkate waoloka uuka iṛuvewu.

⁴² Vakanumbua: Uu yye Yesu mwana wa Yosefu se? A ise tiishi ndee na mae se? A alli naare akee inumbua: Namooloka nuuka iṛuvewu?

⁴³ Yesu kaaṛua kavaia: Manya mutaṅuṅure ini mu veni na mu veni!

⁴⁴ Eefo nndu amakii isha kwakwa kitaare aitikwa Vvaava uu ashirumie ndi, nań nindutaa nkonu wa ifurumia.

⁴⁵ Nkitisiṛe vvaauya fisuku sheeli: Nawo woose vavaa valoshe ni Iṛuva. Kyasia ulya woose aaranyaa na ikulosha kwa Nde, ashaa kwakwa.

⁴⁶ Nta eefo nndu allolia Nde kitaare ni ito aukie kwa Iṛuva, yye allolia Nde.

⁴⁷ Nkue namuia kya dede: Ulya akusurie awwaria muu wa miṛeṛe na miṛeṛe.

⁴⁸ Niń nniń nkate wa muu.

⁴⁹ Vakuuku vanu wo valye Manna kulya bateń na ifwa vakafwa.

⁵⁰ Kake nkate uu nausenda to uukie iṛuvewu, na nndu aulyaa akifwaa kutu ndi.

⁵¹ Niń nniń nkate to uukie iṛuvewu uwore muu. Na nkate to nndu kaulya alunganaa na muu. Na nkate uu nuuniingaa ni vvili wakwa uniingio̱o̱ amu va isangeń vakooye ikia muu.

⁵² Kyasia Vayuda vakavingana wo veni na veni veenumbuaa: Nndu uu amakii itiniinga are vvili wamwi tiule?

⁵³ Kyasia Yesu kavaia: Nkue nkue namuia: Mutallya vvili wa Mwana wa nndu na inwa usao lwamwi mukooyaa muu kari kanu ndi.

⁵⁴ Ulya alyaa vvili wakwa na inwa usao lwakwa awore muu wa miṛeṛe. Nań nindutaa nkonu wa ifurumia.

⁵⁵ Amu vvili wakwa nshoonga ya dede na usao lwakwa nkya inwa kya dede.

⁵⁶ Na ulya alyaa vvili wakwa na inwa usao lwakwa akaa akuvavie nań, nań nkaa nkuvavie nae.

⁵⁷ Na sheeli Nde ito ashirumie akee muni muu, nań nakaa na muu kiimba kya Nde, mfo kuro na ulya ashilyaa niń akaa na muu kiimba kyakwa.

⁵⁸ Uu nto nkate wolokie uuka iṛuvewu, nsha ulya vaande yanu vandelya vakafwa ndi. Kake nkate to nndu kaulya ito akaa na muu miṛeṛe.

⁵⁹ Firero fo afireria numba ya iterevia, ili eeloshaa ifo Kaperinaumu.

⁶⁰ Kyasia veengi va vanalosho vamwi ili vandeita kuri, vakanumbua: Firero fi mfuumu. A nndu amakii ifiaranya yye i?

⁶¹ Na Yesu kamanya ye muni ifo nrimiń sheeli vanalosho vamwi vakee iṅuṅuria kirero kyo. Kavaia: A kirero kyo kyamuvia nsindaṛa?

⁶² A kivaań are ili mukaa mulolie Mwana wa nndu eerwaa na ule ifo eekee ilyo mbele?

⁶³ Mumuyo nto aniingiaa muu, vvili ufile kindo ndi. Na firero fo namuia mfo fa mikae ya Mumuyo, lingi mfa muu.

⁶⁴ Kake veefo kiindi kari kanu vatakusurie. Amu Yesu eeishii kuuka mbele wangava vatankusurie, na nndu andiingaa ni ungau.

⁶⁵ Kanumbua: Nkyo kiteveto namuia: Eefo nndu amakii ifika kwakwa kitaare aelekio̱ nNde yakwa ndi.

⁶⁶ Kuuka io veengi va vanalosho vamwi vakauya numa nta ikinsoṛa lingi.

⁶⁷ Yesu kaia valya ikumi na vavili: Neeni da mufurie ikwendia?

⁶⁸ Simon Petiro kamwaṛua: Nndumi, teende kwa i? Iwe kuwore firero finnde muu wa miṛeṛe.

⁶⁹ Neese tankukusura tikammanya sheeli iwe ni iwe Nsongori uu wa Iṛuva.

⁷⁰ Yesu kavaaṛua: A nniń shi muni se nndemusaua ini ikumi na vavili? Na umwi wanu nSatana.

⁷¹ Arera kura kiimba kya Yuda Isikariote akee mwana wa Simon. Amu ito yye andendiinga numa. Nae ni umwi wa iwo ikumi na vavili.