Yohane 21 - MMA SHIYYA

¹ Numa Yesu kakumanyisa lingi kwa vaseṛo vamwi kulya nruveń ya Tiberia. Na ikumanyisa kakumanyisa kuri:

² Veekee andu emwi Simon Petiro na Toma avaangwaa wa yaasa, na Natanaeli wa kulya Kana ya Galilaya na vana va Sebedayo na vengi vavili va vaseṛo vamwi.

³ Simon Petiro kavaia: Nkee yenda nndewara makunga. Vakamwia: Neese teendaa andu emwi nawe da. Vakakwimboo vakaaṛukia ngalaveń. Na kio kilya nta iwara kindo.

⁴ Ili kundetaṛakana, Yesu kasalala mbaai ya nruva. Kake vanalosho vamwi nta vandemanya yye ndi.

⁵ Yesu kavauṛa: Vana vakwa, moore shoonga? Vakamwia: Wode.

⁶ Kavaia: Oloteń nreyo wanu taari ya uko usha lwa ngalava, Ilyo mukooyaa. Vakaolota-fo mireyo nta ikimakii yomua kiimba kya wiingi lwa makunga.

⁷ Llyo nseṛo ulya Yesu amwitie mbele kaia Petiro: A te ni Nndumi! Ili Petiro andeita sheeli ni Nndumi, kaṛaa nseto wamwi, fulya eekee kya ruu kakutuula nruveń asaṛikie Yesu.

⁸ Na vaseṛo valya vengi vakasha na ngalava veesuṛuaa nreyo wishule makunga. Fulya mbaai ikee kwaasha ndi, ikee andu a marambo mayana avili tubu.

⁹ Ili vandeoloka mbaai vakakooya-fo muro wa makaa mwate na makunga mmeekeṛie kwa ule ya makaa andu emwi na nkate.

¹⁰ Yesu kavaia: Nndeń kiindi kya makunga alya mwawwara.

¹¹ Simon Petiro kaaṛukia ngalaveń kasuṛua nreyo na alya mbaai uwore makunga manini iyana na makumi araanu na araru. Na nreyo nta iranduka lla kasa makunga eekee meengi.

¹² Nae Yesu kavaia: Oṛeshoń mutuke! Na kari ka vaseṛo eeifoo nta umwi andekaṛia imwura: Ni iwe i, ndi. Fulya veemmanyaa yye Nndumi.

¹³ Yesu kasha kawara nkate kavaavia andu emwi na makunga.

¹⁴ Nalyo likee lya kararu Yesu andekumanyisa kwa vaseṛo vamwi ili andemaa iṛuka kwa vafu.

¹⁵ Ili vamaa ituka, Yesu kauṛa Petiro: Simon wa Yohane, kushikundie kita iva vengi? Petiro kamwia: Ee Nndumi, kwishi sheeli nkukundie. Na Yesu kamwia: Isa maanri akwa!

¹⁶ Kamwuṛa lingi lya kavili: Simon wa Yohane, kushikundie? Petiro kamwia: Ee Nndumi, kwishi sheeli nkukundie. Na Yesu kamwia: Isa mburu takwa!

¹⁷ Kamwuṛa lya kararu: Simon wa Yohane, kushikundie? Petiro kanaria, fulya andemwuṛa lya kararu: Kushikundie? Kamwia: Nndumi, iwe kwishi findo foose, kwishi kwamanya nkukundie. Na Yesu kamwia: Isa mburu takwa!

¹⁸ Nkue nakuia kya dede: Lia kukee nkoo kwikufingiaa nseto wafo ku muni kwakwendia kundo kwakunda. Kake ili kukuaa kusaaṛaa maako afo na nndu ungi akufingaa na ikurwaa kundo kutafurie.

¹⁹ Na kiteveto kamwia kuro, naamu amanyise mikae ya ufu Petiro afwaa na iṅinisa nalo Iṛuva. Ili andemaa irera kuro kamwia: Shisoṛaań!

²⁰ Petiro kalla numa kalolia mwanalosho ulya Yesu amwitie mbele avarie numa. Nae yye ulya eefwitanii na Yesu lia valye shoonga ilya ya waaṛo. Nae ni ulya auṛa Yesu: Nndumi, ni i akuringaa?

²¹ Ili Petiro alolia nseṛo ulya, kauṛa Yesu: A uu naare kikaa kiwie ye?

²² Yesu kamwia: Kwakooya mfuraa ito akaa na muu kumande nuuyaa kyakutiṅa-fo ki? Iwe shisoṛa da!

²³ Na kirero kyo kikakwana kwa vandu va Yesu veenumbuaa: Mwanalosho to akifwaa ndi. Kake Yesu aia Petiro mwanalosho to atakifwaa ndi, kake niikai amwia: Kwakooya mfuraa ito akaa na muu kumande nuuyaa kyakutiṅa-fo ki?

²⁴ Na uu mmwanalosho ulya anderambua mboni ti na ititisiṛa. Neese tiishi sheeli irambua lyamwi llya dede.

²⁵ Fiifo na findo fingi fiingi Yesu andefitana. Nafo kifo fiitisiṛwaa kimwi kimwi, nkusaṛie nta isanga lyoose liimakii iiṅania fitabu fo fiitisiṛwaa ndi.