Yohane 19 - MMA SHIYYA

¹ Kyasia llyo Pilato aniingia Yesu akabwa na ngova.

² Na vasikari vakaoka kiṛeto kya miinga vakawika nrweń. Vakawika na nseto utondoṛie.

³ Vakanshea veenumbuaa: Mangi ya Vayuda kia! Vakankaba ngyui.

⁴ Pilato kasomuka lingi wooṛo kavaia: A uu nammunnde lingi na wooṛo ia mukai, naamu mumanyi sheeli niń llolie awore ukasha atanie ndi.

⁵ Yesu kasomuka na wooṛo aṛee kiṛeto kya miinga na nseto ulya utondoṛie. Pilato kavaia: Lleń nndu uu!

⁶ Kyasia vakohani vanini valya na maketi awo ili vandellolia vakaṛoṛongya veereraa: Nkabie nsalabeń, nkabie nsalabeń! Pilato kavaia: Nkurikeń ini mukandenkabia nsalabeń, amu niń llolie ukasha lwamwi ndi.

⁷ Vayuda vakamwaṛua: Ise toore uvavaso lweru, na kisumani na uvavaso lo kyawara afwe, fulya akwaṛua Mwana wa Iṛuva ye muni.

⁸ Kyasia ili Pilato andeita kirero kyo, kaengeṛia yeṛea.

⁹ Kaaka lingi numba ya nshili wa Kaisari kauṛa Yesu: Nkwi iwe kuukie? Yesu nta imwaṛua kindo.

¹⁰ Kyasia Pilato kamwia: Kureraa nań se? Kwishi se sheeli niń noore finya ya ikuboṛomua na ya ikukabia nsalabeń?

¹¹ Yesu kaaṛua: Kwiworee finya ya ishuumisia, kifo kitaare kweeniingyo̱o̱ yauka ule ndi. Kiimba kya ikyo ito ashirambikia maakoń afo awore ireko inini kya mmwasi.

¹² Kuuka io Pilato kaṛuya mwaanya wa imboṛomua. Llyo Vayuda vaṛoṛongya veenumbuaa: Kwakooya kwaboṛomua uu, kukee nndu atakiwore witanu na Kaisari. Ulya woose akwaṛua mangi ye muni, ito allea Kaisari.

¹³ Kyasia ili Pilato andeita firero fo, kavavasa Yesu arawa wooṛo. Kakaa rembo kifumbiń kya ifukya mwaandu andu avaangwa: Wooṛo shaale mawe. Na irina lyayo lya Kiebrania nGabata.

¹⁴ Kyasia na nkonu to ukee nkonu wa ikusongosia kya Pasaka. Na kyeeri nsha saa isasaru. Kaia Vayuda: Lleń mangi ii yanu!

¹⁵ Nawo vakaṛoṛongya: Muute-wo, muute-wo! Nkabie nsalabeń! Pilato kavaia: A nakabia mangi yanu nsalabeń? Vakohani valya vanini vakamwaṛua: Ise toore mangi kitaare nKaisari ndi.

¹⁶ Kyasia llyo anrambikia maakoń awo, amu andekabio̱ nsalabeń.

¹⁷ Vakawaria Yesu. Nae kaenda akuriye nsalaba wamwi ye muni. Kauka muṛiń kafika andu avaangwaa Kiboṛoń, na irina lya Kiebrania nGoligota.

¹⁸ Vakankabia-fo nsalabeń na vengi vavili andu emwi nae, umwi taari ii na ungi taari ii. Na Yesu kakaa karikari.

¹⁹ Kyasia Pilato katisiṛa na mitisine ya yorusa kaikabia kwa ule ya nsalaba. Na mitisine yo iikee kuri: Uu ni Yesu wa Nasareti mmangi ya Vayuda.

²⁰ Kyasia mitisine yo Vayuda veengi vakaisoma, amu andu alya akabio̱ nsalabeń akee kufui na muṛi. Nayo itisiṛie Kiebrania na Kirome na Kigiriki.

²¹ Llyo vakohani valya vanini va Vayuda vakaia Pilato: Manya kutatisiṛe: mMangi ya Vayuda, ndi, kake nsheeli ye anumbua: Niń nkee mangi ya Vayuda.

²² Pilato kaaṛua: Kilya nantisiṛa nammaa itisiṛa.

²³ Kyasia vasikari valya vandekabia Yesu nsalabeń vakaimboo miseto yamwi. Vakaavanisa feenga fiini oo nsikari na kyeenga kyamwi, na nseto ulya wa kari nato da. Na nseto ulya wiworee ufumu ndi, ukee mwoke undeokwa kuuka ule.

²⁴ Kyasia vakakurera wo veni na veni: Titaurandue ndi. Tuukabie wuuku tikooye ulya luwwoyaa i. Kyave kuro amu kifike kilya kyatisiṛwa: Vakwavia miseto yakwa na nseto wakwa wa kari vakaukabia wuuku. Nkuro vasikari valya vatana.

²⁵ Na alya nsalabeń wa Yesu veeselelee-wo mae na mfwamae wa mae na Maria akee nka wa Kiliopa na Maria wa Magidala.

²⁶ Ili Yesu alolia mae na mwanalosho ulya amwitie mbele aselele kufui, kaia mae: Yeyo, uu yye mwana wafo.

²⁷ Numa kaia mwanalosho ulya: Uu yye yeyo wafo. Kuuka kyeeri kilya kyeni mwanalosho ulya kankurika andekaa kulya kwamwi.

²⁸ Numa ya ifo ili Yesu andemanya sheeli foose fammarisio̱, amu mitisine yawukie, kanumbua: Namaakuka.

²⁹ Na io kiiyoo kiya kiwore mfinyo utaraṅaa. Na lia eni vakaimboo kyoonga mura vakakiishuṛa mfinyo ulya utaraṅaa. Vakamfingia irekoń vakanrwaya kaniń.

³⁰ Kyasia ili Yesu andemaa inwa mfinyo ulya utaraṅaa, kanumbua: Kyammaa iva! Kainita nrwe kanutuka.

³¹ Na ili nkonu to wikee wa ikusongosia, Vayuda vakalolia nkisha minyiṅa ilya isaa nsalabeń ili lya nkonu wa Sabato ndi. Amu Sabato ilya wikee nkonu nnini deń. Vakandetereva Pilato marende awo afukywafukywa vaolotwa-fo.

³² Kyasia vasikari valya vakaenda vakafukya ulya wa mbele marende na ulya ungi valya vakabio̱ nsalabeń andu emwi nae.

³³ Neeli vandefikia Yesu na ilolia sheeli ammaa ifwa, vakimfukya marende ndi.

³⁴ Kake nsikari umwi wawo kansimba ifumu lya mbari. Lia eni lukairika usao lusaangi na mura.

³⁵ Na uu andelolia kava murambua. Na irambua lyamwi llya dede. Nae eeshi nkya dede arera, amu neeni muutie-wo ikusura.

³⁶ Fulya ifo fatanika, amu mitisine yawukie sheeli: ”Nta ifua lyamwi limwi lifukywaa“.

³⁷ Na mitisine ingi ikee inumbua: ”Vallaa ito vandensimba ifumu“.

³⁸ Neeli ifi findemaa iva, kasha na-wo Yosefu wa kulya Arimatia akee mwanalosho wa Yesu kiṛisi, fulya eeṛee Vayuda. Kashetereva Pilato muumu wa indeolota nnyiṅa wa Yesu. Pilato kavvikia muumu. Kyasia kaenda kandeolota nnyiṅa wamwi.

³⁹ Nikodemo nae kasha na-wo ulya andenshea lya mbele kyeeri kya kio. Kasha arie mafura usaandisaandi na miri ya kisaamu afitie kyelelio kya ratili iyana.

⁴⁰ Kyasia vakaimboo nnyiṅa ulya wa Yesu vaka wiṛina na nseto mweelwa andu emwi na miri ilya ya kisaamu, sheeli ukee llimu wa Vayuda wa irika vafu vawo.

⁴¹ Na andu alya andekabio̱ nsalabeń wiifoo nnda. Na ifo nndeń ulya iifoo mbanga shiiya, nayo yeendikwaa nndu ndi.

⁴² Nafo vakaaṛa-fo Yesu, fulya nkonu ulya wwa ikusongosia wa Vayuda na mbanga yo iikee kufui.