Yohane 16 - MMA SHIYYA

¹ Firero fi namuia, amu mutavingwa mmireyo. Vamuimaa mwiakaa numba tawo ta iterevia.

² Na kita ifi kyeeri kishaa na ulya woose amuwaa akusaṛe, sheeli kuro llyo iṛundia Iṛuva.

³ Na ifi vamutaniaa, fulya vateeshi nta Nde ana nta niń.

⁴ Kake namuia ifi, amu ili kyeeri kyo kifikaa mufikumbue, sheeli niń nammaa imuia. Nta nammuia ifi kuuka mbele ndi, fulya niikee andu emwi neeni.

⁵ Na alli nkee yenda kwa ito ashirumie. Ana eefo nta umwi kari kanu ashiuṛaa: Nkwi kwendaa ndi.

⁶ Kake ili namuia kuro, mirima yanu yamiishua unaṛio nnu.

⁷ Kake niń namuia kikee kya dede: Ili neendaa llyo kimwelekaa ini. Amu niń nara ntaenda kwakwa, Ntirishi amusheaa ndi. Kake nammeenda ninrumaa kwanu.

⁸ Nae ili ashaa arambuyaa va isangeń ili kya mareko na kya usumani na kya uumisio.

⁹ Kya mareko mfulya valea ikusurana nań.

¹⁰ Na kya usumani nkyo nkee yenda kwa Nde na ishilolia mutakishiloliaa lingi.

¹¹ Na kya uumisio mfulya Nnini wa isanga li ammaa yumisio̱.

¹² Fiifo na firero fingi fiingi niiworee fa imuia, kake alli fiimuviaa mwaanda utafitikaa.

¹³ Kake ili ulya ashaa ito akee Mumuyo annde mboni ta dede yye ashemoorusaa mukooye findo foose fikee fa dede. Nae nta ashefireraa afuuta na kwamwi muni ndi. Mboni tilya amiita nto ashereraa toose na findo fikaa fishe mfo ashemoongoyaa.

¹⁴ Nae nniń asheshiitikisaa, amu mboni to ashemoongoyaa nkunu kwakwa atuutaa.

¹⁵ Na kilya kyoose Nde awore nkyakwa. Nkyo kiteveto namuia: Mboni ashemoongoyaa nkunu kwakwa ashetuutaa.

¹⁶ Kiseere kinnya mukishiloliaa lingi ndi. Na lingi kiseere kinnya mushiloliaa lingi.

¹⁷ Llyo kiindi kya vanalosho vamwi vakakurera wo veni na veni: Nkiki iki akee itiia: Kiseere kinnya mutakishiloliaa, na lingi kiseere kinnya mushiloliaa lingi. Na kilya kingi akee inumbua: Nkee yenda kwa Nde.

¹⁸ Vakanumbua: Nkiki iki akee irera: Kiseere kinnya? Tiishi kilya akee irera ndi.

¹⁹ Yesu kamanya sheeli vafurie imwuṛa kavaia: Iki nkyo mukee ikusaṛa andu emwi, fulya namuia: Kiseere kinnya mutakishiloliaa, na lingi kiseere kinnya mushiloliaa lingi.

²⁰ Nkue nkue namuia: Ini muiyaa na iishiṛa na vandu va isanga vakyesaa. Neeni munaṛiaa, kake unaari lwanu lwaṛukaa ukyesi.

²¹ Ili nka eeiraa mwana, awore unaari, fulya kyeeri kyamwi kyamfika. Kammaa iira mwana akikumbuye ngatara ya iira ndi kiimba kya ukyesi lwamwi, fulya mwana amiiriwa.

²² Neeni alli moore unaari. Kake mmuloliaa lingi na ngoo tanu tikyesaa na ifura lyanu eefo nta nndu amusokaa ndi.

²³ Na nkonu ulya mukishiuṛaa nta kirero ndi. Nkue nkue namuia: Kwakooya mwatereva Nde kindo na kikava ki, amuniingaa kwa irina lyakwa.

²⁴ Kumande nnu nta kindo mwankitereva kwa irina lyakwa ndi. Tereveń amu muniingwaa, na ifura lyanu liishue bele.

²⁵ Ifi narera neeni na sumu. Kake kyeeri kishaa ntakireraa neeni na sumu. Llyo mmoongoyaa mboni ta Nde na baa.

²⁶ Na nkonu to muterevaa kwa irina lyakwa. Nta mmuiaa: Nniń tiimutereviaa kwa Nde ndi.

²⁷ Amu Nde muni amukundie, fulya ini mundeshikunda niń na ishikusura, sheeli niń nuukie kwa Nde.

²⁸ Nndesha nuuka kwa Nde nasha kunu isangeń. Na alli nkee yuka lingi kunu isangeń nuuye kwa Nde.

²⁹ Vanalosho vamwi vakanumbua: A te alli kukee irera na baa kutakirere na sumu ndi.

³⁰ Alli tiishi sheeli kwishi foose ana nta nndu akuuṛaa. Kwa ikyo tikukusurie na imanya, sheeli kuukie kwa Iṛuva muni.

³¹ Yesu kavaaṛua: Alli mushikusurie?

³² Lleń te kyeeri kikaa kifike, lingi kyammaa ifika neeni munyanyatwaa oo nndu na kikwamwi, mushiree-wo shi muni. Kake nkaa shi muni ndi, fulya Nde akee andu emwi nań.

³³ Ifi namuia amu mukooye unambwe mukulungie nań. Kunu isangeń mukooyaa ngatara. Kake kuwareń tabu! Niń nawinga isanga li.