Yohane 15 - MMA SHIYYA

¹ Niń nniń kiri kya mfinyo kya dede na Nde yakwa yye nremia.

² Na iṛamba lyoose likulungie nań likara litavika nunda alyutaa-fo. Na lia likee ivika nunda alyarambuyaa, amu lyengeṛie ivika.

³ Ini mwammaa iiliswa kiimba kya kirero kyakwa namuia.

⁴ Kaań mukulungie nań, nań nkaa nkulungie neeni! Na sheeli iṛamba litamakii ivika nunda likee kyaanya kyayo litakee kiriń kyayo, mfo kuro neeni da nta kindo mumakii mutakulungie nań.

⁵ Niń nkee kiri kya mfinyo, neeni mukee maṛamba. Ulya akaa akulungie nań, nań nkaa nkulungie nae, ito avikaa nunda shiingi. Amu kwakooya mukurauaa nań nta kindo mumakii itana.

⁶ Kwakooya nndu atakaa akulungie nań, akumbwaa wooṛo sha iṛamba, ifi lyauma. Na vandu vakaasaṅiṛia andu emwi vakaeeṛa muroń arongore.

⁷ Mukankaa mukulungie nań na firero fakwa likankaa mirimiń yanu muterevaa kindo kyoose mufurie nakyo mwawutio̱o̱.

⁸ Kuro llyo Nde yakwa eetikiswaa mukawika nunda shiingi na iva mukava vanalosho vakwa.

⁹ Sheeli Nde andeshikunda niń, nkuro nań nammukunda ini. Kaań na ikunda lyakwa!

¹⁰ Mukawara mavavaso akwa mukaa na ikunda lyakwa, sheeli nań nndewara mavavaso a Nde yakwa nakaa na ikunda lyamwi.

¹¹ Namuia ifi, naamu ifura li lishiwore limwake mini na ifura lyanu lyawukie lyoose.

¹² Ivavaso lyakwa llyo ili: Kundaniń mu veni na mu veni, sheeli nndemukunda ini.

¹³ Nta eefo nndu awore ikunda inini kita ito aniingiaa muu wamwi kiimba kya ndoo tamwi ndi.

¹⁴ Kyasia ini mukee ndoo takwa mukantana kilya nammuvavavasa.

¹⁵ Nkimuvaangaa lingi maketi ndi, fulya iketi liishi kilya nndumi wamwi atanaa ndi. Namuvaanga ndoo, amu foose nndefika kwa Nde yakwa mfo nammurambuya ini.

¹⁶ Nta ni ini mundeshisaua ndi. Nniń nndemusaua na imuvavasa mwende mundevika nunda. Na nunda to tanu muvikaa tikaa matika woose. Na kyoose muterevaa Nde na irina lyakwa amuniingaa.

¹⁷ Llyo ili ivavaso lyakwa: Kundaniń mu veni na mu veni!

¹⁸ Kwakooya isanga li lyamusua, manyiń sheeli nniń lindebooka ishisua kitaare lyamusua ini.

¹⁹ Kifo mwikee va isanga li, isanga liimukundaa sha kindo kyayo. Kake ili kitaare mukee va isanga, nań nammusaua namuuta kunu isangeń, nkyo kiimba isanga likamusua ini.

²⁰ Kumbueń kirero kilya nndemuia: Iketi ni inini kita nndumi wamwi ndi. Kwakooya vandeshiumbuta niń, neeni nkuro da vashemuumbutaa. Kifo veewaraa kirero kyakwa, veewaraa na kyanu.

²¹ Kake ifi foose vamutaniaa kiimba kya irina lyakwa, fulya vateeshi ulya ashirumie.

²² Kifo kitaare nashe na irera nawo, veevaa na urekwa ndi. Kake alli vawore kindo kya ikuuta mareko awo ndi.

²³ Nndu kashisua niń asua na Nde yakwa.

²⁴ Kifo kitaare neendundaa mashoṛa kwawo atandeṛundwa ni nndu ungi kuuka, veevaa na mareko ndi. Kake alli valolie na ishisua vakashisua niń na Nde yakwa.

²⁵ Kake kyawara kirero kilya kikee kitisiṛe ifo uvavasoń lwawo kyawukie sheeli: Vandeshisua kya ruu kuṛań.

²⁶ Kake ili muwolisa mirima ashaa ulya ninrumaa auka kwa Nde akee Mumuyo wa dede aukaa kwa Nde, yye ashirambuaa.

²⁷ Neeni da muvaa varambua vakwa, amu kuuka mbooko mwikee nań.