Yohane 14 - MMA SHIYYA

¹ Yesu kaia vanalosho vamwi: Manya mutavaṛikwa ni irima! Kusuraniń na Iṛuva, nań mushikusure!

² Numbeń ya Vaava wakwa fiifo firembo fiingi fa ikaa. Kifo kitaare kikai kuri, niimuiaa: Neenda nndemusongosia firembo.

³ Na alli nkee yenda nndemusongosia firembo da. Kake nuuyaa lingi nshemukurika kwakwa, mundekaa alya niń nkai.

⁴ Na alya niń nkee yenda mwishi na shia mwiishi.

⁵ Llyo Toma amwia: Nndumi, tiishi alya kukee yenda ndi. Na shia timanyamanyaa are?

⁶ Yesu kamwia: Nniń shia yo na dede nniń na muu nniń. Eefo nndu afikaa kwa Nde kitaare ashiwore niń ndi.

⁷ Kikooye mweeshimanyaa niń, mwimanyaa na Nde da. Na kuuka alli mumwishi na illolia mwammulolia.

⁸ Filipo kamwia: Nndumi, tooruse Nde nakyo kitifilaa.

⁹ Yesu kamwia: Nankaa neeni feeri fifile kuri, nawe nta ishimanya, Filipo? Ulya anshilolia niń ammaa ilolia Nde. Naare kyavań ili kwanumbua: Tooruse Nde?

¹⁰ Niikai kutakusurie sheeli niń nsaangi na Nde na Nde nae kasaanga nań? Firero fi nkee imuia nkee ifirera kwa makusaṛo akwa meni ndi.

¹¹ Nde asaangi nań yye akee iṛunda mashoṛa amwi, ushikusureń sheeli niń nsaangi na Nde na Nde nae kasaanga nań! Na kitaare nkuro shikusureń mwillaa mashoṛa akwa meni amunniinge ikusura.

¹² Nkue nkue namuia: Ulya ashikusuraa niń, nae aṛundaa mashoṛa va nkee yaṛunda niń, nae aṛundaa manini kita iva. Amu niń nkee yenda kwa Nde.

¹³ Na kindo kyoose mukiterevaa mukuvavie nań nkitanaa, amu Nde aṅiniswa andu emwi na Mwana.

¹⁴ Na kwakooya mwatereva kindo mwikuvavaa nań nkitanaa.

¹⁵ Kwakooya mushikundie, mwindie mavavaso akwa.

¹⁶ Nań nterevaa Nde nae amuniingaa ntirishi ungi, amu akaa andu emwi neeni kyeeri kilungani.

¹⁷ Nto Mumuyo ulya arie mboni ta dede, ulya isanga litamakii iwwaria, fulya litallolie ana litamwishi. Ini mwammanya, fulya akaa kwanu, nae eefo mirimiń yanu.

¹⁸ Nta mmureaa ungwereń ndi, nshaa kwanu.

¹⁹ Iseere mikonu myaangu vandu va isanga li vakishiloliaa ndi. Kake ini mushiloliaa, fulya nkee na muu, neeni mundekaa na muu.

²⁰ Na nkonu to muni mumanyaa sheeli Tikulungie na Nde, neeni mukulungie nań, nań nkulungie neeni.

²¹ Nndu awara mavavaso akwa na yaindia ito yye nndu ashikundie. Na nndu ashikundie niń, ito akundwaa vVaava wakwa. Na akwaa nniń ninkundaa na inkworusa na bata.

²² Yuda — kake ni Isikariote ndi — kamwia: Nndumi, kyava are ili kufurie ikworusa kweru da kitaare kwakworusa na isanga?

²³ Yesu kaaṛua kamwia: Nndu kashikunda awaraa kirero kyakwa, na Nde yakwa ankundaa, neese tishaa kwamwi na isongosia kirembo kwamwi.

²⁴ Ulya atashikundie aindiaa firero fakwa ndi. Na kirero kyo mukee ikiita nta nkyakwa shi muni ndi, nkya ito ashirumie.

²⁵ Mfo firero fakwa namuia, ili nkikee neeni.

²⁶ Kake ito Mwelekia, akee Mumuyo Nsongori, Nde anrumaa na irina lyakwa ye amuloshaa kyoose na imukumburusa kyoose nndemuia.

²⁷ Ni unambwe namurea, ni unambwe lwakwa nankuniinga. Na miniingie yakwa ikee sha miniingie ya isanga ndi. Manya ngoo tanu titataṛaake ana mutawarwa wweṛei!

²⁸ Mwamiita kilya namuia: Nkee yenda, kake nuuyaa lingi kwanu. Kikooye mwishifuriee mwifuraa, ili neendaa kwa Nde. Fulya Nde akee nnini kita niń.

²⁹ Na alli nabooka imuia kitaare kyawa, amu mushikusure ili kindevaa.

³⁰ Nta nkireraa neeni firero fiingi ndi. Amu Nnini wa isanga li akee isha. Nae nta awore kindo ashimakii nakyo ndi.

³¹ Kake va isanga li kyawara vamanyi, sheeli nkundie Nde na itana ifo Nde andeshivavasa. Kyasia kwimbooń teende!