Matayo 5 - MMA SHIYYA

¹ Ili Yesu andelolya syamu ya vandu, karwa uron Ili andemaa ikaa rembo, vanalosho vamwi vakanserikya kufui.

² Kataṛambua kana kamwi kavalosha eereraa:

³ Vva ngoma valya vakee vakiva ngooń, amu wwo umangi lwa iṛuvewu luvaa lwawo.

⁴ Ngoma valya vawore unaari, amu wwo vakaa vawiiṛyo muu.

⁵ Ngoma valya vawore utele, amu wwo vakaa varwaa dińu ya isanga.

⁶ Ngoma valya vaworwa nsoto na nyura ya usumani, amu wwo vakaa vawuuruswa.

⁷ Ngoma valya vawore ililya, amu wwo vakaa valilyo.

⁸ Ngoma valya vakee va ngoo sheelwa, amu wwo vakaa vandelolya Iṛuva.

⁹ Ngoma valya vakundye unambwe, amu wwo vakaa vandevaangwa vana va Iṛuva.

¹⁰ Ngoma valya vatuṛulwaa kiimba kya usumani, amu wwo umangi lwa Iṛuva luvaa lwawo.

¹¹ Ngoma ini mukee irumwa vvandu na yumbutwa na ifingyo firero fikasha foose kya wongo kiimba kyakwa.

¹² Fureń kyeseń! Amu maṛe anu mmeengi iṛuvewu. Mfo kuro vaumbuta na vaauya fisuku valya veemwiryee mbele.

¹³ Ini mukee munyu wa isanga li. Kake munyu ukavva kyoongyo ushiiswaa neeki ulore? Ukivaa kutu ndi kita ikumbwa na ivario̱vario̱ vvandu.

¹⁴ Ini mukee langa ya isanga li. Muṛi wa vandu ukee uroń uvaa ifisa ndi.

¹⁵ Nta eefo nndu aataa taa na iifunikya mengetoń ndi. Kake eevanikaa kivanikoń, nayo imulikye woose vakee numba.

¹⁶ Mfo kuro neeni veń vandu vamulikyaa vengi, amu valolie mitanye yanu misha, vautye-wo ińinisa Nde yanu wa iṛuvewu.

¹⁷ Manya mutakusaṛe sheeli nansha, amu nrete mavavaso na firero fa vaauya fisuku, wode, nansha ireta ndi, kake nansha yawutya.

¹⁸ Nkue namuia kikee kya dede: Iṛuvewu na isanga fisyaa, kake iifo nta mitisine itisiṛie mavavasoń irekaa ndi, kumande foose faawukyaa.

¹⁹ Kyasiań nndu akaṛyaa aanguse ivavaso limwi ifo mavavasoń na akwaa nkirere kimwi tubu kitisiṛie-fo na ilosha vandu kuro, ito aaṛulwaa munnya kita vengi ifo umangiń lwa iṛuvewu. Kake nndu aindyaa mavavaso va na ilosha vandu kisumani, ito aaṛulwaa nnini ifo umangiń lwa iṛuvewu.

²⁰ Namuia: Usumani lwanu lutankilyakilya usumani lwa vaaṛia va mitisine na lwa Vafarisayo, mufikaa umangiń lwa Iṛuva kutu ndi.

²¹ Mwamiita kilya vakuuku va mbele vaio̱: Manya kutawaa vandu! Na ulya awaa nndu ungi aumisyoo.

²² Kake niń namuia: Ulya woose anaa na nndu ungi kya ruu, aumisyo̱o̱. Na ulya arumaa nndu ungi kya ruu, arawaa kikweniń kya masiingo. Na ulya aiaa nndu ungi kya ruu: Kusule Iṛuva, arawaa muroń utakisyaa.

²³ Kiimba kya iki kwakooya kwannde nsimbika wafo andu a irasya Iṛuva na lia eni kwakumbuya-fo sheeli nndu ungi awore shuu nawe,

²⁴ tia nsimbika wafo kitaare kwaniingya, kwende mbele mundekwitanisa na nndu ulya. Na numa kusheń iniingya Iṛuva nsimbika wafo.

²⁵ Mukwitanise ree na nndu ulya awore mwaandu nawe, ili mukikee shień ya yenda kikweniń. Amu nndu ulya atakufite kwa mangi, na mangi atakurambikye nseṛo wamwi, nawe kurawaa kifingyoń.

²⁶ Nakwia kya dede: Kuukaa-fo ndi kumande kumaa itaa foose kutu.

²⁷ Mwamiita sheeli vakuuku vaio̱: Manya kutaaike!

²⁸ Kake niń namuia: Ulya woose allaa nka wa nndu ungi kwa illanga, ammaa yaaika nae ifo nrimiń wamwi.

²⁹ Na kwakooya iriso lyafo lya uko usha likwendye nsindaṛa, liiṛue kwalikumba neefo likuuke. Amu llyo ńwana kyeenga kyafo kimwi kireke kita ili vvili wafo woose weeṛwaa muroń utarunyikaa.

³⁰ Na kwakooya uko lwafo usha lu-kwendye nsindaṛa, luminye kwalukumba neefo lukuuke. Amu llyo ńwana kyeenga kimwi kireke kita ili vvili wafo woose weeṛwaa muroń utarunyikaa.

³¹ Nkirere lingi: Nndu kalakana na nka wamwi, kyawara anniinge barua ya llakanu.

³² Kake niń namuia: Ulya woose alakanaa na nka wamwi kitaare nkwa mboni ya waaisi amwaṛua kava mwaaisi. Na nndu kaora nka ulya andetio ni mmi amaaika.

³³ Na lingi mwamiita sheeli vakuuku vaio̱: Manya kutalye ikite lya wongo!

³⁴ Kake kwawutye Iṛuva filya foose kwammurekya. Kake niń namuia: Manya mutalye ikite kutu, nta na iṛuvewu, amu llyo kifumbi kya Iṛuva.

³⁵ Nta mutalye ikite na isanga, amu llyo Iṛuva aekeṛye marende amwi. Nta mutalye ikite na Yerusalemu, amu nto muṛi wa mangi nini.

³⁶ Nta kutalye ikite kwinumbuaa: Nkue na nrwe wakwa! Amu kumakii yaṛua ifuli limwi lya nrwe wafo live yeelwa ana live yuu ndi.

³⁷ Mukanumbua: Ee, kive dede. Mukanumbua: wode, kive kya dede. Amu kilanya ya ifo fikee yuka kwa Nkasha.

³⁸ Mwamiita sheeli kyarerwa: Iriso litawaa ni iriso na iyoo litawaa ni iyoo.

³⁹ Kake niń namuia: Manya mutakutimbiṛite na ukasha. Kake nndu kakukaba ui lwa usaa lu usha mwaṛuye na ilo lungi alukabe.

⁴⁰ Na nndu kakuvaanga akusoke nseto wafo wa irimbika, nreye na wa yeeṛya.

⁴¹ Na nndu kakukabiṛya yenda nae kyenga kya saa, kyasia enda nae saa yoose.

⁴² Nndu kakwomba kindo nniinge. Na nndu kasha ikwakua manya kutankabe mungo.

⁴³ Mwamiita sheeli kyarerwa: Kunda ndoo yafo na kituva kyafo kukisue!

⁴⁴ Kake niń namuia: Kundeń fituva fanu, niingeń valya vakee imuumbuta mboṛa.

⁴⁵ Tanyeń valya vamusule finuru, terevyeń valya vakee imukura nkuru na imuumbuta. Amu mulolyo sheeli mukee vana va Nde yanu wa iṛuvewu. Fulya yye akee irosa saa yamwi ikavaya vakasha na vanuru. Kannde fua yamwi ikakaba kwa iwo va usumani na kwa iwo vabiṛa.

⁴⁶ A kwakooya mwakunda iwo vamukundye ini, ni isekye lingali mukooyaa? A vasańiṛya kyaalo nkuro vatanaa da ndi?

⁴⁷ Na kwakooya mukee iisana ndoo tanu tubu, a kindo mwatana kya mmwasi nkyo ki?

⁴⁸ Kyasia ini veń vandu vasongovye, sheeli Nde yanu wa iṛuvewu asongovye.