Matayo 4 - MMA SHIYYA

¹ Numa Yesu kakurikwa mMumuyo wa Iṛuva bateń, amu andeelelyo-fo nSatana.

² Ili andemaa-fo mikonu makumi aani kio na nsanyiń kitaare akomba nta shoonga, kawarwa nsoto.

³ Nreya ulya kanshea kamwia: Kwakooya kukee Mwana wa Iṛuva, vavasa mawe va ave shoonga.

⁴ Kamwaṛua kamwia: Nkitisiṛe: Nndu amakii iwara muu na shoonga yo sheni ndi, kake awaraa muu na kirero kyoose kyukie kaniń ka Iṛuva.

⁵ Numa Satana kankurika muṛiń nsongori kamwaṛutya mmbewu alya uṛoṛo lwa numba ya Iṛuva.

⁶ Kamwia: Kwakooya kukee Mwana wa Iṛuva kutuule na si boto. Amu nkitisiṛe: Akuvavasyaa vamalaika vamwi, nawo vakwambilyaa na maako awo, amu urende lwafo lutakabwa ni iwe.

⁷ Yesu kamwia: Nkitisiṛe lingi: Manya kutaelelye Nndumi Iṛuva wafo.

⁸ Satana kankurika lingi uroń waasha nnu kamworusa ngyumangi toose ta isangeń na ngyunuru tayo kamwia:

⁹ Ifi foose mfikuniingaa, kwakooya kufwiṛyaa nri si kushińinise.

¹⁰ Yesu kamwia: Shuuka Satana! Amu nkitisiṛe: Kuńinise Nndumi Iṛuva wafo na inkusura ye muni.

¹¹ Llyo Satana alakana nae. Na vamalaika vakanshea vakandundia.

¹² Ili Yesu andeita sheeli Yohane akee kifingyoń, kakwimboo kaenda kulya Galilaya.

¹³ Kasama kulya Nasareti kaenda kandekaa kulya Kaperinaumu muṛiń ukee mbaai ya nruva miyanuń ya Sabulon na Nafutali.

¹⁴ Naamu kifike kilya kyeenrerwaa mmwauya kisuku Yesaya eenumbuaa:

¹⁵ Iwe uruka lwa Sabulon na lwa Nafutali kukee mbaai ya nruva, kukee kwa kulya ya Yoridane, kukee Galilaya ya vayavaṛumu,

¹⁶ vandu vakee llemiń vallolia langa nini na valya vakee kiṛishweń kyuu kya ufu langa yammulika kwa ule yawo.

¹⁷ Kuuka kyeeri kyo llyo Yesu abooka ikwanisa eenumbuaa: Ilashikeń mirimiń yanu, amu umangi lwa Iṛuva lwansha kufui.

¹⁸ Neeli Yesu eeṛuaṛuaa kulya mbaai ya nruva ya Galilaya, kalolia vana va nka umwi vavili, nSimon eevaangwaa Petiro na Anderea mwanamae. Nawo veekee yolota mireyo yawo nruveń. Amu veekee vareya makunga.

¹⁹ Nae kavaia: Shisoṛeń! Nań mmwaṛuaa vareya vandu.

²⁰ Na lia eni vakatia-wo mireyo yawo vakansoṛa.

²¹ Neeli andeenda na mbele, kalolia lingi vana va nka umwi vavili, ni Yakobo wa Sebedayo na Yohane mwanamae. Nawo veekee ngalaveń andu emwi na nde yawo Sebedayo veesongosyaa mireyo yawo. Nae kavavaanga.

²² Nawo vakatia ngalava ilya na nde yawo vakallatia.

²³ Nae kava akee ilengetya kulya Galilaya koose eeloshaa ifo numba tawo ta iterevya na yongoya vandu mboni ya ifura ya umangi lwa Iṛuva na ikiṛa saka toose na utanyari lukee miviliń ya vandu.

²⁴ Na nduma wamwi tikakwana kulya Siria koose. Vakamwendee vandu valole saka ta mikae miingi ta ivavisa nnu na valya veeworwaa mmimuyo mikasha na vasukwa na va saka ta meengo. Nae kavakiṛa.

²⁵ Kalatyo mmakanika meengi a vandu vauka Galilaya na kulya muungoń wa miri ikumi na Yerusalemu na Yudaya na kwa kulya ya Yoridane.