Matayo 3 - MMA SHIYYA

¹ Kyeeri kilya Yohane mbatisa kasha kalosha vandu kulya bateń ya Yoridane eenumbuaa:

² Ilashikeń mirimiń yanu, fulya umangi lwa Iṛuva lwansha kufui.

³ Yohane ni ulya, mwauya fisuku Yesaya eemmusendaa eereraa: Lwifo ununga lwa nndu akee ivaanga bateń: Tobiṛień Nndumi shia! Rendentień miko yamwi!

⁴ Na Yohane eeṛaa nseto mooke na mafuli a ngamia na kitati kisiń kyamwi. Na shoonga yamwi ikee nrie na uki wa mbakoń.

⁵ Llyo vandu va Yerusalemu vanshea na vandu va Yudaya woose na va kulya Yoridane.

⁶ Vakabatiswa yye ifo mureń wa Yoridane veerambuaa mareko awo.

⁷ Neeli andelolia Vafarisayo na Vasadukayo veengi veeshaa na kwamwi amu avabatise, kavaia: Ini vana va vamakavili, ni i amufunda sheeli mumakii irisha uumisio lukaa lushe isangeń?

⁸ Kyasia ṛundeń mashoṛa mesha a iilashika!

⁹ Ini mutakusaṛe mwinumbuaa: Ise toore nde yeru Abraamu. Namuia: Iṛuva amakii yaṛuya Abraamu mawe va ave vana vamwi.

¹⁰ Na kyaaṛa kyammaa inulwa, na nri woose kitaare uvikaa nunda shinuru uminywaa na ikumbwa muroń.

¹¹ Nkya dede niń nkee imubatisa na mura kiimba kya iilashika. Kake ito ashaa numa yakwa awore finya kita niń. Ana nta nkaṛiaa ikurika faaru famwi ndi. Ye amubatisaa na Mumuyo Nsongori na muro.

¹² Nae arie kyeele na uko lwamwi, nae aangataa kivasha kyamwi kiile fyu na isańiṛia umbi wamwi ikumbiń. Kake muulu to aukoṛaa na muro utarunyikaa.

¹³ Llyo Yesu andeuka kulya Galilaya, kafika kulya Yoridane kwa Yohane, amu andebatisyo-fo.

¹⁴ Kake Yohane kalleya eemwiaa: Niń kyashiwara ibatiswa ni iwe, nawe kwasha na kwakwa?

¹⁵ Yesu kamwia: Tia kive kuro! Amu nkuro kyatiwara yawutia ifo fa usumani foose. Kyasia kamwirikia.

¹⁶ Neeli Yesu andemaa ibatiswa, lia eni kauka ifo mureń. Lia eni iṛuvewu likaruuka kalolia Mumuyo wa Iṛuva eemwolokyaa akee sha mbuku kankaya.

¹⁷ Na ununga lukauka iṛuvewu lwireraa: Uu mMwana wakwa nkunde ashisenye.