Matayo 25 - MMA SHIYYA

¹ Umangi lwa iṛuvewu luvakani na sambuṛa ikumi tindeimboo taa tawo vakaenda indeondoṛa nndumi wa wali.

² Na varaanu vawo veekee vatondo na varaanu veekee vaṛango.

³ Na valya vatondo veeriee taa tawo da, kake veeriee mafura engi a mmwasi ndi.

⁴ Kake valya vaṛango vakakurika mafura fiyeń fawo andu emwi na taa tawo.

⁵ Ili nndumi wa wali andesinda, woose vakarengea vakarekya ruoń.

⁶ Isomukoń lya kari kikaitiwa kiṛo-ṛongyo: A uu nndumi wa wali ansha! Somukeń mumwondoṛe!

⁷ Na sambuṛa tilya toose tikakwimboo tikasumanisa taa tawo.

⁸ Na valya vatondo vakaia valya vaṛango: Muṛe tifukiyeń neese mafura wo anu, amu taa teru tikee ifwa.

⁹ Na valya vaṛango vakavaaṛua vakavaia: wode, atifilaa ise neeni ndi. Llyo ńwana mwende kwa vakumbi mundeuṛa-fo anu.

¹⁰ Ili vakirekye-fo yuṛa, nndumi wa wali kasha. Na valya veenkusumanisyaa vakaaka nae numba ya wali na mwaango ukaraywa.

¹¹ Numa sambuṛa tilya tingi nato tikasha tikanumbua: Wui Nndumi! Wui Nndumi! Tirue numba!

¹² Nae kavaia: Namuia kya dede: Mmwishi ini ndi.

¹³ Kyasia laleń kya umbuura, fulya muteeshi nkonu ana kyeeri Mwana wa nndu ashaa nakyo.

¹⁴ Amu nkuro kivakani na nndu andeimboo kyaaṛo. Kabooka ivaanga maketi amwi kavaniingya masaa amwi vamfisye.

¹⁵ Kaniingya ulya umwi feenga firaanu na ungi feenga fivili na ulya ungi kyeenga kimwi. Kaniingya nndu woose kilya kiińańani na finya tamwi. Kakwimboo kyaaṛo.

¹⁶ Ameenda, lia eni ulya andewaria feenga firaanu kawara shia kandekaba nafo mbusha. Kakooya mbusha ya feenga fingi firaanu.

¹⁷ Na akwaa ni ulya wa feenga fivili kababa mbusha kakooya feenga fingi fivili.

¹⁸ Kake ulya andeniingyo kyeenga kimwi kakiimboo kandekiṛika si kafisa fesa ta nndumi wamwi.

¹⁹ Numa ya mikonu miingi nndumi wa maketi alya kasha kafura itala masaa amwi andu emwi nawo.

²⁰ Kasha ulya andewaria feenga firaanu kannde feenga fingi firaanu. Kanumbua: Nndumi, kwashiniingya feenga firaanu. A fi na fingi firaanu nndekooya ifo mbusheń yayo.

²¹ Nndumi wamwi kamwia: Nkisha iketi isha kukee nsongovisi. Kwikee mulla wa findo faangu, kuvaa mulla wa fiingi. Aka ifureń lya Nndumi wafo!

²² Na ulya andewaria feenga filya fivili kasha na-wo. Kanumbua: Nndumi, kundeshiniingya feenga fivili. A fi feenga fingi fivili nndekooya ifo mbusheń yayo.

²³ Nndumi wamwi kamwia: Nkisha iketi isha kukee nsongovisi. Kwikee mulla wa findo faangu, kuvaa mulla wa fiingi. Aka ifureń lya Nndumi wafo!

²⁴ Kasha na ulya andeniingyo kyeenga kimwi. Kanumbua: Nndumi, nndemanya sheeli kukee nndu wa myaandu, kwailula kitaare kwaveekya, kwasańirya kitaare kwameeṛa.

²⁵ Nań neeṛea nakwendya nandeṛika kyeenga kilya kyafo ifo si.

²⁶ Kyasia nndumi wamwi kamwaṛua kamwia: Iwe iketi ikasha kuwore uroko! Kundemanya sheeli niilulaa ntandeveekya, nasańiṛya ntanderema?

²⁷ Kyasia kyeenkuwaraa se kurwaa masaa wo akwa kwa vakumbi? Nań ili namuuya niikooyaań masaa akwa na mbusha yayo.

²⁸ Kyasia nsokeń kyeenga kyo kyamwi, muniingye ulya awore feenga firaanu.

²⁹ Amu ulya awore masaa eengeṛyoo kya mmwasi. Na ulya atawore kindo na akwaa nkilya akee nakyo asokwaa.

³⁰ Na iketi ili ikasha leeṛeń ifo wooṛo llemiń! Neefo mfo kivaa kiiyo na ifina kitaku.

³¹ Ili Mwana wa nndu ashaa akee na unini lwamwi aryani na vamalaika vasongori woose, llyo akaa rembo kifumbiń kya unini lwamwi.

³² Na vandu va masanga woose vasandyoo kisanguń kyamwi. Nae avaavanisaa sheeli mwisi asauaa maanri na suve.

³³ Na maanri aarwaa uko lwamwi usha na suve atirwaa uko lwamwi umbuyo.

³⁴ Llyo mangi aiaa valya va uko lwamwi usha: Oṛeshoń ia kwakwa, ini mukee vandu va Nde yakwa awavikya mboṛa! Rwaań umangi luve dińu yanu mundefisyo kuuka ilyo isanga lindetanwa.

³⁵ Fulya niiworwaa nsoto mukashiniinga shoonga. Niiworwaa nnyura mukashiniinga kya inwa. Niikee mwini mukashiwaria kyeń kwanu.

³⁶ Niikuywaa mukashivika isaṛa. Niilolee mukashisengera. Niikee kifingyoń mukashishea.

³⁷ Llyo valya va usumani vamwaṛuaa veemwiaa: A Nndumi, ni iri ki tindekulolya kuworwa nsoto tikakuniinga shoonga? Ana kuworwa nnyura tikakuniinga kya inwa?

³⁸ Ana ni iri ki tindekulolya kukee mwini tikakuwaria kyeń kweru? Ana kwikuywaa tikakuvika isaṛa?

³⁹ Ana ni iri ki tindekulolya kulole ana kukee mfinge neese takakusengera?

⁴⁰ Na mangi avaaṛuaa eevaiaa: Namuia kya dede: Kilya mwantanya vamwanamae vakwa iwo vannya na akwaa ni umwi tubu, mwanshitanya niń.

⁴¹ Llyo mangi aiaa valya va uko lwamwi umbuyo: Ukeń ia kwakwa, ini vadenge! Mwende muroń utakisiaa undefisyo Satana na vamalaika vamwi!

⁴² Fulya niiworwaa nsoto nta ishiniinga shoonga. Niiworwaa nnyura nta ishiniinga kya inwa.

⁴³ Niikee mwini nta ishiwaria kyeń kwanu. Niikuywaa nta ishivika isaṛa. Niilolee na ifingwa nta ishisengera.

⁴⁴ Nawo vamwaṛuaa veemwiaa: A Nndumi, ni iri ki tindekulolya kuworwa nsoto ana nnyura ana kukee mwini ana kwikuywaa ana kwilolee ana kwikee mfinge, neese nta ikuṛundya mashora?

⁴⁵ Llyo avaaṛuaa eevaiaa: Namuia kya dede: Filya kitaare mwantanya vamwanamae vakwa iwo vannya na akwaa ni umwi tubu, nta mwanshitanya nań ndi.

⁴⁶ Nawo veendaa vakaa na ukiva lutasiaa. Na valya va usumani wo veendaa vakaa na muu utakisiaa.