Matayo 21 - MMA SHIYYA

¹ Ili vandeserikya kufui na Yerusalemu, vakafika muṛiń uvaangwaa Betifage ukee uroń lua lwa misenifu.

² Llyo Yesu aruma vaseṛo vamwi vavili kavaia: Endeń muṛiń ulya ukee mbele yanu. Mukooyaa-fo nshungu wavikye na kyaashe kyayo. Ibo-ṛomueń musheendee!

³ Na kwakooya eefo nndu amuuṛaa: Murwaa kwi? Mwień: Ni Nndumi afurie. Nae amwotoṛyaa.

⁴ Na kiteveto kikava kuro, naamu kifike kilya kyeemaauywaa mmwauya kisuku ulya eereraa:

⁵ Ień sambuṛa yo ya Sion: A ii mangi yafo yakushea na uwoo, ikee rembo mungo wa nshungu na kyaashe kya nshungu wingaa maṛio.

⁶ Na vaseṛo valya vakaenda vakatana, sheeli Yesu andevavavasa.

⁷ Vakannde nshungu ulya na kyaashe kyayo vakaala miseto yawo ifo mungo wa nshungu vakamwaṛutya-fo.

⁸ Na syamu kinga vakaala miseto yawo ifo shień. Na vandu kiindi vakaminya maṛamba a miri vakaala ifo shień.

⁹ Na vandu valya veekee mbele yamwi na valya veekee numa yamwi vakankabya nndoṛo veereraa: Osiana iwe Mwana wa Davidi! Eetikiswa ulya asha na irina lya Nndumi! Osiana iwe mangi ya iṛuvewu!

¹⁰ Neeli andeaka kulya Yerusalemu, muṛi woose ukaushana ukanumbua: A nndu uu ni i?

¹¹ Isyamu lia lya vandu likanumbua: Uu yye Yesu mwauya fisuku ulya wa Nasareti ya Galilaya.

¹² Kyasia Yesu kaaka ifo numbeń ya Iṛuva kaumbuta valya veekee ikumbya-fo na yuṛya-fo woose. Kafuluta mesa ta valya veekee iilasha fesa na fifumbi fa valya veekee ikumba mbuku.

¹³ Kavaia: Nkitisiṛe: Numba yakwa ivaangwaa numba ya iterervya, kake ini mwaiaṛua ikava mbanga ya fisoki.

¹⁴ Llyo ashewa vvandu vafu miso na vakee manketenkete ifo numba ya Iṛuva. Nae kavakiṛa woose.

¹⁵ Kake vakohani vanini na vaaṛia va mitisine ili vandelolya maṛiikiso wo na vana veekabaa mindoṛo ifo numba ya Iṛuva veenumbuaa: Tikiṛe, Mwana wa Davidi, vakatuṛuka.

¹⁶ Vakamwia: Kwisile sheeli iva vakee inumbua? Yesu kavaia: Ee. Mwansoma se nta limwi kirero ki: Kaniń ka vana vannya na vakee yonga kwamaawutya tikisi yafo?

¹⁷ Kavatia-wo kasomuka wooṛo ya muṛi kaenda Betania kandelala-fo.

¹⁸ Neeli lya ndesi ngama eeriee shia ya yuya na kulya muṛiń kaliwa nsoto.

¹⁹ Kalolya nri wa nkuu ukee mbaai ya shia. Kandeulla nta ikooya-fo kindo uwore kita maru meni. Nae kauia: Kukivikaa lingi nunda kumande miṛeṛe na miṛeṛe ndi. Na nkuu ulya ukauma lia eni.

²⁰ Ili vanalosho vandelolya kive kuro vakaṛiika vakanumbua: A kyava are ili nri uu wauma limwi nsi?

²¹ Yesu kaaṛua kavaia: Nkue nkue namuia: Kwakooya mukusuṛaa Iṛuva mutaare inunua, nta ni iki mutanaa sha kya nkuu uu ndi. Na akwaa mwaia uro lu: Iṛuka ia kukai kundekweeṛa ifo nruveń, kyasia kivaa kuro da.

²² Na kyoose muterevaa Iṛuva mukusurye, muniingwaa.

²³ Kyasia ili vandemaa ifika ifo numba ya Iṛuva eevaloshaa, kashewa vvakohani vanini na masiingo a vandu. Vakanumbua: Nkwa muumu wa ngata ingai ili kwatana findo sha ifi? Na ito akuniingye muumu to ni i?

²⁴ Yesu kaaṛua kavaia: Na akwaa nniń mfurie imuuṛa kirero kimwi: Mukanshiia, nań mmuiaa nkwa muumu wa i nkee itana ifi.

²⁵ A ubatiso lwa Yohane luukye kwi? Luukye iṛuvewu ana nkwa vandu? Nawo vakakuuṛa wo eni na veni veenumbuaa: Kwakooya tanumbua: Luukye iṛuvewu, llyo atiiaa: Naamu ki kitaare mwakusuraań?

²⁶ Na kwakooya tanumbua: Luukye kunu vanduń. Teeṛee wiingi lo lwa vandu. Amu woose valolya sheeli Yohane mmwauya fisuku.

²⁷ Vakaaṛua Yesu vakanumbua: Tiishi ndi. Nae kavaia: Na akwaa nniń mmuiaa ini sheeli nkwa muumu wa i nkee itana ifi ndi.

²⁸ Naare mukusaṛye? Eeifoo nndu eeworee vana vavili. Kaenda kwa ulya wa mbele kamwia: Mwana wakwa, nnu enda iṛunda mashoṛa kulya nndeń.

²⁹ Nae kaaṛua kanumbua: Neendaa ndi. Numa kakurra kaenda.

³⁰ Kaenda kwa ulya wa kavili kamwia kilya kyeni. Nae kaaṛua kanumbua: Ee nndumi, nkee yenda, nta ikyenda.

³¹ A kari ka vandu va vavili nuungau andetana kilya kindesenya ndee naań? Vakanumbua: Ni ulya wa mbele. Yesu kavaia: Nkue nkue namuia: Vasańiṛya kyaalo na vaka va shia wwo vamubookyaa ini yaka umangiń lwa Iṛuva.

³² Amu lia Yohane mbatisa ashe kwanu, alatya shia ya usumani, neeni nta ikunda imwirikya. Kake vasaniṛya kyaalo na vaka va shia wwo vakunda inkusura. Neeni ili mundelolya kive kuro, nta ikurra numa ana ikunda iilashika munkusure.

³³ Aranyiń sumu ingi! Eeifoo nndu muyanumba, nae eeroongyee nnda wamwi wa misabibu. Kaulengetya na uvarile karema-fo na andu a ikamya nunda. Katanya-fo nganga ya iringa karwaa-fo varemi kaenda kyaaṛo.

³⁴ Kyasia ili kyeeri kindefika kya iyaa nunda, karuma maketi amwi kulya kwa varemi valya vandewaria nunda tilya tamwi.

³⁵ Kyasia varemi valya vakawara maketi alya amwi. Umwi vakankaba na ungi vakawwaa na ungi vakankaba na mawe.

³⁶ Karama lingi maketi engi meengi kita alya a mbele. Vakavatanya sha lia da.

³⁷ Na lya ifurumya kavarumya mwana wamwi kanumbua: Ye mwana wakwa muni vamweṛeaa.

³⁸ Kyasia ili varemi valya vandelolya mwana ulya, vakakurera wo veni na veni: Uu mmuyadińu. Sień tiwwaa tiware dińu ise ti veni.

³⁹ Vakawwara vakansomuta woṛo ya nnda ulya vakawwaa.

⁴⁰ Kyasia ili muni nnda ulya wa misabibu ashaa, nkiki atanyaa varemi valya naań?

⁴¹ Vakamwia: Aretaa vakasha valya, nae aruusaa varemi vengi nndeń ulya wa misabibu. Nawo vashenrwayaa wavi lwa nunda tamwi, ili feeri fayo fifikaa.

⁴² Yesu kavaia: Mwansoma se karikari ka mitisine sheeli: Iwe lia lindelewa watana numba llyo lindeva iwe inini lya wembe? Mfo kindeva kuro kyuka na kwa Nndumi muni kikava kindo kya iṛiikisa misoń eru.

⁴³ Kiimba kya iki namuia: Umangi lwa Iṛuva lusokwaa kwanu tanniingwa ufwari lungi taa luvikaa nunda tayo.

⁴⁴ Na ito awaa iweń ilyo afikafikaa. Na ulya woose awoywaa ni iwe lyo limwesaa na ivviṛisa deń.

⁴⁵ Vakohani vanini na Vafarisayo ili vandeita sumu tamwi, vakamanya sheeli nkyawo kyeni akee irera.

⁴⁶ Nawo vakaraya mwaanya wa iwwara. Vakaeṛea isyamu, fulya wo veelolyee sheeli mmwauya.