Matayo 16 - MMA SHIYYA

¹ Kyasia Vafarisayo na Vasadukayo vakanshea vakamwaala. Vakantereva avaoruse kiringisyo kyukye iṛuvewu.

² Nae kavaaṛua kavaia: Ukwawuń munumbuaa: Nnu tiifo ngesa, amu iṛuvewu litondoṛye.

³ Kukankya mukanumbua: Nnu ikabaa fua ya kiṛuṛumu, amu iṛuvewu litondoṛye, amu na iṛumbe lifumbye. Ini mwishi imanya fa iṛuvewu na imanya ifaavanisa, kake myorusye ya mikonu ii mutaimanyi.

⁴ Ufwari lu ukasha na waaisi lufurie ilolya myorusye. Kake luniingwaa myorusye ndi kita myorusie ilya ya mwauya fisuku Yona. Kavatia-wo kaenda.

⁵ Neeli vanalosho vandeitika kwa kulya, vakakooya vanrekyo iimboo mikate ya kishawu.

⁶ Llyo Yesu avaia: Kulleń na ikwiisa kidooka kya Vafarisayo na Vasadukayo!

⁷ Nawo vakavingana wo veni na veni veenumbuaa: Eeba ni ili tarekyo iimboo mikate.

⁸ Llyo Yesu amanya makusaṛo awo kavaia: Muṛe vandu va ikusura yaangu, naamu ki mukee ivingana mu veni na veni, mfulya kitaare mweemboo mikate?

⁹ Ini mwamaaṛukyo ndi ana nta mukumbuye mikate ilya iraanu yawuurusa vandu valya fiku firaanu na mikusha ilya mundeishuṛa fibeṛeshu ikee inga?

¹⁰ Ana nta mukumbuye mikate ilya mfungare yawuurusa vandu valya fiku fiini na mikusha ilya mundesańiṛya kasa iifilee?

¹¹ Kyavaań are kitaare mukee yaṛukyo̱ nkilya narera, mumanyi sheeli kitaare nkiimba kya mikate? Kyasia kusembekeń nnu kidooka kya Vafarisayo na Vasadukayo!

¹² Llyo kindevaaṛukya vakamanya, sheeli avaia vakuringe kiimba kya kidookye kya mikate ndi, kake vakuringe miloshye ya Vafarisayo na Vasadukayo.

¹³ Kyasia ili Yesu andefika muṛiń wa Kaisaria ya Filipo, kauṛa vanalosho vamwi eevaiaa: A vandu vanumbuaa Mwana wa nndu yye i?

¹⁴ Vanalosho vakanumbua: Veefo vanumbua: Ni Yohane mbatisa. Na vengi vakanumbua: Ni Elia. Na vengi vakanumbua: Ni Yeremia ana ni umwi wa vaauya fisuku.

¹⁵ Yesu kavauṛa: A ini munumbuaa nkee i?

¹⁶ Simon Petiro kaaṛua kanumbua: Iwe ni iwe Kristo Mwana wa Iṛuva muni muu.

¹⁷ Yesu kaaṛua kamwia: Kukee wa ngoma, Simon wa Yona, amu muyawili na usao amakii ikurambuya ifi ndi, kake nNde yakwa wa iṛuvewu yye ankurambuya.

¹⁸ Nań nakwia: Iwe ni iwe Petiro, na kwa ule ya iwe li ntanyaa-wo numba yakwa, yyo siṛi yakwa. Na myaango ya vafu iivingaa ndi.

¹⁹ Nań nkuniingyaa ngyufunguo ta umangi lwa iṛuvewu. Na kilya kyoose kwankifinga ia isangeń, na iṛuvewu kyammaa ifingwa. Na kilya kyoose kwankiboṛomua ia isangeń, na iṛuvewu kyammaa iboṛomulwa.

²⁰ Llyo andevavasa vanalosho vamwi nnu, vatandeia nta nndu sheeli yye Kristo.

²¹ Kuuka kyeeri kyo Yesu kabooka yorusa vanalosho vamwi, sheeli kyawara aende Yerusalemu andelisyo-fo ngyukiva shiingi mmasiingo a uruka na valosha vanini na vaaṛia va mitisine. Na iwalwa awalwa, na nkonu wa kararu aṛukaa.

²² Llyo Petiro anrwaa kyaanya kabooka innaya eemwiaa: Tia Nndumi, ifi nta fitakuvie ndi!

²³ Yesu kaaṛukya Petiro kamwia: Uya numa yakwa, Satana! Kukee kituva kyakwa! Amu iwe kukee ikusaṛa mboni ta iṛuvewu ndi kita ikusaṛa ta kivandu da.

²⁴ Llyo Yesu aia vanalosho vamwi: Nndu afurie ishisoṛa niń, akwime mikae yamwi, akurike nsalaba wamwi na ishisoṛa niń.

²⁵ Amu nndu afurie ikiṛa muu wamwi auretaa. Na nndu aretaa muu wamwi kiimba kyakwa aukiṛaa.

²⁶ Nkiki kyelekaa nndu, kwakooya awaraa isanga lyoose na mbusha yayo kareta nrima wamwi? Ana nkiki nndu aniingyaa ataue nrima wamwi?

²⁷ Ili Mwana wa nndu akaa ashe aṛee unini lwa Ndee andu emwi na vamalaika vamwi, llyo asheavyaa nndu woose kiińańani na mitanye yamwi.

²⁸ Nkue namuia: Kari ka iva vaselele ia vayo vatalolyaa ufu, nkumande valolyaa Mwana wa nndu eeshaa akee na unini lwamwi lwa umangi.