Matayo 15 - MMA SHIYYA

¹ Llyo Vafarisayo na vaaṛia va mitisine vashea Yesu vauka Yerusalemu. Vakamwia:

² Naamu ki ili vanalosho vafo vakee iburua mikae ya vakuuku? Fulya vatakee isangya maako ili veelyaa shoonga.

³ Nae kavaaṛua kavaia: Nki ili ini mukee vaburua ivavaso lya Iṛuva kiimba kya miloshie yo yanu?

⁴ Amu Iṛuva anumbua: India ndeo na maa. Na ulya ammaa ndee ana mae awalwa afwe.

⁵ Neeni munumbuaa: Kwakooya nndu aia ndee ana mae: Filya mwiwariaa kwakwa fa imulela nammaa ifirwaa waviń lwa numba ya Iṛuva. Kyasia nndu to akimakii iindia ndee na mae lingi ndi.

⁶ Nkuro mundeteveta kirero kya Iṛuva kiimba kya wishiviṛi lwa vakuuku vanu.

⁷ Ini vamakavili, Yesaya amuṛonga kisha lia aauya kisuku kanumbua:

⁸ Vandu va vashiindiaa na fiṛomu da, kake ngoo tawo tikee kwaasha nań.

⁹ Nawo vashiindiaa kya ruu kuṛań, neeli miloshie yawo valoshaa mmavavaso a kivandu.

¹⁰ Kavaanga isyamu lia lya vandu na io akai kavia: Aranyiń na iitumuso!

¹¹ Nta nkilya kikee yaka kaniń nkyo kiniingaa nndu ukwe ndi. Kake nkilya kikee isomuka kaniń nkyo kiniingaa nndu ukwe.

¹² Llyo vanalosho vamwi vakanshea vakamwia: Kwishi sheeli ili Vafarisayo vaita kirero kilya vasua?

¹³ Nae kavaaṛua kanumbua: Mwishi sheeli kilya kyoose kindeveekyo kitaare nNde yakwa wa iṛuvewu andekiveekya kiiṛulwaa.

¹⁴ Tień iwo! Amu mmidoń iirye midoń ingi mbele. Na ndoń ukairya ndoń ungi mbele vaolokaa woose vali vavili iriniń.

¹⁵ Petiro kaaṛua kamwia: Tiie misendye ya sumu yo, mbee!

¹⁶ Yesu kanumbua: Amu neeni kumande alli mukiseere nta kindo mwishi?

¹⁷ Nta mwammanya se sheeli kindo kyoose kyakaa na ifo kaniń, kyo kyolokaa ndewuń kikasomuka-fo kikakumbwa iriniń?

¹⁸ Kake filya fuukaa ifo kaniń ka nndu fasomuka fuuka na nrimiń. Nafo mfo finiingaa nndu ukwe.

¹⁹ Amu ifo nrimiń mfo kundo aukaa makusaṛo makasha na iwaa na waaisi na yaaika na unini na fa ukureki lwa wongo na nrumu.

²⁰ Mfo ifo finiingaa nndu ukwe. Kake nndu kalya shoonga na maako atakee masangye ikyo kiniingaa nndu ukwe ndi.

²¹ Kyasia Yesu kauka kulya akai kaenda kulya miingoń ya Tiro na Sidon.

²² Na nndu nka wa Vakanaani kanshea auka na kulya miyanuń ya ngyurukeń tilya. Kawaanga na ununga unini eemwiaa: Anna Nndumi Mwana wa Davidi, shililya! Mwana wakwa wa sambuṛa akee yunganiswa nnu ni uketo.

²³ Nae nta imwanta kirero. Vanalosho vakanserikya vakantereva veemwiaa: Lleke aende, mbee, amu akee iṛoṛongya nnu numa yeru.

²⁴ Nae kavaaṛua kavaia: Niń nanrumwa kwa mburu shireti ta ngyufwari ta Isiraeli tubu.

²⁵ Na nka ulya kanserikya kawa na si mbele yamwi kamwia: A Nndumi, kwasheelekań?

²⁶ Na Yesu kamwaṛua kamwia: Nkisha isoka vana shoonga yawo na yeeṛya makite ndi.

²⁷ Na nka ulya kamwia: Ee Nndumi nkya dede. Kake na akwaa mmakite nawo akuliyaa filya fiirikyaa si fuuka faashoń fa womi vayo.

²⁸ Llyo Yesu amwaṛua kamwia: Ee nka, ikusura lyafo ni inini. Kikuvie sheeli kufurie. Na sambuṛa yamwi ikava shisha kyeeri kilya kyeni.

²⁹ Yesu kakwimboo ifo kafika mbaai ya nruva ya Galilaya. Kasaama uroń kakaa-fo rembo.

³⁰ Kashewa nsyamu shiingi ya vandu veemwendyee fitoṛokombo na midoń na vateeshi irera na fisaya na vengi veengi. Vakavarwaa marendeń a Yesu, nae kavakiṛa.

³¹ Na isyamu lia likaṛiika, ili vandelolya vafu uṛoo veereraa, na fisaya filya veeshiaa, na vatoṛokombye valya veendaa, na midoń ilya iilolyaa. Nawo vakaitikisa Iṛuva wa Isiraeli.

³² Yesu kavaanga vanalosho vamwi kanumbua: Nawavyo mmuu kiimba kya isyamu li. Fulya yansinda kwakwa mikonu iraru vakee andu emwi nań ana vataare kindo kya ilya. Lingi ilakana nawo vakee na soto nkee imakii ndi, amu vatashe ilemyo ifo shień.

³³ Vanalosho vamwi vakamwia: Nkwi tuutaa mikate miingi ia ṅṅaloń kumande yawuurusa isyamu li Ufile kuri?

³⁴ Yesu kavaia: Moore mikate inga? Vakamwia: Ni mfungare na fikunga faangu.

³⁵ Nae kavavasa syamu ilya ikaa rembo.

³⁶ Kawaria mikate ilya na makunga alya. Kaana Iṛuva kaifukyafukya kaniingya vanalosho vamwi. Nawo vakaavya isyamu lia.

³⁷ Vakalya woose vakawuura. Vakasańiṛya fibeṛeshu filya fasaa fa mikate vakaishuṛa mikusha mfungare.

³⁸ Na iwo vandelya veekee womi fiku fiini vateefo vaka na vana.

³⁹ Nae kalakana na syamu ilya. Kaaṛukya ngalaveń kaenda taari ta miingo ya Magidala.