Matayo 13 - MMA SHIYYA

¹ Nkonu ulya muni Yesu kasomuka numba kakaa rembo mbaai ya nruva.

² Na isyamu iingi lya vandu likakuumbya alya akai. Nae kaaṛukya ngalaveń kakaa-fo rembo. Na syamu ilya yoose ikasalala mbaai ya nruva.

³ Kavaia firero fiingi na sumu eenumbuaa: Nndu mweeṛa mbeu akwimboo andeeṛa mbeu tamwi.

⁴ Neeli eeṛaa mbeu, tingi tikawa shień na ndee tikasha tikalya.

⁵ Tingi tikawa maweń andu lutayo uteri wiingi. Na imia tikamia ree, fulya uteri lwikee waangu.

⁶ Neeli mwi undevava tikauma, fulya mirarii itaolokye si.

⁷ Tingi tikawa miingeń. Miinga ikamia ikatifiṛa.

⁸ Tingi tikawa uteriń unuru tikavika filimu. Kimwi kikavika iyana na kingi makumi arindaru na kingi makumi araru.

⁹ Na nndu awore marwi a yaranya aaranye!

¹⁰ Vanalosho vamwi vakanshea vakamwia: A kiteveto kwarera nawo kwa sumu nkiki?

¹¹ Nae kaaṛua kanumbua: Ini mwanniingwa imanya lya imanya kiṛisi kya umangi lwa iṛuvewu. Kake iwo wo vvaniinge ndi.

¹² Amu ito awore kindo, nae aniingwaa fiingi fifumbukye. Kake ito atawore kindo, asokwaa na kilya akooyaa awore.

¹³ Nkyo kiteveto narera nawo na sumu, amu vakee illa, kake valolye ndi, vakee yaranya, kake veesile ndi ana vakee yaṛukyo ndi.

¹⁴ Na kirero kya mwauya fisuku ulya Yesaya kikaawukya kwawo kiinumbuaa: Iita mwitaa, kake mumanyaa misendye ndi. Illa mullaa, kake mulolyaa ndi.

¹⁵ Amu ngoo ta vandu va nshuumu na marwi awo eesile kisha ndi. Vakasindiṛa na miso awo, amu vatalolye kindo na miso awo, nta iita na marwi awo, nta yaṛukyo ngooń tawo veelashike, nań wakiṛe.

¹⁶ Kake ini miso anu avva a ngoma amu alolye, na marwi anu amu eesile.

¹⁷ Nkue namuia: Vaauya fisuku veengi na vandu vasumani veelangyee ilolya ikyo ini mulolye nta ilolya na iita ikyo ini mwisile nta iita.

¹⁸ Kyasia ini aranyiń sumu ya mweeṛa mbeu kasa ikai.

¹⁹ Nndu woose aaranyaa kirero kya umangi atakimanyi, nkituva ulya ansheaa akyute-fo kilya kyeenroongwaa nrimiń wamwi. Uu yye andeeṛwa shień.

²⁰ Na ito andeeṛwa maweń, ito yye ulya aaranyaa kirero kyo kakiwaria na ifura.

²¹ Kake awore mirarii kari kamwi ndi. Akaa kwa kyeeri kyaangu. Ili ishaa ngatara ana yumbutwa kiimba kya kirero kyo, lia eni kalemwa.

²² Na ito andeeṛwa miingeń ito yye ulya aaranyaa kirero kawarwa ni utaṛawu lwa isanga li na ilembwa mmasaa, nafo fikafwa kirero kyo nta ivika kilimu.

²³ Na ito andeeṛwa uteriń unuru ito yye ulya akee yaranya kirero na ikimanya. Ito yye akee ivika filimu. Umwi kavika iyana, na ungi makumi arindaru na ungi makumi araru.

²⁴ Yesu kakabya vandu sumu ingi kanumbua: Umangi lwa iṛuvewu luvakani na nndu andeeṛa mbeu shinuru nremiń yamwi.

²⁵ Ili vandu vanderekya ruoń, kituva kyamwi kikasha kikaeeṛa mbeu ta masinde kari ka umbi kikaenda.

²⁶ Ili umbi undemia ukava unyuṛi ukareeka maroona, na masinde akalolyo-fo.

²⁷ Vaṛundi va nndumi ulya vakasha vakamwia: Oo nndumi, kundeeṛa mbeu shinuru nremiń yafo se? Nkwi indeuta se masinde iva?

²⁸ Nae kavaia: Nkituva kyantana iki. Vaṛundi vakamwia: Kufurie teende tindeiṛua-fo masinde wo?

²⁹ Kavaia: Wode, eeba ili mwiṛuaa masinde, mwiṛuaa na umbi.

³⁰ Tień fińine andu emwi foose kumande kyeeri kya iminya. Na kyeeri kya iminya llyo niaa valya vaminyaa: Sańiṛyeń mbele masinde alya, mufinge myanda akoṛwa. Kake umbi muusańiṛye makumbiń akwa!

³¹ Kavakabya sumu ingi kavaia: Umangi lwa iṛuvewu luvakani na mbekye imwi ya karadali. Nndu andeimboo kandeeṛa ifo nremiń yamwi.

³² Nayo ikee shinnya kita mbeu toose. Kake ili indeńina, ikava nini kita maṛe alya woose akee maveekye a shoonga ikava nri nnini. Na akwaa nndee tikasheokya fifuri fayo ifo maṛambeń ayo.

³³ Kakabya sumu ingi kanumbua: Umangi lwa iṛuvewu luvakani na kindo kidookaa kya ifumbisa uru. Nndu nka kakiimboo kakisandasanda na uru tufaasho firaru. Nayo ikadooka yoose deń.

³⁴ Ifi foose Yesu andeia syamu ilya ya vandu kwa sumu. Nta kirero andevaia kitaare nna sumu.

³⁵ Na kiteveto kikava kuro nkilya kindererwa na kana ka mwauya fisuku Yesaya eenumbuaa: Ntaṛambuaa kana kakwa nrere na sumu. Nrambue mboni to tiṛikye kuuka mabookyoń a isanga li,

³⁶ Llyo Yesu alakana na syamu ilya kaaka numba. Vanalosho vamwi vakanshea vakanumbua: Taaṛuye sumu yo ya masinde ifo nremiń!

³⁷ Kaaṛua kanumba: Ulya andeeṛa mbeu shinuru mMwana wa nndu.

³⁸ Na nrema ni isanga li. Na mbeu shinuru wana valya va umangi. Na masinde alya wana va Nkasha ulya.

³⁹ Na kituva kilya kindeeṛa mbeu tilya ni Ndiingi. Na iilula ni nkonu ulya wa ifurumya. Na veelula vvamalaika va Iṛuva.

⁴⁰ Kyasia sheeli masinde asańiṛyoo na yeeṛwa muroń, mfo na ifurumya lya isanga li likaa live.

⁴¹ Mwana wa nndu arumaa vamalaika vamwi, nawo vasańiṛyaa misindaṛa yoose yutwa ifo umangiń lwamwi na iwo vatanaa fa nkuushu.

⁴² Nawo vavaeeṛaa iriniń lya muro. Na ifo kindeviaa-fo kiiyo na ifina kitaku.

⁴³ Llyo valya vasumani vavaramaa sha saa ifo umangiń lwa Nde yawo. Ulya awore marwi a yaranya aaranye!

⁴⁴ Lingi umangi lwa iṛuvewu luvakani na masaa eendikwaa si nremiń. Neeli nndu andeakooya-fo eeremaa kalikya ninnsha kafura nnu. Kaenda kandekumba findo foose eeworee kauṛa nrema ilya.

⁴⁵ Lingi umangi lwa iṛuvewu luvakani na nndu nkumbi eekee iṛuya samana shinuru.

⁴⁶ Ili andekooya samana imwi iwore uuru unini, kandekumba findo foose eeworee kasha iiuṛa.

⁴⁷ Na lingi umangi lwa iṛuvewu luvakani na nreyo undeolotwa nruveń ukawara makunga a mikae yoose iifo.

⁴⁸ Na ili undeishua, vakaomua-fo. Vakaurosa io mbaai vakakaa rembo vakasaua-fo makunga alya akee manuru vakarwaa fiyeń fawo. Na alya akee makasha vakaakumba neefo.

⁴⁹ Nkuro da kivaa na ifurumya lya isanga li. Vamalaika va Iṛuva vashaa vandeavanisa vakasha na vanuru vavaute ifo kari kawo.

⁵⁰ Nawo vavaeeṛaa ifo iriniń lya muro. Neefo mfo kivaa kiiyo na ifina kitaku.

⁵¹ Yesu kavauṛa: Mwamaaṛukyo ni ifo foose? Vakamwia: Ee Mbee.

⁵² Nae kavaia: Kiimba kya ikyo ulya woose akee mwaṛia wa mitisiṛie ya umangi lwa iṛuvewu avakani na muni numba afisye masaa amwi kava muuta-fo findo fiya na fikuu.

⁵³ Kikava ili Yesu andemaa irera sumu to, kakwimboo kaenda.

⁵⁴ Neeli andefika muṛiń wamwi kulya ańinya, kavaloshya ifo numba yawo ya iterevya. Vakariika vakanumbua: A uu nkwi autye uṛango lu na imakii lya mikae ii?

⁵⁵ A uu mmwana wa mwaṛia ulya muvasha firi se? Na mae ni ito avaangwaa Maria ndi? Na vanavamae ni Yakobo na Yosefu na Simon na Yuda se?

⁵⁶ A vamfwamae vakee se kunu kweru woose? Kyasia nkwi nndu uu autye findo fi foose?

⁵⁷ Kyasia vakautya-wo insua. Na Yesu kavaia: Mwauya kisuku ailwaa kitaare ni ifo muṛiń wamwi na ifo kyeń kwamwi ndi.

⁵⁸ Nae andekitanya-fo findo finini fa finya ndi, fulya vatandekusura.