Matayo 12 - MMA SHIYYA

¹ Kyeeri kilya Yesu aira nremiń ta ngano nkonu wa Sabato. Vanalosho vamwi vakabwa nsoto vakabooka imushuamushua fyaa fa ngano vakalya.

² Neeli Vafarisayo vandelolya, vakamwia: Llate vanalosho vafo vakee itana findo fitasumani itana nkonu wa Sabato.

³ Nae kavaia: Mwansoma se sha lia Davidi atana kyeeri aliwa nsoto ye na vaaroe vamwi?

⁴ Sheeli andeaka neefo numba ya Iṛuva vakalya mikate ilya irawaa ifo numba ya Iṛuva iteesumanii iliwa yye ana vaaroe vamwi kita vakohani veni da?

⁵ Ana nta mwansoma ifo mavavasoń se sheeli vakohani va numba ya Iṛuva veeumbuaa filya fitatanwaa nkonu wa Sabato, nawo nta itana kikasha?

⁶ Kake namuia: Ia ayo uu akee nroo kita numba ya Iṛuva.

⁷ Kake kifo mwimanyaa misendye ya kirero ki: ”Kilya kishisenyaa niń ni ililya vandu, ni iraswa ndi“, kyasia mwikusaṛyaa vandu iva vatawore ilomi kikasha ndi.

⁸ Amu Mwana wa nndu ye yye Nndumi na wa nkonu wa Sabato.

⁹ Kakwimboo ifo kaenda numbeń yawo ya iterevya.

¹⁰ Lia eni kalolya nndu wa uko lutoṛokombye. Nawo vakamwuṛa veenumbuaa: Kisumani ikiṛa nndu nkonu wa Sabato? Amu vakooye mwaanya wa indiinga.

¹¹ Nae kavaia: Ni i umwi kari kanu awore yaanri lyamwi limwi likawa iriniń nkonu wa Sabato atalyutaa-fo alikiṛe?

¹² A nndu yye eelanya mburu se? Kyasia wifo muumu itanya nndu kisha nkonu wa Sabato.

¹³ Lia eni kaia nndu ulya: Seṛeesa uko lwafo! Nae kaseṛeesa lukava usha sha lua lungi.

¹⁴ Na Vafarisayo vakasomuka vakandeṛuya kyama kya iwwaa.

¹⁵ Ili Yesu andemanya kuro, kakwimboo-fo.

¹⁶ Vandu veengi vakansoṛa, nae kavakiṛa woose. Kavaia: Manya mutaongoye!

¹⁷ Kyave kuro, amu kifike kilya kyeenrerwaa mmwauya fisuku Yesaya eenumbuaa:

¹⁸ A uu ndundi wakwa nammusaua, yye nkunde wakwa ashisenye nrimiń. Nań nrwaa Mumuyo wakwa kwa ule yamwi. Nae aongoyaa vayavaṛumu kya uumisyo.

¹⁹ Nae anaa ndi ana nta aṛoṛongyaa ndi. Ana nta ununga lwamwi lwitiwaa ifo shień ndi.

²⁰ Iraa lifotikye nta alifukyaa ndi. Na uruu lukee ifumbya musu nta alurunyaa ndi kumande annde uumisyo luvinge.

²¹ Na irina lyamwi llyo vandu va masanga valiveṛeaa“.

²² Llyo aendewa nndu eeworwaa mmumuyo nkasha, akee na mfu miso na ateeshi irera. Nae kankiṛa. Na nndu ulya ateeshi irera karera na ilolya.

²³ Isyamu lyoose likaṛiika. Tikanumbua: A uu mmwana ulya wa Davidi se?

²⁴ Kake Vafarisayo ili vandeita kuro vakanumbua: Ito nta aumbutaa mimuyo mikasha kitaare niikai aelekyo mBelisebuli ito akee nnini wa mimuyo mikasha ndi.

²⁵ Ili Yesu andemanya makusaṛo awo kavaia: Umangi loose lukankuluya na ikabana weni luvaa nrabu. Na muṛi woose ana numba ikankuluya yo sheni na sheni isalalaa ndi.

²⁶ Na kwakooya Satana aumbuta Satana ungi, ankuraua na ikukurya ye muni. Kyasia umangi lwamwi lusalalaa are?

²⁷ Na kwakooya niń nuumbutaa mimuyo mikasha kwa finya ya Belisebuli, a vana vanu vaiumbutaa veelekyoo ni iń? Kwa ikyo iwo wwo vashemurambuaa.

²⁸ Kake kwakooya niń nkee yumbuta mimuyo mikasha kwa finya ya Mumuyo wa Iniva, kyasia umangi lwa Iṛuva lwammaa imufikya neeni te. Ana naare nndu amakii yaka numba ya nndu awore fiya na insoka fiya famwi kitaare afingaa mbele nndu ulya awore fiya? Llyo amakii insoka foose fikee numba yamwi.

³⁰ Nndu atakee andu emwi nań, ito nkituva kyakwa. Na nndu atakee isańiṛya andu emwi nań, ito anyanyataa.

³¹ Kiimba kya ikyo namuia: Ireko lyoose na kirero kyoose kya kirumu nndu alilyoo, kake kya iruma Mumuyo Nsongori kyo alilyoo ndi.

³² Nndu woose, areraa kirero kya iila Mwana wa nndu, ito alilyoo. Kake nndu, areraa kirero kya iila Mumuyo Nsongori, akooyaa ililyo nta isangeń ili lya alli ana nta isangeń lishaa numa ndi.

³³ Mukavveekya nri nnuru, to uvikaa nunda shinuru. Ana mukaweekya nri nkasha, nato uvikaa nunda shikasha. Amu nri urambulwaa nnunda tayo.

³⁴ Eeni uṛiti lwa shoka mumakii are irera finuru, neeni mukee vakasha? Amu ifo fiishule nrimiń wa nndu mfo kana kafireraa.

³⁵ Na nndu awore fisha nrimiń mfo feni aavyaa vandu vengi da. Na nndu afisye fikasha nrimiń mfo feni da aavyaa vandu vengi.

³⁶ Kake namuia: Kirero kyoose kya dua vandu vakireraa vakyuṛwaa nkonu ulya wa mwaandu.

³⁷ Amu na firero fafo kumakii ikooya ikia, ana na firero fafo kumakii ikooya ureti.

³⁸ Llyo kiindi kya vaaṛia va mitisine na Vafarisayo valya veeyoo vakaaṛua vakanumbua: Llosha, tifurie ilolya myorusye kwafo.

³⁹ Nae kaaṛua kavaia: Ufwari lu ukasha na waaisi lukee iṛuya myorusye. Nta luniingwaa myorusye ndi kita myorusye ilya ya mwauya kisuku ulya Yona.

⁴⁰ Amu sheeli Yona andekaa ndewuń ya ikunga lia inini kakaa-fo mikonu iraru kio na nsanyiń, mfo kuro na Mwana wa nndu akaa uteriń mikonu iraru kio na nsanyiń.

⁴¹ Na vandu va Ninive vasalalaa nkonu wa uumisyo andu emwi na ufwari lo, nawo vavaumisyaa sheeli warekwa. Amu wo vakurra kiimba kya mikwanisye ya Yona. Na io ayo ito akee nnini kita Yona.

⁴² Mangi nka ulya wa taari ya itate asalalaa nkonu ulya wa uumisyo andu emwi na vandu va ufwari lu, nae avaumisyaa sheeli warekwa. Amu ye ashe auka taari ta mmando wa isanga, amu ashearanya waṛia lwa Salomon. Na ia ayo ito akee nnini kita Salomon.

⁴³ Kwakooya mumuyo ulya nkasha wasomuka nnduń, uṛaaṛaa andu utayo mura wiṛuyaa andu a iimuya, nta ikooya.

⁴⁴ Numa unumbuaa: Nuuyaa numba yakwa kulya nndesomuka. Neeli ushaa, ulolyaa yoore muni ndi, kake nshaangate na yambikwa.

⁴⁵ Lia eni wendaa indeondua mimuyo ingi mikasha mfungare ikee mikasha kita ito muni. Nayo ikaaka na ikaa-fo. Na nndu to mikae yamwi ivaa mikasha kita ilya ya mbooko. Mfo kuro kiviaa na ufwari lu ukasha.

⁴⁶ Ili eekireraa na isyamu lia lya vandu, mae na vanawo vakasha. Vakasalala io wooṛo vakafura irera nae.

⁴⁷ Nndu umwi kamwia: A to yeyo wafo aselele io wooṛo na vananu, vafurie irera nawe.

⁴⁸ Nae kaaṛua eeiaa nndu ulya: A yeyo wakwa ni i? Na vaniru vva ki?

⁴⁹ Kasaaṛa uko andeorusa na alya vaseṛo vamwi vakai kanumbua: A wo yeyo wakwa na vaniru vakwa!

⁵⁰ Amu nndu woose atanaa kilya Nde yakwa wa iṛuvewu afurie, ito yye mwanama na mfwama na yeyo wakwa.