Matayo 11 - MMA SHIYYA

¹ Kyasia ili Yesu andemaa ivavasa vanalosho vamwi valya ikumi na vavili, kakwimboo ifo kaenda indelosha na ikwanisa ifo miṛiń yawo.

² Ili Yohane andeita akee kifingyoń mboni ta filya Yesu eekee itana, kanrumya vanalosho vamwi vavili vandemwuṛa:

³ Ni iwe ulya ashaa ana tikavera ungi?

⁴ Yesu kaaṛua kavaia: Uyeń mundeongoya Yohane mboni ta filya mwaita na ilolya, nato nto iti:

⁵ Midoń ikee ilolya na vandu vakee manketenkete a meengo vakee imakii yenda. Na valya vaworwa ni ivave vakee iva vesha na vafu marwi vakee iita. Na vafu vakee iṛuka na valya vakiva vakee ikwaniswa mboni shinuru ta ivakiṛa.

⁶ Na wwa ngoma ulya atashituṛukyaa.

⁷ Ili vanalosho valya vandemaa yenda, Yesu kabooka iia vandu mboni ta Yohane kavauṛa: Oo nkiki mweenda indella kulya bateń? Nsuṛumuta ikee iseniswaseniswa mmburaato yyo mwandella?

⁸ A nkiki kyamusomuta mukandella? Ni nndu aṛee miseto mirenderi? Lleń valya vaṛaa miseto mirenderi vakee numbeń ta mamangi.

⁹ Ana nkiki kyamusomuta mukandella? Mmwauya fisuku yye mwifuriee indemulla? Ee da, nań namuia: Ni nnini kita mwauya fisuku.

¹⁰ Fulya ito yye eentisiṛyoo kuro: ”A to nrumi wakwa nammuruma akwirie mbele, andekusumanisya shia yafo“.

¹¹ Nkue namuia: Kunu kari ka iwo vandeiriwa vvaka nta andekwimboo-fo nndu akilye Yohane mbatisa ndi. Kake ulya akee munnya ifo umangiń lwa iṛuvewu ni nnini kita ye.

¹² Kuuka kyeeri kya Yohane mbatisa umangi lwa Iṛuva lweende na finya kumande nnu, na vafinya vakawwaria na finya.

¹³ Amu vaauya fisuku woose andu emwi na uvavaso veemaauyaa kumande Yohane alolikaa.

¹⁴ Na mukankunda iirikya, ye yye Elia ulya eenringisyoo sheeli akaa ashe.

¹⁵ Ulya woose awore marwi a yaranya aaranye.

¹⁶ A kishuku ki kya alli nakivakanisa na kiki? Kivakani na fivana fikee soṛeń fiivaangaa vaaroe vawo veenumbuaa:

¹⁷ Tammukabya mbembe, nta itavana? Lingi tammukumbya ngoṛu, nta iiya?

¹⁸ Amu Yohane ashe nta ilya ana nta inwa vakanumbua: Aworwa mmumuyo nkasha.

¹⁹ Ili Mwana wa nndu andesha kalya na inwa vakanumbua: Lleń nndu uu akee mulya na munwa mfinyo, mmukunda vasanyiṛya kyaalo na varekwa! Kake Iṛuva amanyisaa uṛango lwamwi kwa mitanie yamwi.

²⁰ Kyeeri kilya llyo Yesu abooka inaya miṛi ilya alya andetanya myorusye ilya yamwi ya iṛiikisa miingi, na vandu nta yaṛuka mirimiń yawo.

²¹ Kanumbua: Ushi iwe Korasini! Ushi iwe Betisaida! Kikooye myorusye ii yatanika kulya muṛiń wa Tiro na Sidon sheeli yatanika kwanu, veekurraa kutu kyeeri kilya.

²² Kake namuia: Miṛi ilya ya Tiro na Sidon ililyoo nkonu ulya wa uumisyo kita ini.

²³ Nawe Kaperinaumu kweemiiraa nsendo kumande iṛuvewu, kwolotwaa kumande muṛoń utasiaa. Kifo myorusye yakwa yatanika kulya muṛiń wa Sodomu sheeli indetanika kwafo, wisalalaa kumande nnu.

²⁴ Kake namuia: Uruka lwa Sodomu lulilyoo nkonu ulya wa uumisyo kita iwe.

²⁵ Kyeeri kilya Yesu kanumbua: Nakwitikisa Nde kukee mangi ya iṛuvewu na isanga, fulya kwafisa vandu vakee ikuvaanga va-ṛango na vaaṛia mboni ti, kwatirambuya vaani.

²⁶ Ee Nde, nkuro kyakusenya.

²⁷ Nanrambikyo findo foose nNde yakwa. Nta eefo nndu eeshi Mwana kitaare nNde ndi. Ana nta eefo nndu eeshi Nde kitaare mMwana na ulya Mwana afurie inrambuya ndi.

²⁸ Oṛeshoń kwakwa ini mu woose muṛiikisyo mmikae yanu ya kivandu, nań mmuwiiṛyaa muu!

²⁹ Kurikeń mwanda wakwa na ikulosha na mikae yakwa, fulya niń nkee wwoo na ikunyiisa nkee ikunyiisa shi muni na utele lwakwa, llyo mwimuruswaa mirima yanu.

³⁰ Manyiń mwanda wakwa usisiṛaa ndi na iṛio lyakwa lilemikaa ndi.