Matayo 10 - MMA SHIYYA

¹ Kavaanga vanalosho vamwi valya ikumi na vavili kavaniinga finya ya yumbuta mimuyo mikasha na ikiṛa saka toose na ngyutanyaṛi ta mikae yoose.

² Marina a vanalosho valya ikumi na vavili wwo iva: Wa mbele ni Simon eevaangwaa lingi Petiro na Anderea mwanamae wamwi, na Yakobo wa Sebedayo na Yohane mwanamae wamwi,

³ na Filipo na Baritolomayo, na Toma na Matayo nsanyiṛya kyaalo na Yakobo wa Alufayo, na Lebayo eevaangwaa lingi Tadayo

⁴ na Simon Nkananayo na Yuda Isikariote, nae ni ulya andendiinga.

⁵ Iva ikumi na vavili Yesu ka varuma eevavavasaa eevaiaa: Manya mutaire shia ta veeni ndi ana nta ta miṛiń ya Vasamaria manya mutaire-fo ndi.

⁶ Llyo ńwana muware shia mwende kwa maanri alya arekye a numba ya Isiraeli.

⁷ Neeli mwiendaa, kwaniseń mwinumbuaa: Umangi lwa iṛuvewu lwansha kufui.

⁸ Kiṛeń valole, shiiseń na valya vaworwa ni ivave, ṛuteń na vafu, umbuteń na mimuyo mikasha. Mwankiniingwa kya ruu, kiniingyeń kya ruu.

⁹ Manya mutakurike saabu ana fesa ana nta senti ifo fitatiń fanu,

¹⁰ ana kishawu kya shień ana miseto ivili ana faaru ana mbiiri. Fulya ndundi wa mashoṛa kyawara aniingwa wavi lwamwi.

¹¹ Na muṛi woose ana kyungu kyoose mwakaa ṛuyeń nnu, ni i akusurye Iṛuva ifo muṛiń ito. Kaań kwamwi kumande muukaa-fo.

¹² Neeli mwakaa numba iisaniń.

¹³ Numba ilya ikamuwaria, unambwe lwanu luvafikye. Ana kwankooya kitaare imuwariaa, unambwe lwanu lumuuyie.

¹⁴ Na kwakooya nndu atamuwariaa ana imwaranya firero fanu, ili musomukaa numba ilya ana muṛiń ulya, vaangatyeń funga ya marende anu.

¹⁵ Nkue namuia: Llyo ńwana uruka lwa Sodomo na Gomora lulilyoo nkonu ulya wa uumisyo kita muṛi ulya.

¹⁶ Lleń niń namuruma sha mburu tikee kari ka mafisi. Kyasia ṛangueń sha sui, muwolye sha mbelele titawore mitambwe.

¹⁷ Kusembekeń vandu, fulya vamurwaa fikweniń fawo na imukabya ifo numba tawo ta iterevya.

¹⁸ Neeni murawaa kwa vashili na kwa mamangi kiimba kyakwa mushirambue kwawo na kwa vandu vateeshi Iṛuva.

¹⁹ Na kwakooya vamufingyaa mwaandu, mutaṛiikiswa mfilya mureraa ndi. Amu muniingwaa finya murere kyeeri kyo kyeni.

²⁰ Amu nta ni ini mureraa ndi, kake mMumuyo wa Nde yanu akee kari kanu nto areraa.

²¹ Amu nndu aotoṛaa mwanawo awalwa, na nsuṛi aotoṛaa mwana wamwi awalwa. Na vana vakwimboyoo vasuṛi vawo na ivawaa.

²² Neeni musulwaa vvandu woose kiimba kya irina lyakwa. Kake ulya asisiryaa kumande ifurumya, ito yye akifwaa.

²³ Kake ili vamuumbutaa muṛiń uu, rishyeń muṛiń ungi. Amu nkee imuia kya dede: Nta mumarisyaa miri ya Isiraeli kitaare Mwana wa nndu ansha ndi.

²⁴ Mwanalosho ańinyaa llosha wamwi ndi, ana iketi lińinyaa nndumi wamwi ndi.

²⁵ Kifilaa mwanalosho iińańana na llosha wamwi. Mfo kuro na iketi kifilaa iińańana na nndumi wamwi. Kwakooya vavaanga muni numba mumuyo nkasha, naare nkya mmwasi se valya vakee numba kwamwi?

²⁶ Kyasiań manya mutavaeṛee ndi! Amu kiifo kindo kifise kitalolikaa numa ndi. Ana nta kiifo kyama kifike kitamanyikaa numa ndi.

²⁷ Kilya namuvilya ifo llemiń andekireryeń ifo langeri. Na kilya mukee ikiitya kiṛisiń andeongoyeń mukee mmbewu.

²⁸ Manya mutaeṛee iwo vawore finya ya iwaa vvili da, vatamakii iwaa nrima. Kake eṛeeń ito awore finya ya ireta vvili na nrima na yeeṛa muroń utasiaa.

²⁹ A ngyuṛuu ivili tikumbwaa se na senti imwi? Nta lumwi luwee si, na Nde yanu atalwishi.

³⁰ Na akwaa mmafuli a mirwe yanu mmatale woose.

³¹ Kwa ikyo manya mutaeṛee, amu mukilye ndee na tikaingifwa ki.

³² Kyasiań ulya woose ashirambuaa mbele ya vandu, nań ninrambuaa mbele ya Vaava wakwa wa iṛuvewu.

³³ Na ulya woose ashikanaa mbele ya vandu, nań ninkanaa mbele ya Vaava wakwa wa iṛuvewu.

³⁴ Manya mutakusaṛe sheeli nansha innde unambwe isangeń. Wode! Nansha innde unambwe ndi, kake nshombo.

³⁵ Nansha isuyanisa nndu na ndee wamwi na mwana wa kika na mae wamwi, mfo kuro na nkwe na nkwe wamwi.

³⁶ Na valya va kyeń kwa nndu wwo veni vavaa kituva kyamwi.

³⁷ Ulya afurie ndee ana mae kita niń, ashiviaa ndi. Na ulya akundye mwana wamwi wa womi ana wa kika kita niń, ashiviaa ndi.

³⁸ Na lingi ulya atakurikaa nsalaba wamwi ashilatye numa yakwa, ashiviaa ndi.

³⁹ Ulya akundye muu wamwi kita niń, auretaa. Na ulya asuaa muu wamwi kiimba kyakwa aukiṛaa.

⁴⁰ Ulya akee imuwaria ini, anshiwaria niń. Na ulya akee ishiwaria niń, awwaria ulya anshiruma.

⁴¹ Ulya akee iwaria nndu mwauya, fulya akee nndu mwauya, awariaa maṛe a nndu mwauya. Na ulya awariaa nndu nsumani, fulya akee nndu nsumani, awariaa maṛe a nndu nsumani.

⁴² Na nndu ulya woose aniingaa umwi wa iwo vannya vakwa kyumbata kya usookwa lurelelaa, fulya akee mwanalesho, nkue namuia: Nta maṛe amwi arekaa kutu ndi.