Mariko 4 - MMA SHIYYA

¹ Kabooka lingi ivalosha akee mbaai ya nruva. Syamu shiingi nnu vakakuumbia alya akai. Nae kaaṛukia ngalaveń kakaa rembo ifo nruveń. Na syamu ilya yoose iikee kundo kuumu mbaai ya nruva.

² Kavalosha findo fiingi na sumu. Neeli eeloshaa kavaia: Aranyiń! Nndu nremi akwimboo andeeṛa mbeu.

⁴ Neeli eeṛaa, kiindi tikawa shień. Na ndee tikasha tikadola tikalya.

⁵ Na tingi tikawa maweń ataare uteri wiingi. Imia tikamia lla kasa uteri lwikee waangu.

⁶ Neeli mwi undevaa nnu, tikanaa, na fulya mirarii itaolokye si tikauma.

⁷ Na tingi tikawa miingeń. Miinga ilya ikaṅina ikatifiṛa nta ivika filimu.

⁸ Na tingi tikawa uteriń unuru tikaṅina na finya tikaṛengeka tikavika filimu. Ilya imwi ikavika makumi araru na ingi makumi arindaru na kumande iyana.

⁹ Kanumbua: Ulya awore marwi a yaranya aaranye!

¹⁰ Nae ili eekee kyaanya kyamwi, vandu valya vallengetye andu emwi na valya ikumi na vavili vakamwuṛa misendie ya sumu tilya.

¹¹ Nae kavaia: Ini mwanniingwa imanya kiṛisi kya umangi lwa Iṛuva. Kake iwo vakee wooṛo wo foose fivaviaa veekabio̱o̱ sumu.

¹² Naamu illa valle vataloliaa na yaranya vaaranye na marwi a wo nta na imanya misendie yayo, kaaṛa vataaṛuke vatio̱ mareko awo.

¹³ Kavaia: Kwakooya mutamanyaa sumu ii, naare mumanyaań sumu ti tingi toose?

¹⁴ Ulya mweeṛa mbeu nkirero kya Iṛuva andeeṛa.

¹⁵ Kake iwo vakee mbaai ya shia, mfo kundo akee yeeṛa kirero. Nawo vakammaa ikiita, lia eni Satana kasha na-wo kauta-fo kirero kilya kyeemeeṛwaa mirimiń yawo.

¹⁶ Mfo kuro na tilya tindeeṛwa maweń wwo valya vakee iita kirero. Lia eni vakakiwaria na ifura.

¹⁷ Kake vawore mirarii mirimiń yawo ndi, kake vakee ikiwaria kyeeri kyaangu da. Na numa kwakooya ishaa ngatara ana mavaviso ana yumbutwa kiimba kya kirero kyo, lia eni vakanunua.

¹⁸ Na tingi ntilya tindewa miingeń, vvandu valya vakee iita kirero da.

¹⁹ Na yatarika lya isanga li na ulembi lwa masaa na ilanga lya findo fiingi fikavashea fikafiṛa kirero kilya kitavike nunda.

²⁰ Na tilya tindeeṛwa uteriń unuru vvalya vakee yaranya kirero na ikiwaria. Na ivika nunda umwi kavika makumi araru na ungi makumi arindaru na kumande iyana.

²¹ Kavaia: A taa imakii inndwa irawa kwa si ya mengeto ana kwa si ya kiraa? Inndwaa se irawa andu ayo a kivanikoń?

²² Amu kiifo kindo kifise kitamanyikaa ndi. Ana nta kiifo kyama kiṛike kitaṛambukaa na baa ndi.

²³ Nndu awore marwi a yaranya aaranye!

²⁴ Lingi kavaia: Manyiń nnu ifo mukee ifiita! Kyelelyo kilya mwelelyaa nakyo vengi nkyo neeni mwelelyo̱o̱ na yengeṛyo̱ mwengeṛyo̱o̱.

²⁵ Amu ulya awore masaa aengeṛyo̱o̱. Na ulya atawore kindo, na akwaa nkilya awore asokwaa.

²⁶ Lingi karera kanumbua: Umangi lwa iṛuvewu luvakani kuri: Nsha nndu andeeṛa mbeu ifo nremiń.

²⁷ Nae kalala na ikwimboo kio na nsanyiń. Na mbeu ilya ikamia na iṅina, ito muni ateeshi.

²⁸ Na uteri lukamirisa lo weni. Lya mbele ikava unyuṛi na numa ikareeka na numa kikava kyaa kiishule mbeke.

²⁹ Ili muni nrema alolia sheeli kilimu kyammaa iviṛa, karuma vaṛundi vamwi na ngyusu vandeminya, fulya iilula lyamfika.

³⁰ Lingi kanumbua: A umangi lwa Iṛuva tiluvakanisaa na kiki? Ana toongoyaań na sumu ingai?

³¹ Luvakani na mbeu ya karadali. Neeli yeeṛwaa ifo si, nshinnya kita mbeu toose tikee yeeṛwa ifo si.

³² Kake ikammaa yeeṛwa ikaṅina ikakilia filimu foose. Ikannde maṛamba manini na kumande ndee ta kwa si ya iṛuvewu tikakaa kwa si ya kiṛishwe kyayo.

³³ Kavaongoya kirero kyamwi kwa sumu shiingi ta mikae ii, sheeli vandemakii yaranya.

³⁴ Nta kindo arera nawo kitaare nkwa sumu. Kake vanalosho vamwi veni kavarambuya foose vakee kyaanya kyawo.

³⁵ Na nkonu ulya muni ili kundeva ukwawuń, kavaia: Ndefoń tiṛuke kwa kulya.

³⁶ Vakalakana na syamu ilya. Vakankurika akee ngalaveń ilya sheni. Na ngalava tingi tiriani andu emwi nae.

³⁷ Lia eni ikakwimboo mburaato ya uvivita unini. Mavia akakaba ngalava kumande yaishua mura.

³⁸ Nae muni eekee ifo ngalaveń taari ya numa alele ruo aekeṛie nrwe ntoń. Vakamwanta vakamwia: Llosha, nta kikuṛiikisie se kwakooya tikee imamia?

³⁹ Nae kakwimboo kanaya mburaato kaia nruva: Sia do do! Mburaato ikasia do na kimamia kikafika kua.

⁴⁰ Kavaia: Nki ili mukee veeṛei kuri? Muwore ikusura se?

⁴¹ Vakaeṛea nnu vakauṛana: A nndu uu wwa mikae ki, ili mburaato imwirikie na nruva?