Mariko 3 - MMA SHIYYA

¹ Numa kaaka lingi ifo numba ya iterevia. Neefo eeifoo nndu wa uko lutoṛokombye.

² Nawo vakallaya si valle, akwaa ankiṛaa nkonu wa Sabato, amu vandiinge.

³ Kaia nndu ulya wa uko lutoṛokombye: Kwimboo kusalale io karikari! Kavauṛa: Nkisumani nkonu wa Sabato itana fisha ana ni itana fikasha? Ni ikiṛa muu wa nndu ana iuwaa? Nawo vakasia do.

⁵ Kavalla koroo taari toose aworwa ni ituṛuka kalolia unaari kiimba kya uumu lwa ngoo tawo. Kaia nndu ulya: Seṛeesa uko lwafo! Nae kaseṛeesa uko lwamwi lukava lingi usha.

⁶ Lia eni Vafarisayo valya vakasomuka vakaenda kyama andu emwi na vandu va Herode vakalliya kyama kya immamisa.

⁷ Yesu kalakana nawo ye na vanalosho vamwi vakaenda na taari ya nruveń. Vandu veengi vakansoṛa vauka Galilaya na Yudaya

⁸ na Yerusalemu na Idumaya na kwa kulya ya Yoridane na taari ta Tiro na Sidon, nsyamu nini. Nawo vandeita mboni ta mitanie yoose andetana vakanshea.

⁹ Kaia vanalosho vamwi, ngalava ilya shinnya ishe kufui nae, amu isyamu lia litashe imwidiṅa.

¹⁰ Amu ifi akiṛa veengi, na valya veeworee mavavio awo vakaraya mwaanya wa inserikia, amu vambaani.

¹¹ Neeli mimuyo ilya mikasha indellolia, ikawa si mbele yamwi iishiṛaa iinumbuaa: Iwe ni iwe kukee Mwana wa Iṛuva!

¹² Nae kavakandara nnu, amu vatanrambue.

¹³ Kyasia karwa uroń kavaanga valya avakundie ye muni. Nawo vakasha na io akai.

¹⁴ Karwaa vandu ikumi na vavili vave andu emwi nae, amu avarami indekwanisa mboni.

¹⁵ Lingi vave na finya ya yumbuta mimuyo mikasha.

¹⁶ Karwaa-fo valya ikumi na vavili. Kafukiya Simon irina lyamwi Petiro.

¹⁷ Na Yakobo mwana wa Sebedayo na Yohane mwanamae wa Yakobo, wo kavafukiya irina Boanerigesi, nkimwi na vana va kiṛuṛumo.

¹⁸ Na valya vengi ni Anderea na Filipo na Baritolomayo na Matayo na Toma na Yakobo wa Alufayo na Tadayo na Simon Nkananayo

¹⁹ na Yuda Isikariote yye ashendiinga.

²⁰ Numa kaenda kaaka numba. Vandu vakakusandia fingi mamwiingi. Nawo veni nta ilolia mwaanya wa ilya shoonga.

²¹ Ifi valya va kyeń kwamwi vandeita mboni tamwi, vakaenda indewwara. Amu vandenumbua: Ankilyo̱ ni uṛango.

²² Na vaaṛia va mitisiṛie vandesama vauka Yerusalemu wo vakanumbua: Aworwa mBelisebuli, na kwa finya ya nnini ulya wa mimuyo mikasha akee yumbuta mimuyo mikasha.

²³ Nae kavavaanga karera nawo eevakabiaa sumu kanumbua: A Satana naare amakii yumbuta Satana ungi?

²⁴ Na kwakooya umangi lwakuraua na ikabana lo weni na weni, umangi lo lusalalaa ndi.

²⁵ Na numba ikankuraua yo sheni na sheni, numba yo isalalaa ndi.

²⁶ Na kwakooya Satana akwaṛuka kakukaba ye muni, amakii ikaa ndi, aṛoṛokaa kulu.

²⁷ Nta eefo nndu amakii yaka numba ya nndu awore finya na iwara fiya famwi kitaare afinga mbele nndu ulya awore finya ndi. Kammaa llyo awaraań numba yamwi na finya.

²⁸ Nkue namuia: Mareko woose a vana va vandu alilyo̱o na nrumu tawo toose vakee irumaruma.

²⁹ Kake kwakooya nndu aruma Mumuyo Nsongori na imwila, ito akooyaa itio̱ lya mareko kutu ndi kumande miṛeṛe. Kake ireko lyo linkayaa miṛeṛe.

³⁰ Andevaia kuro kiimba kya lia vandenumbua: Aworwa mmumuyo nkasha.

³¹ Mae na vanavamae vakasha vakasalala wooṛo. Vakanrumia nndu awaange.

³² Na isyamu lia likee rembo lillengetye. Vandu vakamwia: Yeyo wafo na vana vamaa veefo wooṛo vakee ikuṛuya.

³³ Nae kavaaṛua kavaia: A yeyo wakwa na vanavama wa ki?

³⁴ Kalla valya vakee rembo vallengetye taari toose kanumbua: A va yeyo wakwa na vanavama.

³⁵ Amu nndu woose atanaa mifurie ya Iṛuva ito yye mwanama na mfwama na yeyo wakwa.