Mariko 13 - MMA SHIYYA

¹ Neeli asomuka numba ya Iṛuva, umwi wa vanalosho vamwi kamwia: Llosha, lla te mawe va na numba ti kasa tiṅini!

² Yesu kamwaṛua kamwia: Kulolie numba ti kasa tikee nini? Nta iwe lisaa kwa ule ya lingi kitaare liburulwa.

³ Neeli andekaa rembo kulya uroń lwa misenifu asumani na numba ya Iṛuva, Petiro na Yakobo na Yohane na Anderea vakamwuṛa kiṛisiń:

⁴ Tiie te ifi fivaa iri ki? Nayo mmyorusie ki ilolikaa, ili ifi fikaa fitanike?

⁵ Llyo Yesu abooka ivaia: Kusembekeń nndu atamulembe!

⁶ Amu veengi vashaa na irina lyakwa veenumbuaa: Nniń ye. Nawo valembaa vandu veengi.

⁷ Neeni ili mwitaa mboni ta fira na ntindi wa fira, manya mutakyangiswa! Kyawara ifi five, kake lyo ifurumia fiseere.

⁸ Amu uruka lukwimboo lukabe lungi na fingi umangi lukabane na lungi. Kundo kungi na kungi si ireremaa, ivaa-fo na soto. Nafo mfo fibookie fa mavaviswa.

⁹ Kake ini kwiiseń mu veni! Amu vamurwaa numbeń ta fikwena, na ifo numbeń tawo ta iterevia mukabyo̱o̱-fo. Neeni mukurikwaa mbele ya masiingo na kwa mamangi kiimba kyakwa, kive nkyo myorusie ifo kwawo.

¹⁰ Kake kyawara mbele nrumi shisha ya Iṛuva ikwaniswa vanduń va masanga woose.

¹¹ Neeli vamukurikaa ini na imuṛiinga, manya mutaṛiikiswa nkindo mureraa-fo. Kake kilya muniingwaa kyeeri kyo kirereń. Amu nta ni ini mureraa-fo, mMumuyo Nsongori.

¹² Na mwanamae wa nndu aṛiingaa mwanamae awalwa, na ndee aṛiingaa mwana, na vana vakwimboo vasue vasuṛi vawo na ivawaa.

¹³ Neeni musulwaa vvandu woose kiimba kya irina lyakwa. Kake ulya asisiriaa kumande ifurumia, yye akiaa.

¹⁴ Io llyo mufwalukwaa mirimiń yanu, ili muloliaa usutu lwa ireta luselele andu atasumani nalo — na ulya asomaa ia kyawara akumbue. — Llyo iwo vakee kunu Yudaya varishie ngyuroń.

¹⁵ Na nndu akee mmbeewu manya ataoloke-fo ana nta ataake numba yamwi aondue-fo kindo.

¹⁶ Na ito akooyaa akee nremiń atauye numa aimboo nseto wamwi.

¹⁷ Kake ushi iwo vakooyaa vakufingie na iwo vakee yosa vana mikonu yo.

¹⁸ Kake tereveń Iṛuva, amu ifo fitave kyeeri kya kisie.

¹⁹ Amu mikonu yo ivaa ya ukiva unini lutandelolyo̱ kuuka mabookioń a itana findo Iṛuva antana kumande alli ana lukilolyo̱o̱ lingi kutu ndi.

²⁰ Na kikooye Nndumi ataangusa mikonu yo, nta nndu umwi eekiaa. Kake kiimba kya vasaue iwo eewasauaa aangusaa mikonu yo.

²¹ Na kwakooya nndu amuiaa: Lleń te Kristo akee ia ana akee kulya, manya mutamwirikie.

²² Amu vakwimboo Makristo a wongo na vaauya fisuku va wongo, nawo vaorusaa myorusie minini na fa iṛiikisa itandelolyo̱ lingi, amu vakooye mwaanya wa ireta na valya vakee vasaue, kifo kiivaa.

²³ Neeni kulleń, fulya nambooka imuia foose.

²⁴ Kake ngyukiva ta mikonu ilya tikamaa iira llyo saa yaṛukaa ive llema na mwiri uretaa langa yayo.

²⁵ Na nyinyiri ta iṛuvewu tiwaa tuuka iṛuvewu, na finya ta iṛuvewu tiseniswaseniswaa.

²⁶ Io llyo valoliaa Mwana wa nndu eeshaa ariwa mmaṛumbe awore finya nini na tikisi.

²⁷ Io llyo ammaa vamalaika vasaṅiṛie vasaue andu emwi kuuka taari toose iinyi kuuka mbaai ya isanga na kumande mbaai ya iṛuvewu.

²⁸ Kulosheń na mikae ya nri wa nkuu! Maṛamba ayo akamfumbisa na yooṛa maru, mumanyaa sheeli iruuna lyamfika kufui.

²⁹ Neeni nkuro da: Ili muloliaa findo fi fiivaa, manyiń sheeli ansha kufui io mwaangoń.

³⁰ Nkue namuia: Kishuku ki kisiaa kutu ndi kumande ifi foose faawukiaa.

³¹ Iṛuvewu na isanga fisiaa, kake firero fakwa fo fisiaa kutu ndi.

³² Kake mboni ya nkonu to ana saa yayo ili ifikaa nta nndu eeshi, nta vamalaika vakee iṛuvewu ana nta Mwana kita Nde da.

³³ Kyasia kwiiseń, laleń rembo! Fulya muteeshi kyeeri nkonu to uvaa.

³⁴ Kivakani sheeli nndu aendaa kyaaṛo katia numba yamwi. Kavavasia masinga amwi nndu woose na ishoṛa lyamwi. Kavavasa nringi wa mwaango alale rembo.

³⁵ Kyasia neeni laleń rembo, fulya muteeshi kyeeri muni numba ashaa nakyo, akwaa ni ukwawuń ana akwaa nkio kari ana kyeeri nguku ya shawu yaikoro ana ngama kio.

³⁶ Amu atashe kibashuka akooye mulele.

³⁷ Na ikyo namuia ini, nakiia woose: Laleń rembo!