Luka 22 - MMA SHIYYA

¹ Kyasia ukaserikia nkonu nnini wa mikate itadookie ulya uvaangwaa wa Pasaka.

² Vakohani vanini na vaaria va mitisine vakaraya mwaanya kasa vawwaa. Amu veeṛee vandu.

³ Satana kaakia Yuda avaangwaa Isikariote, nae ni umwi wa valya ikumi na vavili.

⁴ Kakwimboo kaenda kandelya kyama na vakohani vaiya vanini na vashili kasa andenrambikiaa maakoń awo.

⁵ Nawo vakafura vakarekiana nae kya fesa vanniingaa.

⁶ Nae kairikia na bata. Kaenda kandeṛuya mwaanya wa inrambikia maakoń awo, amu vandu vatamanye.

⁷ Kyasia nkonu ulya wa mikate itadookie ukafika, nto usumani isikya ngarina ya Pasaka.

⁸ Karama Petiro na Yohane kavaia: Endeń mundetisongosia Pasaka tishelya.

⁹ Nawo vakamwia: Kufurie tindesongosia kwi, Nndumi?

¹⁰ Nae kavaia: Ili mwakaa muṛiń mukwaniaa na nndu arie nungu ya mura. Nsoṛeń kumande numba ilya andeakaa.

¹¹ Ień muni numba: Llosha akuuṛa: Nkwi kiṛi kya yeveṛa kikai, amu lliye-fo Pasaka andu emwi na vanalosho vakwa?

¹² Nae amworusaa kiṛi kinini kikee ringewu, nakyo kyalie miseto. Mfo kundo mutisongosiaa.

¹³ Nawo vakaenda vakalolia kuro da kasa andevaia vakasongosia-fo Pasaka.

¹⁴ Kyasia ili kyeeri kindemaa ifika, kashekaa rembo shoongeń na vaseṛo vamwi vakakaa andu emwi nae.

¹⁵ Kavaia: Niilangiee nnu deń ilya Pasaka ii andu emwi neeni kitaare nandeliswa ukiva.

¹⁶ Amu namuia: Nkiilyaa lingi kutu ndi kumande indeawutio̱o̱ ifo umangiń lwa Iṛuva.

¹⁷ Kaimboo umbata kaana Iṛuva kanumbua: Ngyeń kwavień ini mu veni!

¹⁸ Amu namuia: Kuuka nnu nkinwaa lingi minuye ii ya nsabibu ndi nkumande umangi lwa Iṛuva lwasha.

¹⁹ Kaimboo nkate kaana Iṛuva. Kaufukyafukya kavaniingia eevaiaa: Uu ni wili wakwa uniingio̱o̱ kiimba kyanu. Neeni taniń kuro amu mushikumbue niń.

²⁰ Na umbata lua lwiniwaa numa ya shoonga, katana kuro da eevaiaa: Umbata lu ni mma shiiya yaliwa na usao lwakwa, nalo lwiritwaa kiimba kyanu.

²¹ Kake manyiń: Uko lwa ito ashiṛiingaa lukee ia meseń andu emwi nań.

²² Mwana wa nndu ye aendaa shia yamwi da sheeli kideeṛie. Kake ushi nndu ulya andiingaa.

²³ Vakabooka yuṛana wo veni na veni: Ni i umwi kari keru amakii itana kuro?

²⁴ Likava ivingana kari kawo kya ulya alolio̱ akee nnini ifo kwawo.

²⁵ Nae kavaia: Mamangi a mikae ya vandu vavaitoṛio, na vafinya vakavaangwa mawoomi manini.

²⁶ Kake kwanu ini kitave kuro! Kake ulya akee nnini kwanu ave sha munnya. Na ulya akee iiria vengi mbele ave sha muṛundia vengi.

²⁷ Amu ulya akee nnini ni ungau? Ni ulya akee rembo shoongeń ana ni ito akee iṛundia? Ni ulya se akee rembo shoongeń? Kake niń kari kanu nkee sha ulya akee iṛundia vengi.

²⁸ Neeni ni ini munderiana andu emwi nań maelelioń akwa.

²⁹ Nań namurambikia diṅu ya umangi sheeli Vaava wakwa andeshirambikia niń.

³⁰ Neeni mulyaa na inwa meseń yakwa ifo umangiń lwakwa na ikaa rembo fifumbiń fa unini na iitoṛo ngyufari iti ikumi na ivili ta Isiraeli.

³¹ Yesu kanumbua: Iwe Simon, Simon lla te Satana amufurie ini, amwele sha umbi.

³² Kake niń nankuterevia kwa Iṛuva, amu ikusura lyafo litaangue. Nawe ili kwamiilashika numa, kaarisa na vanavamae vafo!

³³ Nae kamwia: Nndumi, nankaa andu emwi nawe nkudeeṛie yenda na akwaa nkifingioń na akwaa ni ufuń.

³⁴ Nae kanumbua: Petiro, nakuia: Nta nguku ya shawu iikoroo nnu kitaare kwashikana kararu kwinumbuaa: Mmwishi ndi.

³⁵ Kalunga ivaia: Lia nndemuruma mutarie mikusha ana fishawu ana faaru, kiifo kindo mundetuṛa? Vakanumbua: Nta kimwi tindetuṛa.

³⁶ Kavaia: Kake ulya arie nkusha alli akurike. Na ulya awore mboloko nkuro da. Na ulya atawore akumbe nseto wamwi wa yeeṛia akuuṛie shombo.

³⁷ Amu namuia: Kilya kindetisiṛwa kyakwa kyawara kyawutio̱ sheeli: Antaalio̱ andu emwi na varekwa. Fulya kilya kindefukywa kyakwa kikaa kyawukie.

³⁸ Nawo vakanumbua: Nndumi, lla ia tiiyo shombo ivili! Nae kavaia: Kyasia fifile.

³⁹ Kakwimboo kaenda kumande uroń lwa misenifu kasa aishivie. Na vanalosho vamwi vakallatia.

⁴⁰ Neeli andefika andu o kavaia: Tereveń Iṛuva amu mutawe nreyoń!

⁴¹ Kalakana nawo kafika kwaasha sha andu nndu eeṛaa iwe. Kafwiria nri katereva eenumbuaa:

⁴² Wui Vaava, kwakooya kivaa umbata lu lushuuke. Kake nsheeli niń mfurie ndi, nsheeli kufurie kitanike iwe.

⁴³ Malaika kanshea auka iṛuvewu kashenniinga finya.

⁴⁴ Nae sheeli eekee matuṛuloń kaengeṛia nnu itereva. Na nrike wamwi ukava sha maroń a usao akee ishololokia si.

⁴⁵ Neeli andeuka itereva, kashea vanalosho kavakooya vallala kiimba kya unaari luvawore.

⁴⁶ Kavaia: Naamu ki ili mulele? Kwimbooń mutereve Iṛuva, amu mutawe nreyoń!

⁴⁷ Kyasia ili eereraa kuro, lia eni mamwiingi wa vandu vakasha na-wo. Na umwi wa valya ikumi na vavili, irina lyamwi yYuda, eevairiee mbele. Kaserikia Yesu amu amwonge mimo.

⁴⁸ Yesu kamwia: Yuda, kwaṛiinga Mwana wa nndu kwimwongaa mimo?

⁴⁹ Na valya veekee kufui nae ili vandelolia kive kuro, vakanumbua: Nndumi, tikavakaba na shombo?

⁵⁰ Na umwi wawo kakaba iketi lya nkohani nnini kamminya kuri kwa uko usha.

⁵¹ Yesu kaaṛua kanumbua: Vatień vaawutie kyawo. Kambaana kuri kanshiisa.

⁵² Yesu kaia vakohani valya vanini na vanini va numba ya Iṛuva na masiingo vandellengetia: Mwansha murie shombo na ndata sha vandu vakee iwara kisoki.

⁵³ Na nkonu woose niikee andu emwi neeni numbeń ya Iṛuva nta ishisaaṛia maako. Kake iki nkyo kyeeri kyanu na ushili lwa llema.

⁵⁴ Vakawwara vakankurika vakanrwaa numba kwa nkohani nnini. Na Petiro kallatia numa eendeaa kwaasha.

⁵⁵ Vakaata muro io wooṛo vakakaa rembo veeoraa. Na Petiro kakaa rembo karikari kawo.

⁵⁶ Llyo iketi limwi lya kika likallolia akee rembo iṛaseń lya muro. Kamulla koroo kanumbua: Na uu eekee andu emwi nae.

⁵⁷ Nae kankana kanumbua: Woi, shimanya mmwishi ndi toto.

⁵⁸ Kwa numa kinnya nndu ungi kallolia kanumbua: Nawe kukee umwi kari ka iwo. Petiro kanumbua: Wode nndu, nniń ye ndi.

⁵⁹ Numa ikaira sha saa imwi, nndu ungi kakaarisa eenumbuaa: Nkya dede nndu uu eerianii nae, amu wwa Galilaya.

⁶⁰ Petiro kamwia: Iwe nndu, niishi iki kukee irera ndi. Na ilyo eni ili eereraa, nguku ya shawu ikaikoro.

⁶¹ Nndumi kaaṛuka kalla Petiro. Nae Petiro kakumbua kirero kilya kya Nndumi kasa eemwiaa: Nnu kitaare nguku ya shawu yamiikoro, kushikanaa kararu.

⁶² Kasomuka na wooṛo kaiya nnu kutu.

⁶³ Na vandu valya vandewara Yesu vakanteenda na inkaba.

⁶⁴ Vakantumuṛa miso vakamwuṛa veenumbuaa: Rambuań, nndu to akukaba ni iń?

⁶⁵ Vakarera na firero fingi fiingi fa inrumaruma.

⁶⁶ Kyasia ili kundekya, masiingo alya a vandu akakusandia na vakohani vanini na vaaria va mitisine. Vakanrwaa andu a kikwena kinini kyawo.

⁶⁷ Vakanumbua: Kwakooya iwe kukee Kristo tiie! Nae kavaia: Kwakooya namuia, nta mushiirikiaa ndi.

⁶⁸ Na lingi namuuṛa kindo, nta mushaaṛuaa ndi.

⁶⁹ Kake kuuka alli Mwana wa nndu avaa akaa rembo ukoń usha lwa Iṛuva muni finya.

⁷⁰ Kyasia woose vakanumbua: A iwe kukeeń Mwana wa Iṛuva? Kavaia: Ni ini mwanumbua nniń ye.

⁷¹ Nawo vakanumbua: Tikisokodiaań ki kingi? Amu ise ti veni tamiita sheeli arera na kana kamwi.