Luka 20 - MMA SHIYYA

¹ Ili eeloshaa vandu nkonu umwi ifo numba ya Iṛuva na ivaongoya nrumi shisha ya ikia, vakohani vanini vakanshea kwa tiń andu emwi na vaaria va mitisine na vasuṛi.

² Vakarera nae vakanumbua: Toongoye, kukee itana ifi kwa finya ingai? Lingi ni i akuniingie finya ii?

³ Kaaṛua kavaia: Nań mmuuṛaa ini kirero kimwi. Shiień:

⁴ Ubatiso lwa Yohane lwauka iṛuvewu ana nkwa vandu naań?

⁵ Vakakusaṛasaṛa wo veni na veni vakanumbua: Tikanumbua: Lwauka iṛuvewu, Uyo anumbuaa: Nki ili kitaare mwamwirikiaań?

⁶ Ana tikanumbua: Nkunu vanduń luukie, vandu woose vatikabaa na mawe. Fulya veeshi deń, sheeli Yohane mmwauya fisuku.

⁷ Vakaaṛua: Tiishi kundo luukie nafo ndi.

⁸ Na Yesu kavaia: Nań nta mmuiaa mfinya ki nkee itana nayo ifi ndi.

⁹ Kabooka iia vandu sumu ii: Nndu umwi aroonga nnda wa misabibu. Karwaa-fo varemi kaenda urukeń lungi kandekaa-fo kyeeri kyaasha.

¹⁰ Neeli kyeeri kya iilula kindefika, karuma iketi lyamwi kwa varemi valya, amu vanrikie wavi lwamwi lwa nunda ta misabibu. Varemi valya vakankaba vakawwiiṛa na maako a ruu.

¹¹ Kaengeṛia iruma iketi lingi. Na uu vakankaba da vakamwumbuta atarie kindo.

¹² Kaengeṛia karuma ungi wa kararu. Nae da vakankaba mavaṛa vakamburusa na wooṛo.

¹³ Muni nnda ulya wa misabibu kanumbua: Ntanaań are? Vvarumiaa mwana nkunde wakwa. Eeba ye vamwiriaa sonu.

¹⁴ Kake ili varemi valya vandellolia, vakakurera wo veni na veni veenumbuaa: Uu yye muyadiṅu! Sień tiwwaa, amu diṅu ive yeru ti veni!

¹⁵ Vakankumba wooṛo ya nnda ulya wa misabibu vakawwaa. A muni nnda ulya wa misabibu avataniaań ki?

¹⁶ Ashaa na ireta varemi valya na nnda ulya wa misabibu auniingiaa vengi. Ili vandeita ifi, vakanumbua: Tia, nta kitave kuro!

¹⁷ Kavalla koroo kanumbua: A misendie yayo nkiki kirero ki kyatisiṛwa: Iwe lyo lyalewa watana numba Uyo lyawa iwe inini lya wembe.

¹⁸ Nndu woose awoyaa iwe lyo afikafikaa. Na ito liwwoyaa limweesaa kutu.

¹⁹ Na vaaria va mitisiṛie na vakohani vanini vakaraya mwaanya wa iwwara kyeeri kyo kyeni. Vakaeṛea vandu, amu vamanya sheeli sumu yo wwo yavarera.

²⁰ Vakallaya si vakanrumia vandu va imwaala, nawo vakakwaṛua sha vandu vasumani, amu vawware na firero famwi, naamu varambikie maakoń a nshili nnini wa uruka.

²¹ Nawo vakamuuṛa veenumbuaa: Llosha, tiishi sheeli kureraa na ilosha filya fikee fa dede ana nta kutaalie unini lwa nndu ndi. Kake iwe kuloshaa shia ya Iṛuva na udede.

²² A kisumani tiniingie Kaisari kyaalo ana wode?

²³ Nae kamanya ntambwe wawo kavaia:

²⁴ Shooraseń shilingi te! A fwana yo iiyo yya i na mitisiṛie? Vakamwaṛua: Yya Kaisari.

²⁵ Kavaia: Kyasiań niingień Kaisari filya fikee fa Kaisari, na filya fikee fa Iṛuva niingień Iṛuva.

²⁶ Nawo nta vakimakii indiinga na firero famwi mbele ya vandu ndi. Vakaṛiikia myaṛue yamwi. Vakasia do do.

²⁷ Kyasia kiindi kya Vasadukayo vakanshea valya vanumbuaa sheeli liteefo iṛuka lya vafu. Vakamwuṛa

²⁸ vakanumbua: Llosha, Mose atisiṛa: Nndu kafiywa mmwanamae wamwi awore nka, kake atawore mwana, kyawara mwanamae arwaa nka to akooiye mwanamae mwana.

²⁹ Kyasia veeifoo vana va nka mfungare. Wa mbele kaora nka kafwa atawore mwana.

³⁰ Na wa kavili karwaa nka ulya kafwa atawore mwana.

³¹ Na ulya wa kararu kanrwaa. Na nkuro valya woose mfungare nta itia-wo vana vakafwa.

³² Na ifurumia nka ulya nae kafwa.

³³ Kyasia ifo iṛukioń lya vafu avaa nka wa ungauń! Amu woose mfungare veemwalikaa.

³⁴ Llyo Yesu avaia: Vana va isanga li vaalikaa na yalikwa.

³⁵ Kake valya vakee vataalie ikooya isanga lia lishaa na iṛukioń lya vafu, wo vaalikaa ana vaalikwaa ndi.

³⁶ Ana nta vakimakii ifwa lingi ndi. Amu wo vavakanaa sha vamalaika, nawo wana va Iṛuva, fulya vakee vana va iṛutwa.

³⁷ Kake kya kiimba kya vafu sheeli vaṛutwaa, na akwaa mMose arambua alya akee atisiṛie mboni ta ngumiń ilya, alya asendia Nndumi ni Iṛuva wa Abraamu na Iṛuva wa Isaki na Iṛuva wa Yakobo.

³⁸ Kyasia ye ni Iṛuva wa vandu vafu ndi, kake wwa veefo na muu. Amu iwo woose vakee vamwi vava vandu vakee na muu.

³⁹ Na kiindi kya vaaria va mitisine vakaaṛua vakamwia: Llosha kwanrera kisumani.

⁴⁰ Nawo nta vakikaṛia imwuṛa kindo ndi.

⁴¹ Kavaia: A naare vandu vareraań sheeli Kristo mmwana wa Davidi?

⁴² Na Davidi arerie muni ifo kitabuń kya fiimbo: Nndumi aia Nndumi wakwa: Kaa rembo ukoń usha lwakwa,

⁴³ kumande nrwaa fituva fafo kwa si ya marende afo.

⁴⁴ Kyasia kwakooya Davidi awaangie Nndumi, naare avaań mwanamwi?

⁴⁵ Neeli vandu valya woose vaiyo veearanyaa, kaia vanalosho vamwi:

⁴⁶ Kwiiseń na vaaria va mitisine, vakundaa iṛuaṛua vaṛee miseto myaasha na ikunda iisanio̱ ifo singiṛeń na ikaa mbele ifo numbeń ta iterevia na ikaa fifumbiń fa mbele imutuń.

⁴⁷ Nawo vamiṛaa numba ta misikeeti, na kwa ukavili vaterevaa fiterewo faasha. Iwo vawariaa uumisio lukilie.