Luka 2 - MMA SHIYYA

¹ Kyeeri kilya Uyo ivavaso lyuka kwa Kaisari Augusito, vandu va ngyuruka toose vatisiṛwa marina awo kiimba kya kyaalo.

² Na itisiṛwa lia fikee lya mbele fikava lia Kirinio andeshilia kulya Siria.

³ Na woose vakaenda itisiṛwa nndu woose na ufari lwamwi.

⁴ Na akwaa ni Yosefu kakwimboo kulya Galilaya muṛiń ulya wa Nasareti karwa na kulya Yudaya muṛiń wa Davidi wivaangwaa Betileemu, fulya eekee wa ufari lwa kwa Davidi.

⁵ Amu atisiṛio̱-fo andu emwi na Maria eemworisio̱o̱, nae eekufingiee.

⁶ Nawo ifi veekee kulya, kyeeri kyamwi kikafika kya iira mwana.

⁷ Kaira mwana wamwi vvele kamwiṛina na firami kamwaṛa mundiń wa numbe, fulya vandetuṛa andu a ilala ifo numba ya veeni.

⁸ Na kulya urukefi lua veefo veesi veekaa bateń veeringaa shoo tawo kio.

⁹ Kwibari malaika wa Nndumi kavashea na langa ya Nndumi ikavamulikia. Nawo vakaeṛea nnu.

¹⁰ Malaika ulya kavaia: Muteeṛee! Fulya nkee imuia mboni ya ukyesi unini luviaa vandu woose.

¹¹ Fulya nkonu wa nnu mwamiirio̱ Nkiṛa kulya muṛiń wa Davidi, uu akee Kristo Nndumi.

¹² Na kiringisio mundeloliaa: Mukooyaa mwana mwiṛine na firami mwaṛe mundiń.

¹³ Lia eni syamu ya ngyama ya iṛuvewu ikasha vakasangia na malaika ulya vaka-ṅinisa Iṛuva veemwimbiaa:

¹⁴ Iṛuva aṅiniswa akee iṛuvewu na isangeń luve unambwe kwa vandu valya vankundaa.

¹⁵ Ili vamalaika valya vandeuya iṛuvewu, veesi valya vakakurera: Ndefoń teende Betileemu, tindella kilya kyantanika-fo, kilya Nndumi antimanyisa.

¹⁶ Vakaenda veerishaa vakakooya-fo Yosefu na Maria na mwana ulya eeaṛiee mundiń.

¹⁷ Ili vandemaa illolia, vakakwanisa mboni ta firero filya vandeio̱ fa mwana ulya.

¹⁸ Na woose vandeita vakariika kya filya vandeio̱ vveesi.

¹⁹ Na Maria kawara firero filya foose kafikusaṛa ngooń yamwi.

²⁰ Na veesi valya vakauya wisiń lwawo veeṅinisaa Iṛuva na imwitikisa kiimba kya mboni tilya toose vandeita na ilolia.

²¹ Ili mikonu nyaanyi indesia, Uyo mwana arinwa kafukiyo̱ irina lyamwi Yesu lia andefukiyo̱ mmalaika ulya, ilyo kitaare mae ankufinga nae.

²² Neeli mikonu yawo ya ikusangya indesia kisumani na uvavaso lwa Mose, vakanrosa Yerusalemu vanrambikie Nndumi.

²³ Sheeli kikee kitisiṛe ifo mavavasoń a Nndumi: Mwana woose wa womi vvele airiwa kyawara avaangwa nsongori wa kwa Nndumi.

²⁴ Na lingi vakakunda iniingia na nsimbika, sheeli kikee kirere ifo mavavasoń a Nndumi, nato mmbuku ivili ana mawore avili a mbuku ta numba.

²⁵ Na kulya Yerusalemu eeifoo nndu irina lyamwi eevaangwaa Simeon. Nndu ulya eekee nsumani kakusurana na Iṛuva kaverea ulya awiiṛiaa va Isiraeli muu, na Mumuyo Nsongori akee kari kamwi.

²⁶ Nae eenringisio̱o̱ mMumuyo Nsongori, afwaa kitaare allolia mbele Kristo wa Nndumi ndi.

²⁷ Kasha numba ya Iṛuva eeitikwaa mMumuyo Nsongori. Neeli Yosefu na Maria vandennde Mwana Yesu numbeń ya Iṛuva, amu vamwutie nsimbika sheeli kikee kivavase,

²⁸ nsuṛi ulya kawara mwana ṅundeń kaṅinisa Iṛuva eenumbuaa:

²⁹ Alli kwotoṛień iketi lyafo likwendie na unambwe, Nndumi, sheeli kwallirekia,

³⁰ fulya miso akwa allolia Nkiṛa wafo

³¹ kweemmudeṛiaa mbele ya vandu woose va masangeń,

³² ave langa ya iṛangusa vandu valya vateeshi Iṛuva, amu vammanye. Na vandu vafo va Isiraeli vakooye tikisi.

³³ Na ndee na mae vakaṛiikiswa mfilya findererwa fa mwana ulya.

³⁴ Na Simeon kavaniinga mboṛa kaia mae wa mwana: Mwana uu yye aseṛeeswaa amu amanyise makusaṛo a vandu a ngooń na baa. Na kinga kya va Isiraeli valya vatankusuraa vakooye ureti, na kinga kya valya vankusuraa vakooye iimbolo na ikiṛwa yye. Nae avaa mwilwa vvandu.

³⁵ Na ukiva lwa mwana uu lukuvavisaa nrimiń sha nndu akee iilikwa nshombo.

³⁶ Eeifoo na nka mwauya fisuku eevaangwaa Ana, eekee llifu wa Fanueli wa ufwari lwa kwa Aseri. Nae eekee nkyeku nkuu, eenkaa na mmi myaka mfungare kuuka amaalikwa kafiyo̱ ni mmi.

³⁷ Nae eemfitaa myaka makumi nyaanyi na iini. Nae eelakanaa ifo numba ya Iṛuva ndi eeṛundiaa Iṛuva eekwimaa shoonga na intereva kio na nsanyiń.

³⁸ Kasha na alya vakai kyeeri kilya kyeni kaitikisa Iṛuva kaongoya vandu mboni ta mwana ulya valya veekee iverea ikiṛwa kulya Yerusalemu.

³⁹ Neeli vandemaa imarisia filya foose fivavase ni Nndumi, vakauya kyeń kwawo kulya Galilaya muṛiń wa Nasareti.

⁴⁰ Na mwana ulya kaṅina kaniingwa na finya ya nrima na uṛango na ikundwa ni Iṛuva.

⁴¹ Nde na mae wa Yesu veendaa Yerusalemu myaka yoose kisukuń kya Pasaka.

⁴² Ili Yesu andemaa myaka ikumi na ivili, vakarwa lingi na ule Yerusalemu kisukuń, sheeli veeishiviee.

⁴³ Ili mikonu yo yeemmaa yumbuka, vakauya na kyeń na mwana Yesu kasaa numa kulya Yerusalemu kitaare nde na mae veeshi.

⁴⁴ Vakakusaṛa akee na vaaroe vamwi vakaenda weendo lwa nkonu umwi vakanduya kwa vandu va ufwari na kwa ndoo tawo.

⁴⁵ Ili vandentuṛa-fo vakainduka Yerusalemu indenduya-fo.

⁴⁶ Ili mikonu iraru indesia, vakankooya kulya numba ya Iṛuva akee rembo kari ka valosha eevaaranyaa sewu tawo na ivauṛa.

⁴⁷ Na woose vandemwita eereraa vakariika kiimba kya uṛango lwamwi na myaṛuye yamwi.

⁴⁸ Ili ndee na mae vandellolia, vakariika. Na mae wamwi kamwia: Nki ili kwantitania kuri, mwanakwa? Tankuṛuya na ndeo na ngatara.

⁴⁹ Kavaia: Nkiki mwikee ishiṛuya? Mwishi se sheeli kyashiwara nsinde kunu kuwore findo fa Nde yakwa?

⁵⁰ Nawo nta yaṛukio̱ mfirero fo famwi.

⁵¹ Nae kalungana na nde na mae vakauya Nasareti. Kavairikia findoń foose. Na mae kawara firero fi foose ngooń yamwi.

⁵² Na Yesu kaengeṛia iṅina na uṛango na iyaa kakundwa ni Iṛuva na vandu.