Luka 19 - MMA SHIYYA

¹ Yesu andefika Yeriko, kaira muṛiń ito.

² Neefo eeifoo nndu irina lyamwi nSakayo. Na nndu to eekee nnini wa vasaṅiṛia kyaalo, eekee na isimba.

³ Kalanga nnu ilolia Yesu, amu amanye mikae yamwi. Nta imakii illolia kiimba kya wiingi lwa vandu, fulya ekee wa yumba ifui.

⁴ Karisha na mbele kasaama nriń wa nkuu, amu allolie. Fulya shia ilya (Yesu eekee iira) wwo iiriee.

⁵ Neeli Yesu andefika alya, kalla na ule nriń. Kamwia: Sakayo oloka-fo ree, fulya kyashiwara niń mfike kwafo nnu.

⁶ Nae kaoloka ree kanrwaa kyeń kwamwi kawwaria-fo na ifura.

⁷ Ili vandu vandelolia kuro, vakaṅṅuṅuria woose vakanumbua: Ameenda numba kwa nndu nrekwa na indeimuya-fo.

⁸ Nae Sakayo kasalala kisanguń kya Nndumi kamwia: Lla te Mbee, masaa akwa noore naavanisaa feenga fivili nniinge vakiva kimwi. Na kwakooya nanraya ki do kya nndu niwwiiṛiaa na fiini.

⁹ Na Yesu kamwia: Numba ii yallolia ikiṛwa nnu, amu nae mmwana wa Aburaamu da.

¹⁰ Fulya Mwana wa nndu ansha iṛuva kilya kikee kireti na ikikiṛa.

¹¹ Ili vandeita mboni ito, nae kaengeṛia irera na sumu, amu ye eekee kufui na Yerusalemu. Nawo vakakusaṛa sheeli umangi lwa Iṛuva lulolikaa kwa limwi.

¹² Kyasia kanumbua: Eeifoo nndu wa numba ya mangi andeimboo kyaaṛo kya uruka lwa kwaasha, andewara-fo umangi, numa auye.

¹³ Kavaanga vandu ikumi kari ka maketi amwi kavaniingia mayana ikumi a fesa. Kavaia: Kabeń nato mbusha kumande nuuyaa.

¹⁴ Kake vandu va uruka lwamwi vansua. Vakaruma varumi numa yamwi vandenumbua: Tikundie nndu to atishilie ndi.

¹⁵ Neeli andemaa iwara umangi lua, kauya na kyeń kavavasa, maketi alya avaniingia fesa tilya avaangwa, naamu amanyi kasa nndu woose andekooya mbusha yamwi.

¹⁶ Kasha ulya wa mbele kanumbua: Nndumi, fesa tilya tafo iyana tindefyaa tingi mayana ikumi.

¹⁷ Nae kamwia: Nkisha iketi isha, fulya kundeva nsongovisi wa filya fikee fyaangu. Vaań na miitoṛio ya iitoṛo miṛi ikumi.

¹⁸ Kasha wa kavili kanumbua: Nndumi, fesa tafo iyana tamfyaa tingi mayana araanu.

¹⁹ Kaia na uu nae: Nawe vaań na miitoṛio ya iitoṛo miṛi iraanu.

²⁰ Kasha ulya ungi wawo kanumbua: Nndumi, a ti fesa tilya tafo iyana nndetifingia kiramiń natifisa.

²¹ Amu nndekweṛea, fulya iwe kukee nndu wa kiṅushu. Kwonduaa kindo andu kutakifisie. Kwilulaa kitaare kwaweekia.

²² Nae kamwia: Iwe iketi ikasha, kwa firero fafo mfo nkuumisiaa nafo. Ili kwiishii sheeli nkee nndu wa kiṅushu, noondua kindo andu ntakifisie na iilula ntandeveekia,

²³ kyasia nki ili kutanderwaa fesa takwa kwa vakaba mbusha na fesa ta vandu? Nań ili nuuyaa nshetiwaria andu emwi na mbusha yayo.

²⁴ Kaia valya veeyoo: Nsokeń fesa to iyana muniingie ito awore mayana ikumi.

²⁵ Vakamwia: Nndumi, awore mayana ikumi tee!

²⁶ Nań namuia: Ulya woose awore kindo ee-ngerṛiaa iniingwa. Na ulya atawore kindo na akwaa nkilya awore asokwaa.

²⁷ Kake fituva filya fakwa vatakundie washilie vanndeń ia muvawaye mbele yakwa.

²⁸ Ili andemaa irera kuro, kaengeṛia iwara shia ya irwa na Yerusalemu.

²⁹ Ili andeserikia kufui na Betifage na Betania kulya uroń lwa misenifu, karuma vanalosho vamwi vavili.

³⁰ Kavaia: Endeń kimuṛiń kikee kufui neeni. Mukamiira nafo muloliaa-fo kyaashe kya nshungu kyavikie kitandeaṛukio̱ ni nndu. Kiboṛomueń musheendie.

³¹ Na kwakooya nndu amuuṛaa: Nki ili mukee ikyawua? mwień: Ni Nndumi awore nakyo kima.

³² Na valya vanderumwa vakaenda vakakooya sheeli eewaiaa.

³³ Neeli veeboṛomuaa kyaashe kilya kya nshungu, veni vayo vakavaia: Nki ili mukee iboṛomua kyaashe kyo kya nshungu?

³⁴ Nawo vakavaia: Ni Nndumi awore kima nakyo.

³⁵ Vakakirwaya Yesu vakaala miseto mungo wa kyaashe kya nshungu va-kasaamisa-fo Yesu.

³⁶ Neeli aendaa vakaala miseto yawo ifo shień.

³⁷ Neeli andefika yolokioń lya uro lua lwa misenifu, vanalosho vamwi veefo kwa wiingi vakabooka iitikisa Iṛuva na ununga unini kiimba kya mitanie yoose ya finya vandelolia.

³⁸ Vakanumbua: Eetikiswa ulya asha akee mangi arumwa ni Nndumi! Ifo iṛuvewu luvaa unambwe na nduma uvaa ifo ule!

³⁹ Kiindi kya Vafarisayo valya veekee kari ka mamwiingi wa vandu vakamwia: Llosha, naiya vanalosho vafo te!

⁴⁰ Nae kaaṛua kavaia: Namuia: Kwakooya iva vasia do, mmawe aṛoṛongyaa.

⁴¹ Ili Yesu andefika kufui na Yerusalemu, kalla muṛi ulya kaulilia.

⁴² Kanumbua: Kikooye nawe kwammanya kyeeri ki kya alli kilya kikwendie unambwe! Kake alli nkifise kutakikiloliaa lingi.

⁴³ Amu kikaa kishe kyeeri na misa afo akulengetiaa ṛiti na ikuraya deń na ikutuṛua akutuṛuaa taari toose.

⁴⁴ Nawo akukunduyaa ifo si na vana vafo vakee kari kafo na ikufukya kutu, nta iwe limwi areaa likee na lingi, mfulya kitaare kwamanya kyeeri kilya kwansengerwa nakyo ni Iṛuva.

⁴⁵ Yesu kaaka na ifo numba ya Iṛuva kabooka yumbuta-fo valya veekee ikumbia-fo findo eevaiaa:

⁴⁶ Nkitisiṛe: Numba yakwa kyawara ive numba ya iterevia. Neeni mwaiaṛua mbanga ya fisoki.

⁴⁷ Nae kalosha vandu mikonu yoose ifo numba ya Iṛuva. Kake vakohani vanini na vaaria va mitisine na vanini va vandu vakaṛuya mwaanya wa iwwaa.

⁴⁸ Nawo nta ikooya kilya vantaniaa. Fulya vandu woose veekusuranii nae na imwaranya veekee imwaranya.