Luka 17 - MMA SHIYYA

¹ Kaia vanolosho vamwi: Kiifo kindo kiimaa misindaṛa iishaa ndi. Kake ushi ulya ainnde.

² Kivaa ṅwana nndu to afingio̱ isewe sungoń yamwi na indeeṛwa ifo nraveń, kita akasheesa umwi wa iva vannya.

³ Kwiiseń mu veni! Kwakooya mwanamaa akurekio̱ mwikimbe, na kwakooya akurra nrie!

⁴ Na kwakooya akurekio̱ kamfungare nkonu umwi na ikushea kamfungare kanumbua: Nankurekio̱, nawe llilie!

⁵ Vanalosho vakaia Nndumi, Teengeṛie finya ya ikusura Iṛuva!

⁶ Nndumi kanumbua: Mukavva na ikusura liiṅańani na mbeke ya karadali, mwiiaa nri uu wa nkuu: Iṛuka kundekuveekia kulya nraveń, nato wimwirikiaa.

⁷ A kunu kwanu eefo nndu awore ndundi wamwi wa irema na ikumbi lya numbe ana wa iisa findo, kwakooya asha na kyeń auka nremiń, nae amwie: Sie ree kaa rembo kulye shoonga?

⁸ Wode, nkuro ndi! Amwiaa: Songosia shoonga nshe ilya. Kukufinge kushiṛundie, kumande nalya na inwa. Nammaa Uyo nawe kulyaa na inwa.

⁹ A naań aiaa iketi lia eka, fulya lyantana sheeli lyavavaswa?

¹⁰ Mfo kuro neeni: Mukammaa itana foose mwawavaswa, numbueń: Ise tikee maketi mannya. Tantana kilya kyawara titane da.

¹¹ Yesu eekee kyaaṛoń eendaa Yerusalemu karambua kari ka Samaria na Galilaya.

¹² Ili andeaka muṛiń wa vandu kakwania-fo na woomi ikumi valole saka ya ivave, nawo veeselelee kwaasha.

¹³ Vakawaanga veenumbuaa: Wui Yesu, wui llosha, tililie!

¹⁴ Nae kavalla kavaia: Endeń mundekoorasa vakohani! Ili vakirekie shień veendaa vakava vesha.

¹⁵ Na umwi wawo kakulolia sheeli avva nsha, kauya kaṅinisa Iṛuva na ununga unini.

¹⁶ Kawa na si marendeń a Yesu kamwaana. Nae ni nndu Nsamaria.

¹⁷ Yesu kaaṛua kanumbua: Vvandu ikumi vava vesha se? A valya kyenda valla kwi?

¹⁸ Wo nta ilolio̱ vauya vasheṅinisa Iṛuva kita mwini uu da?

¹⁹ Kamwia: Kwiimboo kukwendie! Kwanshikusura, nkyo kyankukiṛa.

²⁰ Vafarisayo vakauṛa Yesu: Ni iri ki umangi lwa Iṛuva lukaa lushe? Nae kavaaṛua kavaia: Umangi lwa Iṛuva lushaa lulolio̱ na miso ndi.

²¹ Ana nta nndu amakii inumbua: A lu kunu! Ana: A lua kulya! Fulya manyiń, umangi lwa Iṛuva lukee kari kanu.

²² Numa Yesu kaia vaseṛo vamwi: Kikaa kishe kyeeri mulange ilolia nkonu umwi wa mikonu ya Mwana wa nndu, mutuṛe.

²³ Na vandu vamuiaa: A ulya kulya! Ana: A uu kunu! Manya mutakwimboo alya mukai ana nta mutavasoṛe ndi.

²⁴ Amu sheeli kimuli kiveṛukaa veṛu kyuka marayoń a iṛuvewu taari ii kikafika marayoń a iṛuvewu taari ii ingi kikamulika foose, mfo kuro Mwana wa nndu avaa nkonu ulya ashaa nato.

²⁵ Kake kitaare ifi favva, kyawara atu-ṛulwa mbele na ilewa vvandu va kyeeri kyo.

²⁶ Na sha lia kyave kyeeri kilya kya Noe, mfo kuro kivaa na kyeeri kyo Mwana wa nndu ashaa nakyo.

²⁷ Kyeeri kyo kya Noe vandu veekee ikuliya na ikuniya wari na ikwalikia kumande nkonu ulya Noe aaka nato isandukuń lia inini. Llyo iwala lishe likavareta woose.

²⁸ Na kyeeri kya Loti nkuro da kyave: vandu veekee ikuliya na ikuniya wari na ikuuṛia findo na ikuremia nrema na ikutania numba.

²⁹ Kake nkonu ulya Loti asama nato Sodomo muro ukaoloka uuka iṛuvewu ukavareta woose.

³⁰ Na nkonu ulya Mwana wa nndu alolikaa nato, mfo kivaa kuro da.

³¹ Na nkonu ulya nndu akooyaa akee mmbeewu na fiya famwi fikee ifo numba, manya ataoloke andefiimboo. Mfo kuro na akwaa ni ulya akee nremiń, manya atauye na numa.

³² Kumbueń nka ulya wa Loti!

³³ Nndu afurie ikiṛa muu wamwi auretaa. Na ulya woose auretaa aukiṛaa.

³⁴ Namuia: Kio kyo vaseṛo vavili vakooyaa valele kiraań kimwi. Ulya umwi autwaa-wo na ulya ungi arewaa-wo.

³⁵ Na vaka vavili vakooywaa veesaa umbi andu emwi. Ulya umwi autwaa-wo na ulya ungi arewaa-wo.

³⁶ Vandu vavili vakooywaa vakee nremiń. Ulya umwi akurikwaa na ulya ungi atio̱o̱-wo.

³⁷ Vanalosho vakamwaṛua vakanumbua: A nkwi, Nndumi? Nae kavaia: Alya nnyiṅa ukai, wwo na mamutoń akwitiṛimuu.