Luka 13 - MMA SHIYYA

¹ Kyeeri kyo kyeni veeifoo vandu vandemwongoya mboni ta Vagalilaya valya, Pilato andeirita ngyusao tawo katisanda na ngyusao ta numbe tawo ta irasia.

² Nae kaaṛua kavaia: Mukusaṛie Vagalilaya wo veekee varekwa kita Vagalilaya vengi woose, fulya vandeliswa ukiva kuro?

³ Namuia: Nkuro ndi, kake kwakooya mutailashikaa mirimiń, nkuro da mundemamiaa mu woose.

⁴ Ana valya ikumi na nyaanyi vandewoywa ni nnara kulya Siloa ukavawaa, naare mukusaṛie wo veekee varekwa kita vandu woose kunu Yerusalemu?

⁵ Namuia: Nkuro ndi! Kwakooya mutailashikaa nrimiń, nkuro da mundemamiaa mu woose.

⁶ Karera sumu ii kanumbua: Nndu eeworee nri wa nkuu uveekie nndeń wamwi. Kasha iṛuya nunda nta ikooya.

⁷ Kaia nremia nnda: Lla te mwaka uu wwa kararu niishaa niiṛuyaa nunda nriń uu nta ilolia.

⁸ Kyasia uminye! Nkiki ukiveesiaań si?

⁹ Nae kamwaṛua kamwia: Nndumi, utie mwaka uu da mbee, nuuremie na irwaa-fo kiroro! Eeba uvikaa nunda. Kwakooya utavikaa kusheń yuminya.

¹⁰ Kyasia Yesu eekee ilosha vandu numba ya iterevia nkonu wa Sabato.

¹¹ Na ifo eeifoo nka eewwarwaa nsaka kyeeri kya myaka ikumi na nyaanyi. Nae eetoṛokombiee, nta eemakii ikuseṛeesa kutu ndi.

¹² Ili Yesu andellolia, kawaanga kwamwi kamwia: Boṛomuka saka yafo, yeyo!

¹³ Kamwekeṛia maako na lia eni nka ulya kaseṛeeka kaṅinisa Iṛuva.

¹⁴ Na nsuṛi wa numba ilya ya iterevia katuṛuka, ili Yesu akiṛa nndu nkonu wa Sabato. Kaia vandu valya veeyoo: Iifo mikonu irindaru nndu atanaa mashoṛa nayo ndi? Kyasia mikonu ilya mushe mukiṛwa, manya mutakishe nkonu wa Sabato ndi!

¹⁵ Nndumi kamwaṛua kamwia: Ini vamakavili, kunu kwanu nndu woose aawuaa numbe yamwi ana nshungu wamwi numba na akwaa ni nkonu wa Sabato na inisia mureń ndi?

¹⁶ Na nka ito, akee mfu wa Abraamu na Satana kamfinga myaka ikumi na nyaanyi, kyawwara se aboṛomulwa kifingioń kyamwi na akwaa ni nkonu wa Sabato?

¹⁷ Ili anderera kuro, fituva famwi foose fikasuka. Na vandu woose vakafura kiimba kya mitanie yamwi yoose andetana minuru.

¹⁸ Numa nae kanumbua: Umangi lwa Iṛuva luvakani na kiki? Nalo lluvakanisaa na kiki?

¹⁹ Luvakani na mbeu ya karadali indekurikwa ni nndu kayeeṛa nremiń yamwi. Nayo ikamia ikava nri. Na ndee ta ringewu tikakaa maṛambeń ayo. —

²⁰ Kanumbua lingi: Nkiki vvakanisaa nakyo umangi lwa Iṛuva?

²¹ Luvakani na kidooka nka andeimboo kakisanda na uru faasho firaru kikadookisa foose.

²² Yesu kaira miingoń na miṛiń ya vandu eeloshaa-fo. Kawara shia afike Yerusalemu.

²³ Na nndu kakwania nae kamwuṛa: A le Nndumi, valya vakaa vakiṛwa vafike kwa Iṛuva vvaangu da naań? Nae kamwia:

²⁴ Kabanień mwaango ulya nsuse na utomari mwake! Fulya namuia: Vveengi valangaa yaka nafo vatamakii.

²⁵ Mukantevesa muni numba kankwimboo kammaa iraya numba, Uyo mubookaa isalala wooṛo na ikabakaba yoondi na inumbua: Wui Mbee, tirue numba! Nae amuaṛuaa: Mmwishi ini kundo muukie nafo ndi.

²⁶ Llyo mubookaa imwia: Ako, tale shoonga se na inwa andu emwi nawe? A miṛitiń yeru mfo kwitiloshiaa se?

²⁷ Llyo anumbuaa: Namuia: Mmwishi ini kundo muukie nafo ndi. Shuukeń ini mwoose, amu mukee varavi!

²⁸ Na ifo kivaa kiiyo na ifina kitaku, ili muloliaa Abraamu na Isaki na Yakobo na vaauya fisuku woose vakee ifo umangiń lwa Iṛuva, neeni mu veni mukuloliaa sheeli mukee vaumbutie wooṛo.

²⁹ Na vandu vengi vashaa vauka na taari ya kise-ngeṛo na ya mbeleń na ya nturu na ya ṅṅalo na ilya shoonga ifo umangiń lwa Iṛuva.

³⁰ Neeni manyiń sheeli veefo vandu va numa vakaa vandeva va mbele. Na lingi veefo va mbele vakaa vandeva va numa.

³¹ Kyeeri kilya kyeni kashewa vVafarisayo kiindi. Vakamwia: Kwimboo kwauka ia kwende kundo kungi, amu Herode arie ikuwaa.

³² Nae kavaia: Endeń mukandeia ibaaṛwe lyo: Nnu na ndesi nkee yumbuta mimuyo mikasha na ikiṛa valole, na nkonu wa kararu mmarisie.

³³ Kake kyashiwara llunge kyaaṛo kyakwa nnu na ndesi na nrondo, amu kivaa mwauya fisuku awaywaa andu engi kitaare nkulya Yerusalemu ndi.

³⁴ Iwe Yerusalemu, iwe Yerusalemu, kuwaa vaauya fisuku na valya varumwa kwafo kwavaeeṛa mawe. Nkeenga namfura isaṅiṛia vana vafo kasa nguku isaṅiṛiaa mawore ikaasikia na maaro ayo! Neeni nta ikunda.

³⁵ Lleń te, numba yanu irewaa ikee irama! Nań namuia: Mukishiloliaa kutu ndi, kumande kifikaa kyeeri munumbuaa: Eetikiswa ulya asha na irina lya Nndumi!