Luka 12 - MMA SHIYYA

¹ Kyeeri kilya vakakusandia-wo syamu fiku na fiku kumande vakuvariavaria. Kabooka iia vanalosho vamwi lya mbele: Kwiiseń na kindooka kya Vafarisayo, nkyo mmikae yawo ya ukavili.

² Amu kiifo kindo kifisie kitalolikaa ndi, ana kindo kiṛike kitata-ṛambukaa numa ndi.

³ Kyasia kindo kyoose mukireriaa llemiń kikaa kiitiwa langeń. Na kindo kyoose mureraa kiviṛiviṛi ifo fiṛiń fa numba kikwanisio̱o̱ na baa mmbeewu wa numba.

⁴ Nań namuia ini mukee ndoo takwa: Manya mutaeṛee iwo vawore finya ya iwaa wili, vakammaa vatakimakii itana kya mmwasi.

⁵ Kake mmworusaa ulya mumweṛeaa. Eṛeeń ulya amakii iwaa, numa awore na finya ya yeeṛa nndu muroń. Ee namuia: Eṛeeń ito!

⁶ A ngyuṛuu isaanu tikumbwaa na senti ivili se? Nato nta lumwi lurekekie mbele ya kisangu kya Iṛuva ndi.

⁷ Kake ini na akwaa mmafuli anu a nrwe mmatale woose. Kyasia manya mutaeṛee, ini mukilie ngyuṛuu shiingi.

⁸ Nań namuia: Ulya woose ashirambuaa mbele ya vandu, na Mwana wa nndu nae anrambuaa mbele ya vamalaika va Iṛuva.

⁹ Kake ulya ashikanaa mbele ya vandu, ito akanwaa mbele ya vamalaika va Iṛuva.

¹⁰ Na nndu woose areraa kirero kya iila Mwana wa nndu, alilio̱o̱. Kake ulya arumaa Mumuyo Nsongori, alilio̱o̱ kutu ndi.

¹¹ Neeli vamurwaa ifo numba tawo ta iterevia na kwa vashili vaitoṛo, manya mutakwareese mwikusaṛaa kasa muvaaṛuaa kirero ana ivaia.

¹² Amu Mumuyo Nsongori amuloshaa kyeeri kilya kyeni kilya kyawara murere.

¹³ Na nndu umwi eekee ifo syamuń ya vandu kamwia: Llosha, kwie mwanamae wakwa ashaavie nań diṅu ya masaa a nde yeru.

¹⁴ Nae kamwia: Uroe wakwa, ni i ashaaṛua mmufukiye kikwena na imwavia masaa anu?

¹⁵ Nae kavaia: Muṛe kusembekeń unyuku lwa mikae yoose, amu kilya kiniingaa nndu muu mmasaa meengi ndi.

¹⁶ Kavakabia sumu kavaia: Eeifoo nndu isimba arema nrema tamwi, nato fikannde shoonga shiingi nnu.

¹⁷ Kakusaṛa ngooń yamwi kanumbua: Naare ntanaa? Amu noore kundo kwa isaṅiṛia filimu fakwa ndi.

¹⁸ Kanumbua: Ntanaa kuri: Mburuaa makumbi akwa ntobiṛie engi manini, nsaṅiṛie-fo filimu fakwa foose na masaa akwa.

¹⁹ Llyo niiaań nrima wakwa: Nrima wakwa, kuwore mboṛa nini ya myaka miingi ishaa. Alli imuya, kukuliye shoonga, kukuniye wari, kukyese!

²⁰ Na Iṛuva kamwia: Iwe kukee nriṅani. Kio ki kufwaa! A filya kwansaṅiṛia fivaa fa iń?

²¹ Nkuro nndu woose atanio̱o̱ ulya akee isaṅiṛia masaa amwi na ikusurana nawo meni atawore masaa a kwa Iṛuva.

²² Kaia vanalosho vamwi: Kiimba kya iki namwia: Manya mutakwareese kya muu wanu mwinumbuaa, mulyaa ki, ana kya mivili yanu muṛaa ki.

²³ Amu muu nto nnini kita shoonga na wili kita kya iṛaa.

²⁴ Lleń makurukuru! Nta eeṛaa mbeu ndi ana eelulaa ndi, nta awore andu a iitiṛimu shoonga ana makumbi ndi. Na Iṛuva yye aalelaa. A ini ni ini se mwilanyi ndee deń?

²⁵ A kunu kwanu ni i amakii yengeṛia kyeeri kya muu wamwi na akwaa ni irambo limwi tubu na kakutimbiṛita ki?

²⁶ Kyasia kwakooya mutamakii itana kindo kinnya nta kimwi, nki ili mukee ikwareesiań fiingi?

²⁷ Kulosheń na fivaṛo kasa fimiaa! Nta fiṛundaa mashoṛa ana fookaa miseto ndi. Nań namuia: Na akwaa nSalomon utoṛeń lwamwi loose nta aṛaa kinuru sha kimwi kyayo ndi.

²⁸ Kyasia kwakooya Iṛuva avikaa kuri maṛe a ifo nremiń aiyo nnu na ndesi akandeeṛwa muroń, kyasiań ni ini se amwengeṛiaa kikilie, ini va ikusura yaangu?

²⁹ Neeni manya mutaṛuye sheeli mulyaa ana kasa munwaa ana manya mutaawukwawukwa kiimba kyayo!

³⁰ Amu ifi foose mfo fiṛuywaa vvandu va isanga. Kake Vaava wanu eeshi, sheeli ifi foose fimutinye.

³¹ Kake kindo muṛuyaa ni umangi lwa Iṛuva, na ifi fingi mwengeṛio̱o̱.

³² Manya mutaeṛee, ini siṛi shinnya! Amu Nde yanu ansenywa imuniinga umangi.

³³ Kumbeń filya mufiwore mufiniingie five nsimbika wa ililia vakiva! Kusongosień mboloko ta irwaa fesa titakuaa, mmasaa atasiaa ifo iṛuvewu, atafikio̱o̱ mmanini ana atakasheeswaa nkurukuru.

³⁴ Amu alya masaa anu akaa, wwo na mirima yanu indekaa.

³⁵ Veń mufingie fisi fanu, na taa tanu tiakaa!

³⁶ Neeni muvakane na vandu vaveree nndumi wawo kyeeri auyaa auka waliń, amu ili ashaa na ikabakaba yoondi, vanruye ilyo yeni.

³⁷ Ngoma maketi alya nndumi wawo akooyaa valele rembo ili auyaa. Nkue namuia: Akufingaa na ivawaria shoongeń na isha avaṛundie.

³⁸ Kasha ikamba lya kavili lya iringa kio na akwaa llya kararu kavakooya vakee kuro da, ngoma maketi wo.

³⁹ Kake manyiń iki: Kifo muni numba eemanyaa kyeeri inini lishaa, eelalaa rembo, nta eeotoṛiaa numba yamwi ifukyo̱ ndi.

⁴⁰ Neeni kaań kya umbuura, amu kyeeri kyo mutakusaṛie nkyo Mwana wa nndu ashaa nakyo.

⁴¹ Petiro kamwia: Nndumi, sumu ii kwationgoya ise da ana vvandu woose naań?

⁴² Nndumi kanumbua: Kyasia ni i akee mulla nsumani akee na ndango, nndumi wamwi anreyaa maketi amwi avaavie wavi lwawo lwa shoonga ili kyeeri kifikaa?

⁴³ Ulya akee wa ngoma ni iketi lia, nndumi wamwi kasha kankooya eetaanaa kuro.

⁴⁴ Nkya dede namuia: Ashemwaṛuaa nnini wa masaa amwi woose.

⁴⁵ Kake kwakooya iketi lia lyakusaṛa ifo nrimiń wamwi likanumbua: Nndumi wakwa ansinda isha, nae kabooka ikaba maketi alya engi a kiwoomi na a kika na ilya na inwa na inangwa,

⁴⁶ nndumi wa iketi lia ashaa nkonu ataukusaṛie na saa ataiishi. Nae ankabaa kumande usao lwairika na inniinga wavi lwamwi andu emwi na valya vatakusurie Iṛuva.

⁴⁷ Na iketi lia liishi mifurie ya nndumi wamwi, nalyo nta itana mifurie yamwi, ito akabwaa ikabwa lya kita.

⁴⁸ Na ulya ateeshi, nae katana kindo kisumani na ikabwa, akabwaa ikabwa yaangu. Amu ulya amaavio̱ fiingi, na kwamwi fitinye fiingi. Na ulya andeṛaṛikio̱ fiingi, kwamwi ye fitiṅaa fiingi kya mmwasi.

⁴⁹ Niń nansha yeeṛa muro isangeń. Nato kifo weemmaa yatwa, niikundaa kingi kya mmwasi ndi.

⁵⁰ Kake noore ubatiso kyashiwara mbatiswa nalo, nań nkee ivaviswa nnu kumande lwawukie.

⁵¹ A le mukusaṛie sheeli nansha innde unambwe isangeń? Namuia: Wode nkuro ndi, kake ni ilakanisa.

⁵² Amu kuuka alli kari ka numba imwi vavaa-fo vandu varaanu vataṛakanie, iwo vararu vasue iwo vavili, na iwo vavili vasue iwo vararu.

⁵³ Na vandu valakanaa nndee na mwana, na mwana na ndee, na yeyo na mfwamwi, na llifu na mae, na nndu na nkwe wamwi.

⁵⁴ Kaia mamwiingi ulya: Kyeeri muloliaa iṛumbe liifumbisaa taari ya ukwawuń munumbuaa ree: Fua ikee isha. Nakyo kikava kuro.

⁵⁵ Na kyeeri muloliaa mburaato iivivitaa yuka taari ya itate mukanumbua: Mwi uvaa. Nakyo kikava kuro.

⁵⁶ Ini vamakavili, mwishi illa fwana ya isanga li na ya iṛuvewu. A nki ili mutakee imakii irambua kya feeri fi fa alli?

⁵⁷ A ini mu veni nki ili mutakee imakii yavanisa kilya kisumani kari kanu?

⁵⁸ Amu ili kuriani na ndiingi wafo mwiendaa kwa nshili, tania utomari ikwitanisa nae ifo shień, kaaṛa atakukurike kwa mfukya kikwena. Na mfukya kikwena andekurambikia maakoń a mukaba, na mukaba akurwaa kifingioń.

⁵⁹ Nakuia: Kuukaa-fo kutu ndi, kumande kwamaa itaa itasaa nta senti imwi.