Luka 10 - MMA SHIYYA

¹ Kyasia numa ya ifi Nndumi kasaua na vandu vengi makumi mfungare. Kavaruma vavili vavili vamwirie mbele yenda muṛiń woose na kundo koose eendeeṛiaa yenda ye muni.

² Kavaia: Fa iilula favva fiingi, kake vaṛundi va mashoṛa vvaangu. Kyasia tereveń Nndumi wa iilula arume vaṛundi iilulioń lyamwi.

³ Kwendień! Kulleń namuruma mukee sha maanri akee karikari ka sui.

⁴ Manya mutakurike mboloko ana kishawu ana faaru. Lingi manya mutaisane nndu shień.

⁵ Kake mukaira na numba kwa nndu bookeń inumbua: Kaań-fo na unambwe kunu numba ii.

⁶ Na kwakooya eefo mwana wa unambwe, mboṛa yanu inkayaa. Na kwakooya ateefo, mboṛa yanu imuuiyaa.

⁷ Kyasia kaań numba yo mwilyaa na inwa ifo vamuniinga. Amu muṛunda asumani iniingwa maṛe amwi. Manya mutasamisami mwikaa numba ii na ii.

⁸ Na muṛi woose mwakaa vakamuwaria kuliyeń shoonga tilya vamwendie.

⁹ Kiṛeń valya muvakooyaa-fo valole, muvaie: Umangi lwa Iṛuva lwammushea kufui.

¹⁰ Na muṛi woose mwakaa, nawo nta imuwaria, ukeń-fo mwire shień ta ifo mwinumbuaa:

¹¹ Na akwaa mfunga ya muṛiń wanu ikee marendeń eru taiangatia imuuiye. Kake manyiń sheeli umangi lwa Iṛuva lwansha kufui.

¹² Nań namuia: Nkonu ulya kivaa kyaangu mmwasi Sodomo yaangusio̱ kita muṛi to.

¹³ Ushi iwe Korasini Ushi iwe Betisaida! Amu kikoo myorusie yo indetanika kwanu yatanikia kulya Tiro na Sidon, kikooyaa vakurra ilyo veeṛaa miseto ya makunia na ikaa rembo mafuń.

¹⁴ Kake nkonu ulya wa uumisio kivaa kyaangu kya Tiro na Sidon yaangusio̱ uvave kita ini.

¹⁵ Nawe Kaperinaumu kweenroswaa se kumande iṛuvewu? Kwolotwaa kumande si kwa vafu.

¹⁶ Ulya amwaranyaa ini nniń anshaaranya. Na ulya amuleaa ini nniń anshilea. Na uu ashileaa niń allea ulya anshirumia.

¹⁷ Valya makumi mfungare vakauya na ifura veenumbuaa: Nndumi, na akwaa mmimuyo mikasha indetiirikia kiimba kya irina lyafo.

¹⁸ Nae kavaia: Nallolia Satana eeolokaa sha kimuli auka iṛuvewu.

¹⁹ Lleń nankuniinga finya ya ivariavaria shoka na nguluva na ivinga finya yoose ya Nkituva. Ana nta kindo kimukasheesaa.

²⁰ Kake manya mutafure, fulya mimuyo mikasha imwirikie ndi. Kake fureń, fulya marina anu akee matisiṛe kulya iṛuvewu.

²¹ Kyeeri kilya kasenywa kyuka na kwa Mumuyo Nsongori kanumbua: Nakwaana Vaava kukee Nndumi wa iṛuvewu na wa isanga, fulya kwafisa vaaria na vaṛango mboni ti, kwatirambuya vaani. Ee Nde, amu nkuro kyakusenya.

²² Kanumbua: Nanrambikio̱ findo foose vVaava wakwa. Ana eefo eeshi Mwana kitaare nNde ndi, ana eefo eeshi Nde kitaare mMwana na ulya Mwana anrambuyaa ndi.

²³ Yesu kaaṛukia vaseṛo vamwi vakee kyaanya kyawo kavaia: Ngoma vandu miso awo alolie ifi ini mulolie.

²⁴ Nań namwia: Vaauya fisuku veengi na mamangi meengi valanga ilolia ifi ini mulolie nta ilolia, vakalanga iita ifi ini mukee iita nta iita.

²⁵ Kyasia mwaṛia wa mavavaso kashea Yesu kamwaala eemwiaa: A le llosha, nkiki ntanaa, amu nrwaa diṅu ya muu utakisiaa?

²⁶ Na Yesu kamwia: Naare kitisiṛie ifo mavavasoń a Iṛuva? Kusomaa-fo are?

²⁷ Kamwia: Nkuri: Kunda Nndumi Iṛuva wafo na ngoo yafo yoose na nrima wafo woose na finya yafo yoose na makusaṛo afo woose. Kunda na vandu vengi sheeli kukukundie ku muni!

²⁸ Yesu kamwia: Kwamaaṛua kisumani. Nawe tana kuro, llyo kukooyaa muu utakisiaa.

²⁹ Kake eefuriee ikuwara da kaura Yesu: A vandu wo vvakundaa wwo vangava?

³⁰ Yesu kamwaṛua kamwia: Aranya nkwie! Eeifoo nndu auka Yerusalemu eeinamaa Yeriko. Ili akirekie shień, katambukio̱ mfisoki. Vakamwambua miseto yamwi yoose vakankaba vakantia na ṅunuṅunu vakaenda.

³¹ Na kyeeri kilya nndu nkohani kainama na shia ilya. Kallolia kaira mbaai.

³² Mfo kuro nndu wa kwa Levi, nae eekee llosha, kasha na shia ilya da. Kafika-wo kallolia kaira mbaai.

³³ Ili vandu wo vandefulukia, numa yawo nndu wa kulya Samaria eeriee kyaaṛo kyamwi. Ili andefika-wo kallolia kalliha.

³⁴ Kanserikia kanrwaya miri faasheń famwi na mafura na mfinyo na imwiṛina kamwiṛina na firami. Kansaamisa nshu-nguń wamwi kamfita numba ya veeni kawavaṛia-fo.

³⁵ Ili lya ndesi kakwimboo alunge kyaaṛo kyamwi. Kitaare ameenda kauta rupia ivili kaniingia muni numba kantereva kamwia: Vavaṛa nato nndu uu! Na kwakooya kuntaniaa kindo kya mmwasi, nshekutaa ili nuuyaa.

³⁶ Na Yesu kauṛa nndu ulya: A kulla iwe? A vandu valya vararu ulya akunda nndu ulya atambukio̱ mfisoki ni ungau?

³⁷ Nae kamwia: Ni ulya allilia. Llyo Yesu amwia: Kwendień kutane kuro nawe!

³⁸ Ili veekee iṛua urukeń, Yesu kasha kimuṛiń kimwi kya vandu. Neefo eeifoo nka irina lyamwi eevaangwaa Marita. Kaimurusa Yesu numbeń kwamwi.

³⁹ Na nka ulya eeworee mfwamae wamwi avaangwaa Maria. Ito kakaa rembo marendeń a Nndumi kaaranya firero famwi.

⁴⁰ Kake Marita kakutomarisa nnu indundia mashoṛa. Kanserikia kamwia: Nndumi, kulolie se, mfwamae wakwa anshitia mashoṛa woose naṛundia shi muni? Mwie te asheelekie!

⁴¹ Yesu kaaṛua kamwia: Iwe Marita, kwakwareesa nnu na iṛiikiswa mfindo fiingi.

⁴² Nakwia: Kindo kyakuwara kuve nakyo nkimwi tubu. Na Maria ye ankusauya wavi ilu unuru, nalo akitambashulwaa ndi.